តាកែវ៖ លោក កេត ម៉ៅ អភិបាលស្រុកសំរោង បានអនុវត្តធម៌ក្តៅ លេងធ្វើការណែនាំបន្តទៀតហើយ ក្រោយម្ចាស់ទីតាំង នូវតែហ៊ានចាក់ដីរំលោភលើផ្ទៃបឹងបទរកា ដែលជាតំបន់ហាមឃាត់ ជាអាងស្តុបទឹក ខណៈដែលម្ចាស់ទីតាំងនៅខាងក្រោយរោងម៉ាស៊ីនផលិតទឹកកកឈ្មោះ អ៊ី មួយ នោះ ត្រូវបានអាជ្ញាធរស្រុកធ្វើការព្រមាន និងធ្វើកិច្ចសន្យា ៣លើករួចមកហើយ តែមិនស្តាប់ឡើយ ។
ការបញ្ជាឲ្យឃាត់រថយន្ត និងគ្រឿងចាក់ដែលធ្វើសកម្មភាពចាក់ដីចូលក្នុងតំបន់ហាមឃាត់នោះ គឺធ្វើឡើងក្រោមការបញ្ជាផ្ទាល់របស់លោក កេត ម៉ៅ អភិបាលស្រុកសំរោង នៅរសៀលថ្ងៃទី ២៥ ខែកក្កដា ឆ្នាំ២០១៩នេះ ដោយឲ្យកម្លាំងអាវុធហត្ថស្រុក ឃាត់រថយន្តចាក់ដី បាន ១គ្រឿង គ្រឿងចក្រអាប៊ុលរុញ ១គ្រឿង ។
បើតាមសម្តីរបស់បងប្អូនប្រជាពលរដ្ឋដែលរស់នៅជិតខាងក្នុងភូមិព្រៃទទឹង ឃុំសំរោង ស្រុកសំរោង ដែលសូមមិនបញ្ចេញឈ្មោះ បាននិយាយថា ជុំវិញបញ្ហាលួចចាក់ដីលុបបឹងបទរកានេះ គឺបានកើតឡើងតាំងពីជំនាន់អភិបាលស្រុកចាស់លោក ញ៉ែម ស្រស់ មកម្លេះ ដែលបច្ចុប្បន្ននេះ លោកជាអភិបាលស្រុកព្រៃកប្បាស ហើយជំនួសដោយអភិបាលស្រុកថ្មីលោក កេត ម៉ៅ ។ ពលរដ្ឋដដែលបាននិយាយទៀតថា ដីដែលចាក់លុបយកបឹងបទរកានេះ មិនមែនរាប់រយឡានដូចគេនិយាយនោះទេ គឺរាប់ពាន់ឡានឯណ្ណោះ ព្រោះបឹងមានជម្រៅជ្រៅ ហើយបានធ្វើសកម្មភាពចាក់លុបបឹងបានជាធម្មតា មិនដឹងជាគាត់មានខ្សែថ្នាក់ណានោះទេទើបបានជាហ៊ានបែបនេះ ។
ក្នុងនោះដែរលោក ខាន់ សុខា អភិបាលរងខេត្តតាកែវ បានបញ្ជាក់យ៉ាងច្បាស់ថា អ្នកដែលហ៊ានចាក់ដីរំលោភបំពានលើអាងស្តុបទឹក និងបំពានលើសេចក្តីណែនាំរបស់អាជ្ញាធរនោះ គឺយើងនឹងអនុវត្តន៍តាមនីតិវិធី ដោយគ្មានការយោគយល់ឡើយ និងឃាត់យករថយន្តដែលជាមធ្យោបាយដឹកដី និងគ្រឿងចាក់នោះយកមករក្សាទុក ធ្វើការផាកពិន័យទៅតាមគោលការណ៍ណែនាំ ចំណែកម្ចាស់ដីដែលហ៊ានបំពាននោះ ចាក់នៅត្រង់ណា ចូលតំបន់ហាមឃាត់ប៉ុន្មានម៉ែត្រ គឺត្រូវកាយចេញវិញប៉ុណ្ណឹង ហើយនិងចាត់ការតាមនីតិវិធីផងដែរ ៕ដោយ៖ តាកែវ