អធិការដ្ថាននគរបាលស្រុកកែវសីមាបានឲ្យដឹងថា នៅវេលាម៉ោង ៩ និង ២២នាទី ថ្ងៃទី២១ ខែកក្កដា ឆ្នាំ២០១៩ កម្លាំងអធិការដ្ឋាននគរបាលស្រុកកែវសីមា សហការជាមួយគណៈបញ្ជាការឯកភាពស្រុកកែវសីមា បង្ក្រាបបានរថយន្តចំនួន ០១គ្រឿង ម៉ាក TOYOTA Hilux (មួយបាំងកន្លះ) ពណ៌ក្រហម គ្មានផ្លាកលេខ ផ្ទុកឈើប្រណិតប្រភេទបេង ចំនួនសរុប ៤៣ដុំ នៅចំណុចជិតខ្សែបន្ទាត់ព្រំដែនកម្ពុជា-វៀតណាមUTM+0707786,1335139 ស្ថិតក្នុងភូមិអូរអាម ឃុំស្រែខ្ទុម ស្រុកកែវសីមា ខេត្តមណ្ឌលគិរី ។ ដោយឡែកម្ចាស់បានរត់គេចខ្លួនបាត់ ។
បច្ចុប្បន្ន ឈើប្រណិតប្រភេទបេងទាំង៤៣ដុំ បានប្រគល់ជូនជំនាញសង្កាត់រដ្ឋបាលព្រៃឈើស្រែខ្ទុមដើម្បីយកទៅរក្សាទុក ។
ចំណែកឯរថយន្តដែលជាមធ្យោបាយដឹកជញ្ជូនផលអនុផលព្រៃឈើ គ្មានច្បាប់អនុញ្ញាត ដោយទទួលបានបទបញ្ជាពីប្រធានគណៈកម្មការថ្នាក់ជាតិដើម្បីទប់ស្កាត់បទល្មើសធនធានធម្មជាតិ កម្លាំងយើង បានសហការជាមួយសហការជាមួយគណៈបញ្ជាការឯកភាពស្រុក ដឹកនាំដោយលោក យិន សុខឡេង អភិបាលរងស្រុក បានធ្វើការដុតបំផ្លាញចោលនៅនឹងកន្លែងតែម្តង ៕ ដោយ៖កូឡាប