ប្រជាជនស្រីលង្ការកំពុងធ្វើការតវ៉ាយ៉ាងខ្លាំងទៅលើការដឹកសំរាមដ៏គ្រោះថ្នាក់មកពីប្រទេសអង់គ្លេស ដែលសំរាមទាំងនោះរួមមានម្ជុលចាក់ថ្នាំ និងបំណែកដែលគេសង្ស័យថារបស់សាកសពមកពីកន្លែងតម្កល់ខ្មោច។
រដ្ឋាភិបាលស្រីលង្ការបានទាមទារឲ្យអង់គ្លេសយកសំរាមចំនួនជាង ១០០កុងតឺន័រត្រឡប់ទៅវិញជាបន្ទាន់ ដែលសំរាមក្នុងកុងតឺន័រនោះ មានកាកសំណល់ជាច្រើនលាយគ្នា ដូចជា ពូក សម្លៀកបំពាក់ និងប្លាស្ទិចជាដើម។
សំរាមជាច្រើនកុងតឺន័រ ត្រូវបានគេជឿជាក់ថា បានដឹកមកពីប្រទេសអង់គ្លេសកាលពីឆ្នាំ ២០១៧ ហើយបើតាមសេចក្តីរាយការណ៍ កុងតឺន័រទាំងនោះ ត្រូវបានគេពិនិត្យកាលពីសប្តាហ៍មុន ក្រោយពេលមន្រ្តីកំពង់ផែត្អូញត្អែថា កុងតឺន័រចំនួន ១១១ ដែលត្រូវបានបោះបង់ចោលដោយអ្នកនាំចូល មានក្លិនអាក្រក់ខ្លាំង។
“វត្ថុធាតុដើមខ្លះបានរលាយទៅដល់ចំណុចមួយដែលពួកយើងមិនអាចពិនិត្យមើលដឹង ហើយវាបញ្ចេញក្លិនដ៏អាក្រក់” នេះបើតាមការបញ្ជាក់របស់អ្នកនាំពាក្យនាយកដ្ឋានគយឈ្មោះ Sunil Jayaratne។
អាជ្ញាធរស្រីលង្ការបញ្ជាក់កាលពីថ្ងៃអង្គារថា ពួកគេបានចាត់វិធានការជាបន្ទាន់ ដើម្បីឲ្យមានការបញ្ជូនសំរាមទាំង ១១១កុងតឺន័រនោះត្រឡប់ទៅវិញ។
នៅថ្ងៃពុធម្សិលមិញនេះ ភ្នាក់ងារបរិស្ថានអង់គ្លេស បានថ្លែងប្រាប់ BBC ថា ខណៈខ្លួនកំពុងធ្វើការស៊ើបអង្កេតឲ្យដឹងពីអ្វីដែលកើតឡើង ខ្លួនមិនទាន់ទទួលបានសំណើរផ្លូវការពីអាជ្ញាធរស្រីលង្ការក្នុងការទទួលយកសំរាមនោះវិញទេ។
អ្នកនាំពាក្យនាយកដ្ឋានគយស្រីលង្ការបញ្ជាក់ថា អ្នកជំនួញស្រីលង្ការម្នាក់ជាអ្នកនាំចូលកុងតឺន័រផ្ទុកសំរាមទាំងនោះ ហើយដូច្នេះគាត់ត្រូវទទួលខុសត្រូវលើការបញ្ជូនត្រឡប់ទៅវិញ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
