ប្រធានាធិបតីអាមេរិច ដូណាល់ ត្រាំ បានថ្លែងថា គាត់អាចយកឈ្នះសង្គ្រាមនៅអាហ្គានីស្ថានដោយងាយ ដោយប្រើពេលត្រឹមមួយសប្តាហ៍ ទៅ ១០ថ្ងៃប៉ុណ្ណោះ ប៉ុន្តែគាត់មិនចង់ឃើញមនុស្សរាប់លាននាក់ស្លាប់ ហើយអាមេរិចសុខចិត្តចរចារជាមួយ ក្រុមតាលីបង់ព្រោះសង្គ្រាមមិនមែនជាអ្វីដែលគាត់ចង់បាននោះទេ។
លោកថ្លែងថា អាមេរិចបានធ្វើឲ្យមានការរីកច្រើនយ៉ាងខ្លាំងឆ្ពោះទៅរកការបញ្ចប់សង្គ្រាមនៅអាហ្គានីស្ថាន តាមរយៈការចរចារជាមួយនឹងក្រុមតាលីបង់ក្នុងរយៈពេលប៉ុន្មានសប្តាហ៍ថ្មីៗនេះ។
ការថ្លែងរបស់លោកធ្វើឡើងនៅចំពោះមុខ នាយករដ្ឋមន្ត្រីប៉ាគីស្ថាន Imran Khan ដែលបានធ្វើដំណើរមកអាមេរិចនៅថ្ងៃច័ន្ទ ដើម្បីផ្សះផ្សារទំនាក់ទំនងនៃប្រទេសទាំងពីរ។
លោកថា សង្គ្រាមអាមេរិចរយៈពេល ១៨ឆ្នាំនៅអាហ្គានីស្ថានគឺអាមេរិចដើរតួជាប៉ូលីស មិនមែនទាហ៊ាននោះទេ ហើយលោកលើកឡើងថា អាមេរិចអាចបញ្ចប់វាបានតាមរយៈកម្លាំងយោធា ហើយអាចបណ្តាលឲ្យមនុស្ស ១០លាននាក់ស្លាប់ ប៉ុន្តែលោកថា នោះមិនមែនជាអ្វីដែលគាត់មានបំណងស្វែងរកនោះទេ។
លោកថ្លែងប្រាប់នាយករដ្ឋមន្ត្រីប៉ាគីស្ថានដូច្នេះថា “ពួកយើងនៅទីនោះ (អាហ្គានីស្ថាន) អស់រយៈពេល ១៩ឆ្នាំ ហើយពួកយើងដើរតួជាប៉ូលីស មិនមែនទាហ៊ានទេ។ ប្រសិនជាយើងដើរតួជាទាហ៊ាន ពួកយើងអាចបញ្ចប់វាត្រឹមរយៈពេល ១សប្តាហ៍ ទៅ ១០ថ្ងៃ”។
សូមបញ្ជាក់ថា ដោយមិនចង់ឲ្យមានសង្គ្រាម និងស្លាប់មនុស្សច្រើននៅប៉ាគីស្ថាន អាមេរិចបានស្វែងរកយុទ្ធសាស្ត្រការទូតដើម្បីបញ្ចប់សង្គ្រាម ហើយកាលពីពេលថ្មីៗនេះ អាមេរិច និងក្រុមតាលីបង់បានធ្វើការចរចារនៅប្រទេសកាតា។ ទោះយ៉ាងណា អាមេរិចនៅតែបន្តរក្សាយោធារបស់ខ្លួនដដែល ដើម្បីដាក់សម្ពាធទៅលើក្រុមតាលីបង់ ក្នុងប្រទេសអាហ្គានីស្ថាន៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN