លោកកិត្តិនីតិកោសល្យបណ្ឌិត ប៉ែន បញ្ញា ប្រធានគណៈកម្មការនីតិកម្ម និងយុត្តិធម៌ នៃរដ្ឋសភា និងជាប្រធានអនុគណៈកម្មការទី១៖ ខ្លឹមសារ និងឯកសារ នៃកិច្ចប្រជុំភាពជាដៃគូសភាអាស៊ី-អឺរ៉ុប លើកទី១១ បានមានប្រសាសន៍ថា រដ្ឋសភាកម្ពុជានៅក្នុងនីតិកាលទី៦ បានកំពុងបន្តពង្រឹង និងពង្រីកទំនាក់ទំនងការទូតសភា តាមរយៈសកម្មភាព ចូលរួមក្នុងវេទិកាសភាអន្តរជាតិនានា សំដៅរួមចំណែកលើកកម្ពស់ការថែរក្សាសន្តិភាព ស្ថិរភាព និងការអភិវឌ្ឍនៅក្នុងក្របខ័ណ្ឌតំបន់ និងសកលលោក។ ជាក់ស្តែងនៅឆ្នាំ២០២០ខាងមុខ សភាកម្ពុជានឹងទទួលធ្វើជាម្ចាស់ផ្ទះកិច្ចប្រជុំភាពជា ដៃគូសភាអាស៊ី-អឺរ៉ុប លើកទី១១ ហៅកាត់ថា (ASEP-11)។
លោកកិត្តិនីតិកោសល្យបណ្ឌិត បានមានប្រសាសន៍បែបនេះ នាព្រឹកថ្ងៃទី២៥ ខែកក្កដា ឆ្នាំ២០១៩ នៅវិមានរដ្ឋសភា នៅក្នុងឱកាសដឹកនាំកិច្ចប្រជុំ ក្រុមការងារបច្ចេកទេស ដើម្បីពិនិត្យ និងសម្រេចលើខ្លឹមសារមូលបទ សម្រាប់កិច្ចប្រជុំភាពជាដៃគូសភាអាស៊ី-អឺរ៉ុប លើកទី១១ ដើម្បីដាក់ជូនថ្នាក់ដឹកនាំ ពិនិត្យ និងសម្រេច។
មូលបទដែលបានជ្រើសរើសនាពេលនេះគឺ ពង្រឹងភាពជាដៃគូដើម្បីការអភិវឌ្ឍប្រកបដោយចីរភាព។ លោកកិត្តិនីតិកោសល្យបណ្ឌិត ប៉ែន បញ្ញា មានប្រសាសន៍ទៀតថា ក្រុមការងារបច្ចេកទេសតាមជំនាញនីមួយៗ ត្រូវខិតខំស្រាវជ្រាវឯកសារ ត្រូវបង្កើនកិច្ចសហប្រតិបត្តិការជាមួយគ្នាឲ្យបានល្អប្រសើរ ទាំងក្នុងកម្រិតថ្នាក់ដឹកនាំ និងមន្ត្រីបច្ចេកទេស នៃអគ្គលេខាធិការដ្ឋានរដ្ឋសភា។ លោកកិត្តិនីតិកោសល្យបណ្ឌិត សង្ឃឹមថា គ្រប់ផ្នែកពាក់ព័ន្ធទាំងអស់ នឹងរួមសហការគ្នាត្រៀមលក្ខណៈគ្រប់បែបយ៉ាង ដើម្បីធ្វើយ៉ាងណាឲ្យ ដំណើរការនៃការរៀបចំកិច្ចប្រជុំភាពជាដៃគូសភាអាស៊ី-អឺរ៉ុប លើកទី១១ (ASEP-11) ដែលសភាកម្ពុជាទទួលធ្វើជាម្ចាស់ផ្ទះ ទទួលបានជោគជ័យ ដើម្បីលើកកម្ពស់កិត្យានុភាពសភាកម្ពុជា។ លោកកិត្តិនីតិកោសល្យបណ្ឌិត ប៉ែន បញ្ញា បានមានប្រសាសន៍ទៀតថា ដើម្បីត្រៀមរៀបចំកិច្ចប្រជុំភាពជាដៃគូសភាអាស៊ី-អឺរ៉ុប លើកទី១១ ឲ្យទទួលបានលទ្ធផលល្អតាមការរំពឹងទុក ថ្នាក់ដឹកនាំរដ្ឋសភា និងព្រឹទ្ធសភា បានសម្រេចបង្កើតគណៈកម្មការ អនុគណៈកម្មការ និងលេខាធិការដ្ឋាន ជាតិ ASEP11 សម្រាប់រៀបចំកិច្ចប្រជុំនេះ និងបានផ្សព្វផ្សាយផ្តើមដំណើរការងាររបស់ខ្លួនជាផ្លូវការចាប់ពីពេលនេះទៅ៕ ដោយ៖កូឡាប