ភ្នំពេញ៖ យោងតាមរបាយការណ៍ឆមាសទី១ ដើមឆ្នាំ២០១៩ របស់ គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស(គ.ជ.ប.ជ) បានបង្ហាញថា ស្ថានភាពបទល្មើសជួញដូរមនុស្សត្រូវបានបង្ការ ទប់ស្កាត់ និងបង្ក្រាបជាបន្តបន្ទាប់ អាស្រ័យដោយមានការខិតខំប្រឹងប្រែង និងមានកិច្ចសហការបានល្អរវាងក្រសួង ស្ថាប័ន អង្គភាពសមាជិកនៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្សរួមទាំងលេខាធិការដ្ឋាននៃគណៈកម្មាធិការថ្នាក់ក្រោមជាតិនិងអង្គការដៃគូទាំងឡាយបានបង្ក្រាប អំពើជួញដូរមនុស្ស និងអំពើធ្វើអាជីវកម្មផ្លូវភេទសរុបបាន៧៨ករណី ក្នុងនោះ ឃាត់ខ្លួនជនសង្ស័យបញ្ជូនទៅសាលាដំបូង ចំនួន៩៧នាក់ និងសង្គ្រោះជនរងគ្រោះ ចំនួន២៦៣នាក់ ។
នៅព្រឹកថ្ងៃទី២៣ ខែកក្កដា ឆ្នាំ២០១៩ នាទីស្តីការក្រសួង គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស (គ.ជ.ប.ជ) បានបើកកិច្ចប្រជុំស្តីអំពីរបាយការណ៍ក្រុមការងារអន្ដរក្រសួង លើការប្រយុទ្ធប្រឆាំងអំពើជួញដូរមនុស្ស ឆមាសទី១ ឆ្នាំ២០១៩ និងលើកទិសដៅឆមាសទី២ ឆ្នាំ២០១៩ ក្រោមអធិបតីដ៏ខ្ពង់ខ្ពស់ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ និងជាប្រធានគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស។
យោងតាមរបាយការណ៍ឆមាសទី១របស់ (គ.ជ.ប.ជ) បានបង្ហាញថា ស្ថានភាពបទល្មើសជួញដូរមនុស្សត្រូវបានបង្ការ ទប់ស្កាត់ និងបង្ក្រាបជាបន្តបន្ទាប់ អាស្រ័យដោយមានការខិតខំប្រឹងប្រែង និងមានកិច្ចសហការបានល្អរវាងក្រសួង ស្ថាប័ន អង្គភាពសមាជិកនៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្សរួមទាំងលេខាធិការដ្ឋាននៃគណៈកម្មាធិការថ្នាក់ក្រោមជាតិនិងអង្គការដៃគូទាំងឡាយបានបង្ក្រាប អំពើជួញដូរមនុស្ស និងអំពើធ្វើអាជីវកម្មផ្លូវភេទសរុបបាន៧៨ករណី (កើនឡើង១៦ករណី ស្មើនឹង២៥%)។ ក្នុងនោះ ឃាត់ខ្លួនជនសង្ស័យបញ្ជូនទៅសាលាដំបូង ចំនួន៩៧នាក់ (កើន១២នាក់ ស្មើនឹង១៤%) ក្នុងនោះស្រី២២នាក់ អនីតិជន០៩នាក់ ជាជនបរទេស ១៤នាក់សញ្ជាតិចិន ១២នាក់ និងអាមេរិក០២នាក់។ សង្គ្រោះជនរងគ្រោះ ចំនួន២៦៣នាក់ ស្មើនឹង១៤៨% ក្នុងនោះមាន អាយុក្រោម១៥ឆ្នាំ ៧០នាក់ អាយុ១៥-១៧ឆ្នាំ ៣១នាក់ និងពី១៨ឆ្នាំឡើង ១៦២នាក់។ដោយឡែក ការបង្ការ ទប់ស្កាត់ ការជួញដូរមនុស្សតាមរូបភាពអាពាហ៍ពិពាហ៍រវាងពលរដ្ឋខ្មែរ និងជនបរទេស ក្នុងឆមាសទី១ ឆ្នាំ២០១៩នេះ ក្រសួងការបរទេស និងច្រកចេញចូលតែមួយ របស់ក្រសួងមហាផ្ទៃ ទទួលបន្ទុកការងារអាពាហ៍ពិពាហ៍រវាងពលរដ្ឋខ្មែរ និងជនបរទេស បានទទួលពាក្យ និងធ្វើសម្ភាសន៍ពលរដ្ឋខ្មែរ និងជនបរទេស សរុបចំនួន១,០០៩គូ ដែលបានដាក់ពាក្យសុំរៀបអាពាហ៍ពិពាហ៍តាមផ្លូវច្បាប់។ ជាមួយគ្នានោះ បទល្មើសថ្មីដែលពាក់ព័ន្ធនឹងអំពើជួញដូរមនុស្សឆ្លងដែនគឺពេលពពោះជំនួស និងមេខ្យល់នាំស្ត្រីជាកូនក្រមុំឆ្លងដែនស្វែងរកគូស្រករនៅក្រៅប្រទេសក៏ត្រូវបានរកឃើញទប់ស្កាត់និងបង្ក្រាបបានទាន់ពេលវេលា និងនៅតែបន្តស្រាវជ្រាវបន្ថែមទៀត។ ជាងងឲនេះទៅទៀតក្នុងរយៈពេលកន្លងមកបានបង្កើនការយកចិត្តទុកដាក់សម្របសម្រួលពង្រឹងកិច្ចសហការជាមួយក្រសួងស្ថាប័នជាសមាជិក និងជំរុញសកម្មភាពគណៈកម្មាធិការប្រយុទ្ធប្រឆាំងអំពើជួញដូរមនុស្សរាជធានី-ខេត្ត មន្ទីរ អង្គភាព និងដៃគូជាតិ អន្តរជាតិនានាក៏ដូចជាសមត្ថកិច្ចនៃប្រទេសពាក់ព័ន្ធដើម្បីធ្វើសកម្មភាពនិងកិច្ចសហប្រតិបត្តិការដោះស្រាយបញ្ហារួមគ្នានិងទទួលបានលទ្ធផល ជាច្រើន។
ក្រោមការចង្អុលបង្ហាញរបស់សម្តេចក្រឡាហោម ស ខេង គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស (គ.ជ.ប.ជ) ក៏បានលើកទិសដៅអនុវត្តបន្តសម្រាប់ឆមាសទី២ផងដែរ រួមមាន៖ បន្តពង្រឹងស្ថាប័ន និងពង្រីកកិច្ចសហការទូលំទូលាយរវាងសមាជិកក្នុងក្រុមការងារអន្តរក្រសួង និងគណៈកម្មាធិការថ្នាក់ក្រោមជាតិ ដោយបង្កើនការយកចិត្តទុកដាក់រៀបចំកិច្ចប្រជុំក្រុមការងារជាប្រចាំនិងផ្ដល់របាយការណ៍ មកអគ្គលេខាធិការដ្ឋាន ។ បន្តរៀបចំ និងពន្លឿនការអនុម័តច្បាប់សំខាន់ៗ និងបន្តរៀបចំបទដ្ឋានគតិយុត្តពាក់ព័ន្ធ។ រៀបចំផែនការអនុវត្តផ្អែកលើយុទ្ធសាស្ត្ររួមដែលបានកំណត់ក្នុងផែនការជាតិ។ ពង្រឹងប្រសិទ្ធភាពនៃការដឹកនាំបញ្ជា និងការអនុវត្តនូវវិធានការជាអាទិភាព ដើម្បីប្រយុទ្ធប្រឆាំងអំពើជួញដូរមនុស្សគ្រប់រូបភាព។ ត្រៀមកិច្ចប្រជុំពិគ្រោះយោបល់រវាងក្រុមប្រទេសបញ្ជូន ( កម្ពុជា.ឡាវ.ភូមា) ដើម្បីពង្រឹងកិច្ចសហការដោះស្រាយបញ្ហារួម ។ ត្រៀមកិច្ចប្រជុំបីប្រទេសកម្ពុជា វៀតណាម ចិន ក្នុងការពង្រឹងកិច្ចសហការ ការពារនិងបង្ការទប់ស្កាត់ការនាំចូលមនុស្សឆ្លងដែនខុសច្បាប់ជាពិសេសទារក និងស្ត្រី។ បើកវគ្គបណ្ដុះបណ្ដាលពង្រឹងសមត្ថភាពមន្ត្រីជំនាញពាក់ព័ន្ធ ដល់មន្ត្រីទទួលបន្ទុកអនុវត្តថ្នាក់ក្រោមជាតិ។
បន្តលើកកម្ពស់ការងារផ្សព្វផ្សាយច្បាប់ គោលនយោបាយ និងពង្រឹងការអប់រំតាមគ្រប់រូបភាព និងការប្រើគ្រប់លទ្ធភាព និងធនធាន ដើម្បីលើកកម្ពស់ការយល់ដឹងជាសកលអំពីការជួញដូរមនុស្សការធ្វើអាជីវកម្មផ្លូវភេទ ការកេងប្រវ័ញ្ច កម្លាំងពលកម្ម ទំនាក់ទំនងរវាង ទេសន្តប្រវេសន៍ និងអំពើជួញដូរមនុស្ស និងបទល្មើសពាក់ព័ន្ធដទៃទៀត។ បន្តតាមដានលទ្ធផល និងប្រសិទ្ធភាពនៃការអនុវត្តកិច្ចព្រមព្រៀងទ្វេភាគី ពហុភាគី និងគាំទ្រដល់ការអនុវត្តអនុសញ្ញា និងផែនការអាស៊ានប្រឆាំងការជួញដូរមនុស្ស ដែលសម្ដេចអគ្គមហាសេនាបតីតេជោហ៊ុនសែន បានចុះហត្ថលេខារួមគ្នាកាលពីថ្ងៃទី២១ ខែវិច្ឆិកា ឆ្នាំ ២០១៥។ ជំរុញតាមដានត្រួតពិនិត្យក្រុមហ៊ុនបញ្ជូនពលករទៅធ្វើការនៅក្រៅប្រទេស ឲ្យអនុវត្តតាមគោលនយោបាយរបស់រាជរដ្ឋាភិបាលឲ្យបានត្រឹមត្រូវដើម្បីការពារសុវត្ថិភាព។
បន្តរៀបចំវិធានការគ្រប់គ្រងលំហូរពលករទេសន្តប្រវេសន៍ កការងារឆ្លងដែនមិនប្រក្រតី។ ពង្រឹងប្រព័ន្ធយុត្តិធម៌ព្រហ្មទណ្ឌជាពិសេស ការពង្រឹងកិច្ចសហការក្នុងការជួយគ្នាទៅវិញទៅមកក្នុងវិស័យយុត្តិធម៌ព្រហ្មទណ្ឌជាមួយប្រទេសពាក់ព័ន្ធ។ បន្តអនុវត្ត និងចូលរួមយ៉ាងសកម្មក្នុងការអនុវត្តគោលនយោបាយភូមិ-ឃុំមានសុវត្ថិភាពរបស់រាជរដ្ឋាភិបាល និងការចុះតាមដានអនុវត្តគោលនយោបាយនៅថ្នាក់ក្រោមជាតិ និងពង្រឹងសកម្មភាពទទួលពលករ ការស្រាវជ្រាវទិន្នន័យ និងផ្ដល់សេវាជូនពលករដែលត្រូវបានបញ្ជូនត្រឡប់ពីអាជ្ញាធរបរទេស និងពលករវិលត្រឡប់វិញនៅតាមច្រកព្រំដែនសំខាន់ៗ៕ ដោយ៖កូឡាប
