ខេត្តស្វាយរៀង៖ លោក ម៉ែន វិបុល ប្រធានគណៈកម្មាធិការសាខាកាកបាទក្រហមកម្ពុជាខេត្តស្វាយរៀង នៅថ្ងៃទី ២៣ ខែ កក្កដា ឆ្នាំ ២០១៩ នេះ បានចាត់ឲ្យក្រុមការងារសាខាដឹកនាំដោយលោកស្រី ភួង សារី លេខាគណៈកម្មាធិការសាខា នាំយកអំណោយមនុស្សធម៌ ចុះសួរសុខទុក្ខ និងចែកអំណោយដល់គ្រួសាររងគ្រោះដោយសារខ្យល់កន្ត្រាក់កាលពីថ្ងៃទី ២២ ខែ កក្កដា ឆ្នាំ ២០១៩ នៅឃុំត្នោត ស្រុកកំពង់រោទិ៍ រងគ្រោះធ្ងន់ ៤ ខ្នង ខូចខាតស្រាល ៧ ខ្នង នៅឃុំព្រៃគគីរ ស្រុកចន្ទ្រា រងគ្រោះធ្ងន់ ១ ខ្នង និងនៅឃុំព្រៃតាអី ស្រុកស្វាយទាប រងគ្រោះដោយសារអគ្គិភ័យ ១ ខ្នង សរុប ១៣ ខ្នង ។
នាឱកាសនោះលោកស្រី ភួង សារី បាននាំមកនូវប្រសាសន៍ផ្តាំផ្ញើសាកសួរសុខទុក្ខពីសំណាក់សម្តេចកិតិ្តព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលជានិច្ចកាលសម្តេច តែងតែយកចិត្តទុកដាក់ គិតគូរពីសុខុមាលភាពប្រជាពលរដ្ឋទូទៅ ដោយមិនប្រកាន់និន្នាការនយោបាយអ្វីឡើយ ។ ជាមួយគ្នានេះ លោកស្រី បានលើកទឹកចិត្តសូមកុំអស់សង្ឃឹម ហើយប្រឹងប្រែងបំពេញការងារ និងប្រកបរបរចិញ្ចឹមជីវិត ដើម្បីស្តារសេដ្ឋកិច្ចគ្រួសារឡើងវិញ ។ លោកស្រី បានលើកឡើងពីការខិតខំប្រឹងប្រែងរបស់កាកបាទក្រហមកម្ពុជា ក្នុងការជួយដល់ប្រជាពលរដ្ឋនៅពេលជួបគ្រោះមហន្តរាយផ្សេងៗ ពោលគឺទីណាមានការលំបាក ទីនោះមានវត្តមានកាកបាទក្រហមកម្ពុជាចុះជួយជានិច្ច ។
អំណោយដែលបានចែកជូនគ្រួសាររងគ្រោះដោយសារអគ្គិភ័យទទួលបាន ៖ អង្ករ ៥០ គីឡូក្រាម ក្រណាត់កៅស៊ូតង់ ១ ធុងទឹកជ័រ ១ ឆ្នាំងបាយ-សម្ល ២ មី ១ កេស ត្រីខ ១០ កំប៉ុង ទឹកត្រី ៦ ដប ១ កន្ទេលបត់ ១ ឃីត ១ កញ្ចប់ (ភួយ មុង សារុង ក្រមា) និងថវិកា ៤០០.០០០ រៀល ។
គ្រួសាររងគ្រោះដោយសារខ្យល់កន្ត្រាក់ ១២ គ្រួសារ៖ សម្រាប់គ្រួសាររងគ្រោះធ្ងន់ ទទួលបាន អង្ករ ៣០ គីឡូក្រាម មី ១ កេស ត្រីខ ១០ កំប៉ុង ទឹកត្រី ៦ ដប ធុងទឹកជ័រ ១ ឆ្នាំងបាយ-សម្ល ២ ក្រណាត់កៅស៊ូតង់ ១ កន្ទេលបត់ ១ ឃីត ១ កញ្ចប់ (ភួយ មុង សារុង ក្រមា) និងថវិកា ២០០.០០០ រៀល ។ សម្រាប់គ្រួសាររងគ្រោះស្រាល ទទួលបានថវិកា ៥០.០០០ រៀល សម្រាប់ទិញសម្ភារជួសជុលផ្ទះឡើងវិញ ៕ ដោយ៖វ៉ៃកូ