មនុស្សយ៉ាងតិចណាស់ចំនួន ៤៥នាក់ រងរបួសដែលមានម្នាក់កំពុងស្ថិតក្នុងស្ថានភាពធ្ងន់ធ្ងរ បន្ទាប់ពីមានមនុស្សពាក់ម៉ាសមួយក្រុម បានវាយប្រហារទៅលើក្រុមបាតុករប្រឆាំងរដ្ឋាភិបាលហុងកុង និងអ្នកធ្វើដំណើរ នៅស្ថានីយ៍រថភ្លើងហុងកុង កាលពីថ្ងអាទិត្យម្សិលមិញនេះ។
ក្រុមជើងកាងដែលមានពាក់អាវពណ៌ស និងប្រដាប់ដោយដំបង បានសម្រុកចូលស្ថានីយ៍រថភ្លើងMass Transit Railway ស្ថិតនៅតំបន់ Yuen Long និងបានចូលក្នុងរថភ្លើង និងវាយប្រហារអ្នកដំណើរ។
សាក្សីនៅកន្លែងកើតហេតុបាននិយាយថា ក្រុមជើងកាងទាំងនោះទំនងជាមានគោលដៅវាយប្រហារលើអ្នកដំណើរពាក់អាវខ្មៅ ដែលបានចូលរួមហែរក្បួនប្រឆាំងនឹងរដ្ឋាភិបាលហុងកុង។ ការវាយប្រហារនោះកើតឡើង ក្រោយពេលសកម្មជនរាប់ពាន់នាក់បានធ្វើការឡោមព័ទ្ធការិយាល័យតំណាងរបស់ចិន នៅក្នុងទីក្រុង ហើយក្រោយមកបណ្តាលឲ្យមានការប៉ះទង្គិចជាមួយនឹងប៉ូលីស។
មនុស្សម្នាក់ជាច្រើនបានស្រែកយំ ខណៈពេលដែលក្រុមមនុស្សទាំងនោះបានវាយលើអ្នកតវ៉ាជាច្រើន និងអ្នកកាសែតនៅស្ថានីយ៍ បណ្តាលឲ្យមានឈាមជាច្រើនៅលើឥដ្ឋ។
អ្នករិះគន់ បានធ្វើការចោទប្រកាន់ប៉ូលីសហុងកុងថា បានចំណាយពេលច្រើនជាងមួយម៉ោងដើម្បីមកដល់កន្លែងកើតហេតុ ទោះបីជាមានការតេហៅក៏ដោយ និងការបរាជ័យក្នុងការចាប់ក្រុមមនុស្សទាំងនោះ។
ក្រុមមនុស្សពាក់អាវសទាំងនោះ ក្រោយពេលធ្វើការវាយប្រហារលើក្រុមបាតុករប្រឆាំងរដ្ឋាភិបាលហុងកុងរួច ត្រូវបានគេថត ដោយក្រុមនោះបានចាកចេញពីកន្លែងកើតហេតុ ដោយជិះឡានមានស្លាកលេខរបស់ចិន។
សូមបញ្ជាក់ថា ទីក្រុងហុងកុងបច្ចុប្បន្ន កំពុងធ្លាក់ចូលក្នុងវិបត្តិដ៏អាក្រក់ខ្លាំងក្នុងប្រវត្តិសាស្រ្ត ដោយសារតែការតវ៉ា ការហែរក្បួនរបស់ក្រុមបាតុករ និងការប៉ះទង្គិចគ្នារវាងក្រុមបាតុករ និងប៉ូលីស។ ការតវ៉ាអូសបន្លាយអស់ជាច្រើនសប្តាហ៍មកហើយ ដើម្បីប្រឆាំងនឹងច្បាប់ធ្វើបត្យាប័ន ដែលអនុញ្ញាតឲ្យមានការបញ្ជូនអ្នកទោសពីហុងកុងទៅកាត់ទោសនៅប្រទេសចិនបាន។
ទីក្រុងហុងកុងត្រូវបានអង់គ្លេសប្រគល់ទៅឲ្យចិនវិញនៅក្នុងឆ្នាំ ១៩៩៧ ដោយស្ថិតក្រោមរូបមន្តប្រទេសមួយ ប្រព័ន្ធគ្រប់គ្រងពីរ ដែលផ្តល់សេរីភាពដល់ទីក្រុងហុងកុង រួមមានសិទ្ធិសេរីភាពក្នុងការតវ៉ា និងប្រព័ន្ធតុលាការឯករាជ្យ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia