ខេត្តព្រះសីហនុ៖ សមត្ថកិច្ចនគរបាលខេត្តព្រះសីហនុ កំពុងសាកសួរជនសង្ស័យចំនួន ៨នាក់ ដែលកម្លាំងចម្រុះបានចុះចាប់ខ្លួន កាលពីយប់មិញ ទាក់ទិនករណីចាប់ជំរិតជនជាតិចិនដូចគ្នា ដើម្បីជំរិតទារប្រាក់។
មន្ត្រីនគរបាលបានឲ្យដឹងព័ត៌មានបឋមថា កាលពីម៉ោង ៨ និង៣០នាទី យប់ថ្ងៃទី២១ ខែកក្កដា ឆ្នាំ២០១៩ សមត្ថកិច្ចចម្រុះ មានទាំងកម្លាំងនគរបាល និងកងរាជអាវុធហត្ថខេត្តនេះ បានចុះបង្ក្រាបករណីជនសង្ស័យជនជាតិចិនដូចគ្នា នៅក្នុងសណ្ឋាគារ និងកាសុីណូ ឃ្វីនកូ បន្ទប់លេខ៦ ជាន់ទី៥ មានទីតាំង នៅក្នុងសង្កាត់លេខ៣ ក្រុងព្រះសីហនុ។
សមត្ថកិច្ចឲ្យដឹងទៀតថា ជនរងគ្រោះមានគ្នា២នាក់ ហើយជនសង្ស័យមាន បក្ខពួកចំនួន៨នាក់។
យុទ្ធនាការនេះ សមត្ថកិច្ចចម្រុះបានដកហូតវត្ថុតាងមួយចំនួនរួមមាន៖
១- រថយន្ត Iexus570 មួយគ្រឿង
២- ទូរស័ព្ទ ១០គ្រឿង
៣- កាត ធនាគារ ១៣
៤- លិខិត ឆ្លងដែន ៣ក្បាល
៥- អត្តសញ្ញណប័ណ្ណចិន៤ច្បាប់
៦- កាបូបស្ពាយ១
៧- ខ្សែរិត ១ដុំ
បច្ចុប្បន្ននគរបាលខេត្តព្រះសីហនុ កំពុងសាកសួរជនសង្ស័យទាំងនោះ នៅស្នងការដ្ឋាននគរបាល ដើម្បីឈានទៅកសាងសំណុំរឿងបញ្ជូនទៅកាន់សាលាដំបូងខេត្តព្រះសីហនុ បន្តនីតិវិធីតាមច្បាប់៕ ដោយ៖ ដែន សីមា