ភ្នំពេញ ៖ សេចក្តីបំភ្លឺរបស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានបញ្ជាក់ថា ល្មមឈប់ប្រើព័ត៌មានក្លាយបន្លំ អំពីវត្តមានកងទ័ពចិន លើទឹកដីកម្ពុជា ដើម្បីប្រឆាំងនឹងយើង នេះបើតាមសេចក្តីប្រកាសព័ត៌មាន របស់ក្រសួងការបរទេស និងសហប្រតិបត្តិការអន្តរជាតិ នៅថ្ងៃទី 22 ខែកក្កដា ឆ្នាំ 2019 នេះ។
សម្ដេចតេជោនាយករដ្ឋមន្ត្រីហ៊ុន សែន បានច្រានចោល យ៉ាងដាច់អហង្ការ ចំពោះព័ត៌មានប្រឌិត ចេញផ្សាយដោយសារព័ត៌មាន The Wall Street Journal ដែលចោទប្រកាន់កម្ពុជាថា បានចុះកិច្ចព្រមព្រៀង ដោយសម្ងាត់មួយ អនុញ្ញាតឲ្យយោធាចិន ប្រើប្រាស់ដោយផ្តាច់មុខ នូវមូលដ្ឋានកងទ័ពជើងទឹករាម ក្បែរខេត្តព្រះសីហនុ។
សម្ដេចតេជោ នាយករដ្ឋមន្ត្រី ចាត់ទុកព័ត៌មានប្រឌិត ចុងក្រោយនេះថា ជាចេតនាដ៏អាក្រក់បំផុត ប្រឆាំងជាមួយកម្ពុជា។ “….គ្មានរឿងបែបនេះ កើតឡើងនោះទេ ព្រោះមូលដ្ឋានយោធាបរទេស វាបានប្រឆាំង នឹងរដ្ឋធម្មនុញ្ញរបស់កម្ពុជា”។
សម្ដេចតេជោ នាយករដ្ឋមន្ត្រី មានប្រសាសន៍ អះអាងច្បាស់ៗថា “តើកម្ពុជាត្រូវការវត្តមានយោធាចិន លើទឹកដីរបស់ខ្លួនដើម្បីអ្វី ? យើងមិនបានពិភាក្សាណាមួយ ជាមួយមេដឹកនាំចិននោះឡើយ កុំថាឡើយដល់មានចុះហត្ថលេខា លើកិច្ចព្រមព្រៀង។ “…ល្មមឈប់ប្រើព័ត៌មានក្លាយបន្លំ អំពីវត្តមានកងទ័ពចិន លើទឹកដីកម្ពុជា ដើម្បីប្រឆាំងនឹងយើងហើយ…”។
សូមបញ្ជាក់ថា កាសែតល្បីឈ្មោះរបស់សហរដ្ឋអាមេរិក បានផ្សាយកាលពីម្សិលមិញថា ប្រទេសចិនបានចុះហត្ថលេខាលើកិច្ចព្រមព្រៀងជាសម្ងាត់មួយជាមួយកម្ពុជា ដើម្បីអនុញ្ញាត ឲ្យកងទ័ពរបស់ចិនប្រើប្រាស់មូលដ្ឋានទ័ពជើងទឹករបស់កម្ពុជានៅសមុទ្រភាគខាងលិច។ ប៉ុន្តែប្រមុខរដ្ឋាភិបាលកម្ពុជា លោក ហ៊ុន សែន បានប្រតិកម្ម ជាថ្មីម្តងទៀត ដោយអះអាងថា «នេះជាព័ត៌មានប្រឌិតដ៏អាក្រក់បំផុតប្រឆាំងជាមួយកម្ពុជា»។
កាសែត The Wall Street Journal បានផ្សាយថា ការដែលចិនចុះកិច្ចព្រមព្រៀងជាសម្ងាត់មួយជាមួយកម្ពុជាដោយអនុញ្ញាតឲ្យកងទ័ពចិនប្រើប្រាស់មូលដ្ឋានកងទ័ពជើងទឹករបស់កម្ពុជានៅដែន សមុទ្រភាគលិចប្រទេសនេះ គឺបានធ្វើឲ្យសហរដ្ឋអាមេរិកមានក្តីបារម្ភ។ ក្តីបារម្ភរបស់អាមេរិក គឺខណៈ ចិន ដែលជាមហាអំណាចទី២តាមពីក្រោយសហរដ្ឋអមេរិកនោះ កំពុងតែបង្កើនឥទ្ធិពលកងទ័ពរបស់ខ្លួននៅជុំវិញពិភពលោក។ នេះបើតាមការអះអាងរបស់មន្ត្រីសហរដ្ឋអាមេរិកម្នាក់ ដែលមិនបានប្រាប់ឈ្មោះ នៅក្នុងការផ្សាយរបស់កាសែត The Wall Street Journal កាលពីថ្ងៃទី២១កក្កដា។
កាសែតដដែលនេះ បានបន្ថែមថាកិច្ចព្រមព្រៀងសម្ងាត់នោះ កម្ពុជា និងចិនមិនទាន់បានបញ្ចេញឲ្យដឹងជាសាធារណៈនៅឡើយទេ។ តែបានអះអាងថា កិច្ចព្រមព្រៀងនោះ គឺកម្ពុជាផ្តល់ឲ្យភាគីចិននូវសិទ្ធិ ផ្តាច់មុខ រយៈពេល៣០ឆ្នាំ ធ្វើជាមូលដ្ឋានទាហានជើងទឹកចិនមួយផ្នែកនៅឈូងសមុទ្រខ្មែរ ដែលស្ថិតនៅជិតព្រលានយន្តហោះដ៏ធំមួយកសាងដោយចិន។
ក៏ប៉ុន្តែជាថ្មីម្តងទៀត លោកនាយករដ្ឋមន្ត្រី ហ៊ុន សែន តាមរយៈសារព័ត៌មានក្នុងស្រុក Fresh News បានចាត់ទុកព័ត៌មាន ដែលចេញផ្សាយដោយ The Wall Street Journal ថា «ជាព័ត៌មានប្រឌិតដ៏អាក្រក់បំផុតប្រឆាំងជាមួយកម្ពុជា។ គ្មានរឿងបែបនេះកើតឡើងនោះទេ ព្រោះមូលដ្ឋានយោធាបរទេស វាបានប្រឆាំងនឹងរដ្ឋធម្មនុញ្ញរបស់កម្ពុជា»។ នេះបើតាមលោក ហ៊ុន សែន៕ ដោយ៖កូឡាប