ខេត្តព្រះសីហនុ៖ អភិបាល នៃគណៈអភិបាលខេត្តព្រះសីហនុ លោក អ៊ី សុខឡេង បានឲ្យដឹងថា រាល់ថ្ងៃនេះនៅមានម្ចាស់យានយន្តជាច្រើនទៀត នៅមិនទាន់ចូលរួមសហការជាមួយអាជ្ញាធររដ្ឋបាលក្រុងនៅឡើយទេ ដោយបានយករថយន្តទៅចតលើចិញ្ចើមផ្លូវសាធារណៈ ដែលបង្កឲ្យមានការកកស្ទះ និងបាត់បង់របៀបរៀបរយ។
ផ្តើមពីបញ្ហានេះ លោក អ៊ី សុខឡេង បន្តថា កាលពីថ្ងៃអាទិត្យ ២១ ខែកក្កដា ឆ្នាំ២០១៩ រដ្ឋបាលក្រុងព្រះសីហនុ បានបញ្ជាកម្លាំងឲ្យចុះចាប់ឡាន ដែលចតលើផ្លូវគ្មានសណ្តាប់ធ្នាប់ចំនួន ១០គ្រឿង និងគោយន្តដឹកគ្រែលក់១គ្រឿងទៀត យកមករក្សាទុកនៅក្នុងបរិវេណសាលាក្រុង ដើម្បីដាក់ពិន័យចំពោះអ្វី ដែលលោកអភិបាលក្រុងព្រះសីហនុ បញ្ជាក់ថា ម្ចាស់យានយន្តទាំងនោះ មិនគោរពតាមគោលការណ៍ណែនាំ របស់អាជ្ញាធរក្រុង ហើយបាននាំយករថយន្ត របស់ខ្លួនមកចតនៅលើចិញ្ចើមផ្លូវសាធារណៈ នាំឲ្យកកស្ទះដល់ការធ្វើដំណើរ, បាត់បង់របៀបរៀបរយ និងសណ្តាប់ធ្នាប់សាធារណៈ។
លោក អ៊ី សុខឡេង ព្រមានថា រថយន្តដែលអាជ្ញាធរឃាត់ចាប់ខាងលើនេះ ហើយរក្សាទុករយៈពេលយូរថ្ងៃ និងផាកពិន័យតាមច្បាប់ ដើម្បីព្រមានដល់ម្ចាស់ឲ្យរាងចាល។
លោកអភិបាលក្រុងព្រះសីហនុ បន្តថា សកម្មភាពចុះរៀបចំសណ្តាប់ធ្នាប់សាធារណៈ នាទីប្រជុំជនក្រុងព្រះសីហនុនេះ គឺអាជ្ញាធរ នឹងចុះអនុវត្តន៍រាល់ថ្ងៃ។ ហេតុដូច្នេះ លោកស្នើដល់ប្រជាពលរដ្ឋ និងសាធារណជន ចូលរួមសហការជាមួយអាជ្ញាធរ រដ្ឋបាលក្រុងព្រះសីហនុ ឱ្យបានទាំងអស់គ្នា៕ ដោយ៖ ដែន សីមា
