ក្រចេះ៖ លោកអេង ហ៊ី បានផ្សាយព័ត៌មានលើផេកហ្វេសប៊ុកថា នៅវេលាម៉ោង ១៤:២០ នាទី ថ្ងៃទី២៥ ខែកក្កដា ឆ្នាំ២០១៩ ក្រុមការងារបង្ក្រាបបទល្មើសធនធានធម្មជាតិ ដឹកនាំដោយលោក ឧត្តមសេនីយ៍ត្រី សាន្ដ ប៊ុនថាន មេបញ្ជាការកងរាជអាវុធហត្ថខេត្តក្រចេះ បានធ្វើការដុតបំផ្លាញចោលវត្ថុតាងចាប់យក (រថយន្ដទូរីសកែច្នៃសម្រាប់ដឹកជញ្ជូនឈើ) ចំនួន៤គ្រឿង នៅចំណុចនិយាការ (617800-1386021) ស្ថិតក្នុងភូមិបន្ទាយ ឃុំគោលាប់ ស្រុកចិត្របុរី ខេត្តក្រចេះ ដែលក្រុមការងារបង្ក្រាប បាន៖
១.ថ្ងៃទី២១ ខែកក្កដា ឆ្នាំ២០១៩ ស្ថិតនៅភូមិសណ្តាន់ ឃុំសណ្តាន់ ស្រុកសំបូរ ខេត្តក្រចេះ។
២.ថ្ងៃទី២៣ ខែកក្កដា ឆ្នាំ២០១៩ ស្ថិតនៅភូមិអូរព្រះ ឃុំអូរគ្រៀង ស្រុកសំបូរ ខេត្តក្រចេះ។
៣.ថ្ងៃទី២៤ ខែកក្កដា ឆ្នាំ២០១៩ ស្ថិតនៅភូមិក្រញូងសែនជ័យ ឃុំក្រញូងសែនជ័យ ស្រុកស្នួល ខេត្តក្រចេះ និងស្ថិតនៅភូមិរកាកណ្តាល២ សង្កាត់រកាកណ្តាល ក្រុងក្រចេះ ខេត្តក្រចេះ។
ចំណែក នៅវេលាម៉ោង០៩ និង ៣៤ នាទី ថ្ងៃទី២៥ ខែកក្កដា ឆ្នាំ២០១៩ កម្លាំងអាវុធហត្ថខេត្តពោធិ៍សាត់ កម្លាំងអាវុធហត្ថស្រុកវាលវែង ដឹកដោយលោក វរសេនីយ៍ទោ ឡាយ វិទូ មេបញ្ជាការរង កងរាជអាវុធហត្ថ ខេត្តពោធិ៍សាត់ បានចុះបង្ក្រាបបទល្មើសព្រៃឈើនៅភូមិចំការជ្រៃខាងត្បូង និង កណ្ដាល ឃុំអន្លង់រាប ស្រុកវាលវែង ខេត្តពោធិ៍សាត់ ដោយបានរឹបអូសរថយន្តរ៉េវ (បាកុង) កែច្នៃដឹកឈើសម្រាប់ដឹកឈើ ចំនួន ០២ គ្រឿង និងបានធ្វើការដុតចោលនៅនឹងកន្លែង ។
ចំពោះលទ្ធផលយុទ្ធនាការទប់ស្កាត់និងបង្ក្រាបបទល្មើសព្រៃឈើ និងការទន្ទ្រានដីរដ្ឋ នៅថ្ងៃទី២៥ ខែកក្កដា ឆ្នាំ២០១៩គឺ
១_ បង្ក្រាបបទល្មើសព្រៃឈើ : ០៤ លើក ចាប់យកបានគោយន្ត ០៧គ្រឿង បំផ្លាញចោលរថយន្តកែច្នៃ ០៤គ្រឿង ឌីណាម៉ូ ០២គីឡូ តាប ០៣គ្រឿង ចាប់យកឈើល្មើសចម្រុះចំនួន ៧៨ដើម, ឈើក្រឡឹង ១១០ដើម, ឈើមិនទាន់វាស់វែង។ ប្រតិបត្តិការដោយមានកិច្ចសហការពីកងកម្លាំងអាវុធហត្ថខេត្តកំពង់ធំ សហការ, ក្រចេះ ព្រះវិហារ។ ចំណែកឯ នៅកោះញែក ខេត្តមណ្ឌលគិរី ក្នុងក្រុមហ៊ុនប៉ាស៊ីហ្វិច កម្លាំងបានរកឃើញឈើល្មើសចំនួនប្រមាណជាង៣០០០ម៉ែត្រគីម(កំពុងវាស់វែង)។
២_សកម្មភាពត្រួតពិនិត្យទីតាំងសិប្បកម្មកែច្នៃឈើ : ០៥ លើក មានច្បាប់ ១៣ទីតាំង, អត់ច្បាប់ ១៨ទីតាំង ។ប្រតិបត្តិការដោយមានកិច្ចសហការពីកងកម្លាំងអាវុធហត្ថខេត្ត កំពង់ស្ពឺ កំពង់ធំ រតនគីរី ព្រះវិហារ និងខេត្តបន្ទាយមានជ័យ ។
៣_បង្ក្រាបករណីទន្ទ្រានដីខុសច្បាប់ : ០១ លើក ចាប់យកបានអេស្កាវ៉ាទ័រ ០៣គ,រថយន្ត ០១គ្រឿង នៅខេត្តកោះកុង ៕ ដោយ៖កូឡាប
