ក្រុមហ៊ុនបច្ចេកវិទ្យាយក្សចិន Huawei បានជួយកូរ៉េខាងជើងដោយសម្ងាត់ក្នុងការកសាងប្រព័ន្ធទូរស័ព្ទ ដែលវាគឺជាការរំលោភទៅនឹងទណ្ឌកម្ម ដែលដាក់សម្ពាធលើប្រទេសកូរ៉េខាងជើង ឲ្យបញ្ឈប់ការអភិវឌ្ឍអាវុធនុយក្លេអ៊ែរ។ នេះបើតាមសេចក្តីរាយការណ៍របស់កាសែត The Washington Post។
កាសែតខាងលើបានដកស្រងឯកសារបែកធ្លាយដោយអតីតបុគ្គលិក Huawei និងមនុស្សដែលដឹងច្បាស់ពីគម្រោងនោះ ដោយបានរាយការណ៍នៅថ្ងៃចន្ទថា Huawei បានធ្វើកិច្ចការជាមួយនឹងស្ថាប័នបច្ចេកវិទ្យាព័ត៌មានអន្តរជាតិឈ្មោះ Panda ដែលជាស្ថាប័នរដ្ឋចិន លើគម្រោងទូរគមនាគមន៍ជាច្រើននៅក្នុងប្រទេសកូរ៉េខាងជើងសម្រាប់រយៈពេលយ៉ាងតិច ៨ឆ្នាំរហូតមកដល់ឆ្នាំ ២០១៦។
បើតាមឯកសារ កុងត្រ និងឯកសារអេឡិចត្រូនិចដែលផ្តល់ឲ្យកាសែតខាងលើ បានឲ្យដឹងថា ក្រុមហ៊ុន Huawei និងស្ថាប័ន Panda International បានដឹកជញ្ជូនសម្ភារទៅកាន់ប្រទេសកូរ៉េខាងជើង ដើម្បីជួយរបបកុម្មុនិស្តនោះបង្កើតប្រព័ន្ធ 3G។
អ្នកសរសេរម្នាក់របស់ Washington Post បានលើកឡើងថា “ការដែល Huawei ជួយកូរ៉េខាងជើង ទើបធ្វើឲ្យមានប្រជាជនកូរ៉េខាងជើងជាច្រើនប្រើប្រាស់ទូរស័ព្ទ ហើយវាត្រូវធ្វើឡើងយ៉ាងសម្ងាត់។ ពួកគេប្រើប្រាស់ឈ្មោះកូដ ដើម្បីបញ្ជៀសថាពួកគេជាកូរ៉េខាងជើង”។
បើតាមឯកសារបានឲ្យដឹងថា ក្រុមហ៊ុន Huawei បានប្រើប្រាស់លេខកូដ (A9) នៅពេលសំដៅទៅដល់ប្រទេសកូរ៉េខាងជើង។
សូមបញ្ជាក់ថា បច្ចុប្បន្ន ក្រុមហ៊ុន Hauwei កំពុងរងទណ្ឌកម្មរបស់អាមេរិច ដែលរដ្ឋាភិបាលអាមេរិចហាមប្រាមមិនឲ្យក្រុមហ៊ុនអាមេរិចទាំងអស់ធ្វើជំនួញជាមួយនឹង Huawei ទៀតទេដោយបារម្ភពីបញ្ហាសន្តិសុខជាតិ។ ទោះយ៉ាងណា Huawei បានបដិសេធថា ឧបករណ៍របស់ខ្លួនបានប៉ះពាល់ដល់សន្តិសុខជាតិរបស់ប្រទេសប្រើប្រាស់៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN
