ខេត្តព្រះសីហនុ៖ អភិបាលខេត្តព្រះសីហនុ លោក គួច ចំរើន បានទទួលជួបលោកស្រី អេនជីឡា ខូខូរាន អគ្គរាជទូត នៃស្ថានទូតអូស្ត្រាលី ប្រចាំព្រះរាជាណាចក្រកម្ពុជា ដើម្បីពិភាក្សាលើកិច្ចការងារមួយចំនួន នៅថ្ងៃទី២៤ ខែកក្កដា ឆ្នាំ២០១៩ នាសាលប្រជុំសាលាខេត្តព្រះសីហនុ។
នាឱកាសនោះ លោកស្រី អេនជីឡា ខូខូរាន អគ្គរាជទូត នៃស្ថានទូតអូស្ត្រាលី ប្រចាំព្រះរាជាណាចក្រកម្ពុជាមានប្រសាសន៍ថា ការដឹកនាំប្រតិភូធ្វើទស្សនៈកិច្ចខេត្តព្រះសីហនុលើកនេះ គឺជាលើកទី៣ហើយ។ លោកស្រីបន្តថា ទស្សនកិច្ចលើកនេះ គឺខេត្តព្រះសីហនុ មានការប្រែប្រួលរីកចំរើនយ៉ាងខ្លាំង។
លោកស្រីអគ្គរាជទូត ថ្លែងបន្ត ទន្ទឹមនឹងចង់ដឹងពីការអភិវឌ្ឍរីកចម្រើន យ៉ាងគំហុក ជាពិសេសលើវិស័យសំណង់ លោកស្រីក៏ចង់ដឹងពីការប្រឈម និងចំណុចអទិភាព របស់ខេត្ត និងការអភិវឌ្ឍថ្មីៗ លើគម្រោងសាងសង់ហេដ្ឋារចនាសម្ព័ន្ធ និងការទុកដាក់សំរាមឱ្យមាននិរន្តរភាព។
ឆ្លៀតឱកាសនោះ លោកស្រីអគ្គរាជទូត ថ្លែងបន្តថា ក្នុងនាមស្ថានទូត និងរដ្ឋាភិបាលអូស្ត្រាលី លោកស្រីសូមចូលរួមរំលែកទុក្ខចំពោះប្រជាជនកម្ពុជា ដែលបានរងគ្រោះដោយសារការរលំបាក់អគារនៅខេត្តព្រះសីហនុ កាលពី ខែមិថុនា កន្លងមកថ្មីៗនេះ។
លោកជំទាវបានបញ្ជាក់ថា ដោយមើល ឃើញពីការរីកចម្រើន លើវិស័យសំណង់ ពិសេសស្តង់ដារគុណភាពសំណង់ កន្លងមកលោកស្រី បានជួបលោកស្រី ជា សុផារ៉ា ទេសរដ្ឋមន្ដ្រី រដ្ឋមន្ត្រីក្រសួងដែនដីពិភាក្សាពង្រឹងគុណភាពសំណង់ ដោយយល់ព្រមបង្កើតកម្មវិធីរួមជួយផ្នែកបច្ចេកទេសដល់ក្រសួងដែនដី និងអាជ្ញាធរខេត្តព្រះសីហនុ នឹងដំណើរការសាកល្បងមុនគេនៅខេត្តព្រះសីហនុ។
លោកស្រីបន្តថា ប្រទេសអូស្ត្រាលី និងកម្ពុជា មានទំនាក់ទំនង ៦៥ឆ្នាំ លើកិច្ចសហប្រតិបត្តិការជួយអភិវឌ្ឍ ផ្នែកសន្តិសុខក្នុងតំបន់ វិស័យការពារជាតិ ពាណិជ្ជកម្ម ផ្នែកអភិវឌ្ឍន៍សេដ្ឋកិច្ច ហេដ្ឋារចនាសម្ព័ន្ធ និងដោះមីន ជាដើម។ ហើយថា កម្មវិធីទាំងនេះ ក៏មានក្នុងខេត្តព្រះសីហនុផងដែរ។
លោកស្រី អេនជីឡា ខូខូរាន អគ្គរាជទូត នៃស្ថានទូតអូស្ត្រាលី ប្រចាំព្រះរាជាណាចក្រកម្ពុជា បញ្ជាក់បន្ថែមថា មានគម្រោងសមធម៌ជួយដល់វិស័យសុខាភិបាល គឺជួយដល់មន្ទីរពេទ្យខេត្ត, ជួយក្រសួងផែនការ ក្នុងការកំណត់អត្តសញ្ញាណកម្ម ជួយប្រជាពលរដ្ឋក្រីក្រ និងបានផ្តល់អាហារូបករណ៍ដល់និស្សិត ផ្តល់ជំនួយដល់អង្គការនៅខេត្តព្រះសីហនុ (អង្គការម្លប់តាប៉ាង ) និងគម្រោងជួយកុមារពីការរំលោភបំពាន និងកេងប្រវ័ញ្ច។
លោកស្រីបន្តថា កិច្ចសហប្រតិបត្តិការរបស់សហព័ន្ធអូស្ត្រាលី ជួយលើផ្នែកលិខិតឆ្លងដែន គ្រឿងញៀន ផ្តល់ការហ្វឹកហ្វឺនដល់ប៉ូលីស ជំនួយផ្នែកយោធាដល់មូលដ្ឋានកងទ័ពជើងទឹករាម សង់រោងជាងថែទាំបច្ចេកទេស អគារសម្ភារៈ ជួយដល់គណកម្មការជាតិសន្តិសុខលម្ហសមុទ្រ លើផ្នែកព័ត៌មានវិទ្យា ផ្តល់អគារធ្វើការ និងផ្តល់អគារបណ្តុះបណ្តាលភាសាអង់គ្លេសជាដើម។
ជំនួបនោះដែរ លោក គួច ចំរើន អភិបាលខេត្តព្រះសីហនុ បានថ្លែងអំណរគុណ លោកស្រីអគ្គរាជទូត និងរដ្ឋាភិបាលអូស្ត្រាលី ដែល បានចូលរួមរំលែកទុក្ខប្រជាជនកម្ពុជា និងជួយផ្តល់ជំនួយផ្សេងៗមកដល់ប្រទេសកម្ពុជា។
ឆ្លៀតឱកាសនោះ លោក គួច ចំរើន ក៏បានជំរាបជូន ប្រតិភូទូរអូស្ត្រាលី ពីបញ្ហាប្រឈមមួយចំនួនមានដូចជា៖ ផ្លូវថ្នល់ លូទឹកកខ្វក់ និងអនាម័យ បរិស្ថាន (សំរាម) ។
លោក គួច ចំរើន ថ្លែងថា បច្ចុប្បន្នភាពខេត្តព្រះសីហនុ បានប្រែមុខមាត់ទៅ ជាខេត្តពាណិជ្ជកម្ម ដឹកជញ្ជូន កាស៊ីណូ និងនិងទេសចរណ៍ ដែលតម្រូវឱ្យមានហេដ្ឋារចនាសម្ព័ន្ធនានាល្អម និងមានគុណភាព។
លោកថា ការអភិវឌ្ឍយ៉ាងគំហុក នាខេត្តព្រះសីហនុ បានបង្កឱ្យខូចខាតផ្លូវថ្នល់ និងមានគ្រោះថ្នាក់ចរាចរណ៍ជាច្រើនករណី។ ហើយថា ករណីខាងលើនេះ រដ្ឋបាលខេត្តព្រះសីហនុ បានកៀរគរគ្រប់ស្ថាប័នពាក់ព័ន្ធ និងវិស័យឯកជនចូលរួមកែលម្អបរិស្ថាន និងសោភ័ណភាព ដោយ សារតែកំណើនប្រជាពលរដ្ឋមានការកើនឡើង មកពីបណ្តាខេត្តនានា ក្នុងព្រះរាជាណាចក្រកម្ពុជា មករកស៊ី ទទួលទានតាមសមត្ថភាព។
ម្យ៉ាងទៀត ក្រោយពេលសំណង់ត្រូវបានសាងសង់រួចរាល់ជាស្ថាពរ នៅពេលនោះ ខេត្តព្រះសីហនុ នឹងត្រូវការកម្លាំងពលកម្មកាន់តែច្រើន។ ហើយថា បញ្ហាទឹកកខ្វក់ បរិស្ថានមានបញ្ហាប្រឈម ចាប់ពីពេលនេះ រហូតទៅថ្ងៃអនាគត ចំពោះការគ្រប់គ្រងទឹកកខ្វក់ នឹងត្រូវអនុវត្តទៅតាមបច្ចេកទេសឲ្យបានត្រឹមត្រូវ។
លោក គួច ចំរើន បញ្ជាក់ថា រាល់ថ្ងៃនេះ ខេត្តព្រះសីហនុ មានដំណោះស្រាយ ដោយបានចែក លូទឹកភ្លៀង និងទឹកកខ្វក់ដាច់ដោយឡែកពីគ្នា ហើយក៏បានសាងសង់អាងប្រព្រឹត្តកម្មសាធារណៈ និងវិស័យឯកជនត្រូវចូលរួមជាមួយរដ្ឋបាលខេត្ត-ក្រុងព្រះសីហនុ។
លោកថា កន្លងមកនេះខាងធនាគារ ADB មានគម្រោងជួយលូទឹកភ្លៀង ដើម្បីកាត់បន្ថយទឹកកខ្វក់នៅក្នុងក្រុងផងដែរ។
លោក គួច ចំរើន ឲ្យដឹងដូច្នេះរួចបញ្ជាក់ថា ចំពោះបញ្ហាអនាម័យបរិស្ថាន និងសំរាមវិញ រដ្ឋបាលខេត្ត បានជម្រុញឱ្យក្រុមហ៊ុនប្រមូលសំរាម KSWM បានបង្កើនរថយន្ត និងកម្មករ ក្នុងការប្រមូលសំរាមចេញពីក្រុង ធ្វើយ៉ាងណាឲ្យបានទាន់ពេលវេលា។
លោកអភិបាលបម្តថា ទន្ទឹមគ្នា ខេត្តព្រះសីហនុ មានការរីកចម្រើន ក៏ប៉ុន្តែទន្ទឹមគ្នានេះ ក៏មានផលប៉ះពាល់មួយចំនួនផងដែរ។ ជាពិសេស ប្រជាពលរដ្ឋរស់នៅក្រុងព្រះសីហនុ ទទួលបានផលផ្លែផ្កាពីការវិនិយោ
គយ៉ាងគំហុគនេះផងដែរ។
លោក គួច ចំរើន បញ្ជាក់ថា រដ្ឋធម្មនុញ្ញ នៃព្រះរាជាណាចក្រកម្ពុជា មិនប្រកាន់និន្នាការនយោបាយ មិនថា ចិន អាមេរិក បារាំង ឬប្រទេសណាទេ កម្ពុជានឹងស្វាគមន៍ទទួលយកអ្នកវិនិយោគ និងទេសចរ មកពីគ្រប់ទិសទី នៃពិភពលោក ចូលមកកាន់ខេត្តព្រះសីហនុ ក៏ប៉ុន្តែអ្នកវិនិយោគ និងអ្នកទេសចរ ត្រូវតែគោរពច្បាប់ របស់ប្រទេសកម្ពុជា៕ ដោយ៖ ដែន សីមា
