ប្រទេសកូរ៉េខាងជើងបានធ្វើការបាញ់សាកល្បងមីស៊ីលរយៈចម្ងាយខ្លីចំនួន ២គ្រាប់ចូលក្នុងសមុទ្រជប៉ុន។ នេះបើតាមការបញ្ជាក់ពីប្រទេសកូរ៉េខាងត្បូង។
ការបាញ់សាកល្បងនេះកើតឡើងនៅពេលព្រឹក ថ្ងៃព្រហស្បតិ៍នេះ ហើយមីស៊ីលហោះបានរយៈចម្ងាយ ៤៣០គីឡូម៉ែត្រ និងបានកម្ពស់ ៥០គីឡូម៉ែត្រ មុនពេលវាធ្លាក់ចូលក្នុងសមុទ្រជប៉ុន ឬសមុទ្រខាងកើត។
ការបាញ់សាកល្បងមីស៊ីលនេះកើតឡើង ក្រោយពេលកូរ៉េខាងជើងបានសម្តែងការខឹងសម្បារយ៉ាងខ្លាំង ចំពោះអាមេរិច និងកូរ៉េខាងត្បូងដែលបានប្រកាសពីគម្រោងធ្វើសមយុទ្ធរួមគ្នាឡើងវិញនៅខែក្រោយនេះ។ កូរ៉េខាងជើងព្រមានថា គម្រោងនោះអាចនឹងប៉ះពាល់ដល់ការបន្តការចរចាលើបញ្ហានុយក្លេអ៊ែរ។
មីស៊ីលរបស់កូរ៉េខាងជើងត្រូវបានធ្វើការបាញ់ចេញនៅក្បែរទីក្រុង Wonsan។ ទោះយ៉ាងណា គេមិនទាន់ដឹងច្បាស់នៅឡើយទេថា តើមេដឹកនាំកំពូល គីម ជុងអ៊ុនបានពិនិត្យមើលការបាញ់នោះឬយ៉ាងណាទេ។
រដ្ឋមន្រ្តីការពារជាតិជប៉ុនបានបញ្ជាក់ថា ការបាញ់សាកល្បងនោះមិនដល់ដែនទឹករបស់ជប៉ុននោះទេ ហើយក៏មិនប៉ះពាល់ដល់សន្តិសុខជាតិដែរ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC