ខេត្តកោះកុង៖ បន្ទាប់ពីប្រជាពលរដ្ឋ ខេត្តកោះកុង មានកង្វល់លើបញ្ហាជំនន់ទឹកភ្លៀង ក្នុងរដូវវស្សាឆ្នាំនេះ ហើយនៅគ្រាមូលដ្ឋាននេះ ប្រព័ន្ធលូ អូរ និង ប្រឡាយមេ មានការកកស្ទះខ្លាំង ដោយសារសំរាម និងសំណង់សង់ខុសច្បាប់ និងអាណាធិបតេយ្យនៅក្នុងប្រឡាយ លូ និង អូរបង្ហូរទឹកនោះ។ ពេលនេះ លោក ស្រី មិថុនា ភូថង បានបញ្ជា ឲ្យអាជ្ញាធរស្ថាប័នពាក់ព័ន្ធ ក្រោមឱវាទខេត្តកោះកុង បានចាប់ផ្តើមមានវិធានការក្តៅ ទៅលើបញ្ហាសំណង់អាណាធិបតេយ្យ ដែលកំពុងមានការរីករាលដាលនាមូលដ្ឋានេះ។
ផ្តើមពីបញ្ហានេះ លោកស្រី មិថុនា ភូថង អភិបាល នៃគណៈអភិបាល ខេត្តកោះកុង កាលពីព្រឹកថ្ងៃទី២៤ ខែកក្កដា ឆ្នាំ២០១៩ បានជំរុញឲ្យមន្ត្រីគ្រប់ មន្ទីរ អង្គភាពពាក់ព័ន្ធ និងអាជ្ញាធរក្រុង សង្កាត់ ភូមិ ត្រូវសហការ ចុះអប់រំ ផ្សព្វផ្សាយ ជូនដល់ប្រជាពលរដ្ឋ ឲ្យយល់ដឹងអំពីផលប៉ះពាល់នានា ដែលបណ្តាលមកពីកក់ស្ទះដោយសំរាម និងទប់ស្កាត់ការសាងសង់សំណង់ ដែលរំលោភលើលូ អូរ និងប្រឡាយ ឲ្យបានទាន់ពេលវេលា។
លោកស្រី មិថុនា មានប្រសាសន៍ ក្នុងកិច្ចប្រជុំនៅព្រឹកថ្ងៃទី២៤ កក្កដា ឆ្នាំ២០១៩ថា គ្រប់ ភូមិ ឃុំ សង្កាត់ របស់ក្រុងខេមរភូមិន្ត ត្រូវស្តារប្រឡាយ អូរ ដែលមានស្មៅដុុះជុំជិតត្រូវស្តារឡើងវិញ ដើម្បីជៀសវាងបង្កការកកស្ទះ ដោយជំនន់ទឹកភ្លៀង។
លោកស្រី មិថុនា ភូថង ឲ្យដឹងដូច្នេះ រួចបញ្ជាក់ថា ចំពោះខ្សែបន្ទាត់ផ្លូវមុខរោងកុន ឲ្យមន្ទីរសាធារណការសិក្សាមើល ថាតើគួរបូមលូ ឬជួសជុលរ៉ាហ្គែមួយចំនួន ដែលធ្វើឲ្យចរន្តទឹកហូរ មានការកកស្ទះ និងមួយផ្នែកត្រៀមកសាងប្រព័ន្ធលូមួយថ្មីទៀត ត្រង់ចំណុចក្រោមផ្ទះ លោក ចុង ប៉ន នាឆ្នាំ២០២០ ដែលជាគម្រោងថវិការបស់រដ្ឋបាលខេត្តកោះកុង។
ទាក់ទិនបញ្ហានេះ លោក សុខ សុទ្ធី អភិបាលរង និងជាអ្នកនាំពាក្យសាលាខេត្តកោះកុង បានដឹកនាំមន្ទីរជំនាញ អាជ្ញាធរ បានចុះពិនិត្យនិងស្រង់ទិន្នន័យ ដើម្បីទប់ស្កាត់រាល់សំណង់ ដែលបានសាង់សង់ដោយពុំមានច្បាប់អនុញ្ញាតិត្រឹមត្រូវ ដើម្បីចៀសវាងជួបបញ្ហាកកស្ទះ ទឹកជំនន់ ធ្វើឲ្យជន់លិចដល់តំបន់ក្បែរខាង បង្កឡើងដោយប្រព័ន្ធលូពុំដំណើរការ ត្រង់ចំណុច ភូមិចាំយាម ឃុំបាក់ខ្លង ស្រុកមណ្ឌលសីមា ខេត្តកោះកុង។
ត្រង់ចំណុចទីតាំងនោះ លោក សុខ សុទ្ធី បានព្រមានថា មិនថាសំណង់ដែលសង់រួចរាល់នោះជាសំណង់ របស់រដ្ឋទេ,សំណង់អង្គការក្រៅរដ្ឋាភិបាលឬសំណង់ឯកជននោះទេត្រូវតែមកធ្វើលិខិតស្នើរសុំការសាងសង់ឲ្យបានត្រឹមត្រូវជាមុនសិន។
លោកអភិបាលរងខេត្តកោះកុងបន្តថា បើអាជ្ញាធរឬមន្ត្រីជំនាញរកឃើញថា មានសំណង់ដែលសាងសង់នៅលើដីសាធារណៈ របស់រដ្ឋ និងដីស្ថិតក្នុងតំបន់ហាមឃាត់ មានដូចជាដីបម្រុងជីករ៉ែសួនច្បារដីតំបន់ព្រៃឈើទំនប់ទឹកបុរាណវិទ្យាប្រវត្តិសាស្ត្រចំណីផ្លូវព្រែកបឹងត្រពាំងអូរស្ទឹងឆ្នេរច្រាំងមាត់សមុទ្រពុំមានច្បាប់អនុញ្ញាតិ គឺត្រឹមត្រូវចាំបាច់ខាងអាជ្ញាធរមានសិទ្ធិធ្វើការផ្អាកការសាងសង់ជាបន្ទាន់៕ ដោយ៖ ដែន សីមា