មេដឹកនាំកូរ៉េខាងជើង បានធ្វើការពិនិត្យមើលនាវាមុជទឹកថ្មីដែលរបបកុម្មុនិស្តនេះនឹងដាក់ពង្រាយវានៅសមុទ្រខាងកើត ឬហៅថាសមុទ្រជប៉ុន។
មេដឹកនាំកូរ៉េខាងជើងកំពុងយកចិត្តទុកដាក់លើការអភិវឌ្ឍន៍អាវុធប្រភេទថ្មីរបស់ខ្លួន ក្រោយកិច្ចចរចារជាមួយអាមេរិចហាក់មិនរីកចម្រើនទៅមុខ។ កូរ៉េខាងជើងក៏បានធ្វើការព្រមាន កាលពីសប្តាហ៍មុនផងដែរថា គម្រោងធ្វើសមយុទ្ធរួមគ្នា រវាងអាមេរិច និងកូរ៉េខាងត្បូងអាចនឹងធ្វើឲ្យកិច្ចចរចារធ្លាក់ចេញឆ្ងាញពីផ្លូវ។
សារពត៌មានរដ្ឋកូរ៉េខាងជើង KCNA បានរាយការណ៍ថា មេដឹកនាំកំពូលបានធ្វើការពិនិត្យ និងសិក្សាលំអិតពីទិន្នន័យយុទ្ធសាស្ត្រ និងប្រតិបត្តិការ និងប្រព័ន្ធអាវុធប្រយុទ្ធ។
ការចុះពិនិត្យអាវុធថ្មីរបស់មេដឹកនាំកូរ៉េខាងជើង បានកើតឡើងតែមួយសប្តាហ៍ប៉ុណ្ណោះ ក្រោយរបបព្យុងយ៉ាង បានធ្វើការព្រមានថា គម្រោងធ្វើសមយុទ្ធរួមគ្នារវាងអាមេរិច និងកូរ៉េខាងត្បូងនៅខែក្រោយ នឹងប៉ះពាល់ទៅដល់ការស្នើឲ្យមានក្រុមការងារដើម្បីពិភាក្សាលើកិច្ចចរចារនុយក្លេអ៊ែរ ដែលមេដឹកនាំអាមេរិច និងកូរ៉េខាងជើងបានព្រមព្រៀងគ្នា កំពុងពេលជួបគ្នានៅតំបន់គ្មានកងទ័ពដែលខ័ណ្ឌចែកកូរ៉េទាំងពីរ។
សូមបញ្ជាក់ថា បច្ចុប្បន្ន អាមេរិចមានទ័ពចំនួន ៣០.០០០នាក់កំពុងឈរជើងនៅកូរ៉េខាងត្បូង ហើយប្រទេសសម្ព័ន្ធមិត្តទាំងពីរបានធ្វើសមយុទ្ធរួមគ្នាជាប្រចាំ ប៉ុន្តែសមយុទ្ធយោធាមួយចំនួនបានធ្វើការកាត់បន្ថយ ដើម្បីបន្ថយភាពតានតឹងជាមួយនឹងកូរ៉េខាងជើង។ ប៉ុន្តែកាលពីពេលថ្មីៗនេះ កូរ៉េខាងត្បូង និងអាមេរិច បានប្រកាសពីគម្រោងធ្វើសមយុទ្ធរួមគ្នាឡើងវិញ នៅខែក្រោយ។
កូរ៉េខាងជើងតែថ្កោលទោសសមយុទ្ធរួមគ្នារវាងអាមេរិច និងកូរ៉េខាងត្បូង ដោយចាត់ទុកថាវាគឺជាការហាត់សមដើម្បីត្រៀមខ្លួនឈ្លានពានកូរ៉េខាងជើង៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia