លោកស្រី ដាំ ដារីនី រដ្ឋលេខាធិការក្រសួងការពារជាតិបានក្រើនរម្លឹកឱ្យកងទ័ពទាំងអស់បន្តលើកកំពស់សមត្ថភាពចំណេះដឹងគ្រប់ផ្នែក និងចូលរួមអោយបានច្រើន ក្នុងការប្រឆាំងនឹងព័ត៌មានក្លែងក្លាយ ដែលមានចេតនា បំផ្លាញនូវសុខសន្តិភាព ស្ថេរភាព ដែលយើងកំពុងមានសព្វថ្ងៃនេះ។
លោកស្រីដាំ ដារីនី រដ្ឋលេខាធិការ និងជាប្រធានក្រុមការងារយេនឌ័រក្រសួងការពារជាតិ អញ្ជើញជាអធិបតីភាព ក្នុងពិធីផ្សព្វផ្សាយអនុសាសន៍១១ចំណុចរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងផែនការយុទ្ធសាស្ត្របញ្ជ្រាបយេនឌ័រឆ្នាំ២០១៦-២០២០ របស់ក្រសួងការពារជាតិ នៅបញ្ជាការដ្ឋានអង្គរក្ស ដែលមានចំនួនសិក្ខាកាមចូលរួមសរុបចំនួន ១៥១៧នាក់ នារីចំនួន ៣៤នាក នៅថ្ងៃទី២៥ ខែកក្កដា ឆ្នាំ២០១៩ ។
លោកស្រី ដាំ ដារីនី បន្តថា កងទ័ពទាំងអស់ គប្បីត្រូវខិតខំបន្តរៀនសូត្រលើកកំពស់សមត្ថភាព ចំណេះដឹង គ្រប់ផ្នែក ស្តាប់បទបង្ហាញអំពីវឌ្ឍនភាពលើវិស័យការពារជាតិ និងសមិទ្ធផលរីកចម្រើននានាដែលមានការចូលរួមយ៉ាងសកម្មពីស្ត្រី ជាពិសេសរួមគ្នាទប់ស្កាត់បទល្មើស ប្រឆាំងព័ត៌មានក្លែងក្លាយដែលបំពុលមួលបង្កាច់ថ្នាក់ដឹកនាំរាជរដ្ឋាភិបាល ដែលចោទថា កម្ពុជាបានលួចចុះហត្ថលេខាជាសម្ងាត់ អនុញ្ញាតឲ្យចិនដាក់មូលដ្ឋានកងទ័ពនៅកម្ពុជា។លោកជំទាវ បន្តថា បញ្ហានេះ ប្រមុខរាជរដ្ឋាភិបាលលោកបានច្រានចោលរួចមកហើយ ថាជាព័ត៌មាន ដ៏អាក្រក់បំផុតដែលប្រឆាំងកម្ពុជា។ក្នុងន័យនេះលោកស្រី ក៏សូមឲ្យកងទ័ពទាំងអស់ចូលរួមឲ្យបានច្រើន ក្នុងការទប់ស្កាត់ប្រឆាំងនឹងព័ត៌មានក្លែងក្លាយបែបនេះ ហើយប្រមូលនូវបញ្ញាញាណឯកភាព សាមគ្គីជាតិយើង រួមគ្នាទប់ស្កាត់និងខិតខំការពារជាតិដោយស្មោះត្រង់។
ទាក់ទិនអនុសាសន៍១១ចំណុច របស់តេជោ លោកស្រី បញ្ជាក់ថា គ្រប់ក្រសួង ស្ថាប័នទាំងអស់ត្រូវធ្វើយ៉ាងណាលើកកម្ពស់សមភាពយេនឌ័រ រវាងបុរស និងនារី មិនថាតួនាទី ភារកិច្ចការងារ ការចូលរួមយោបល់ និងការធ្វើសេចក្តីសម្រេចចិត្ត។ ដោយជួយជំរុញឱ្យស្ត្រីមានឋានៈនិងតួនាទីដូចជាបុរសដែរស្របតាមគោលនយោបាយរបស់រាជរដ្ឋាភិបាលកម្ពុជា។ ក្រសួងការពារជាតិ បានរៀបចំផែនការយុទ្ធសាស្ត្របញ្ជ្រាបយេនឌ័ររយៈពេល០៥ឆ្នាំ២០១៦-២០២០ ក្នុងគោលបំណង ដើម្បីចូលរួមចំណែកលើកិច្ចខិតខំប្រឹងប្រែងរបស់រាជរដ្ឋាភិបាលកម្ពុជាក្នុងការលើកកម្ពស់សមភាពយេនឌ័រនិង ផ្តល់ភាពអង់អាចដល់ស្ត្រី។ ផែនការយុទ្ធសាស្ត្រនេះបានបង្ហាញនូវទស្សនៈវិស័យសម្រាប់រយៈពេល០៥ឆ្នាំខាងមុខ ដោយផ្តោតសំខាន់លើការពង្រឹងសមត្ថភាព ផ្តល់ភាពអង់អាចដល់ស្ត្រីក្នុងកងយោធពលខេមរភូមិន្ទ ដោយធ្វើឱ្យស្ថានភាពស្ត្រីកាន់តែមានភាពប្រសើរឡើងដើម្បីបំពេញតួនាទីរបស់ខ្លួនក្នុងស្មារតីទទួលខុសត្រូវលើកិច្ចការពារជាតិ មាតុភូមិ និងការបំពេញភារកិច្ចអន្តរជាតិ។ ក្រសួងការពារជាតិតែងតែយកចិត្តទុកដាក់លើការងារបញ្ជ្រាបយេនឌ័រ ចាប់ពីថ្នាក់ក្រសួងរហូតដល់គ្រប់កង ឯកភាពទូទាំងកងយោធពលខេមរភូមិន្ទ លើកកម្ពស់ការងារហ្វឹកហ្វឺន ការបណ្តុះបណ្តាល វគ្គជំនាញបំប៉នផ្សេងៗ ទាំងក្នុងនិងក្រៅប្រទេស ជាពិសេសយកចិត្តទុកដាក់ដល់យុទ្ធនារីក្នុងការចូលរួមបំពេញបេសកកម្មរក្សាសន្តិភាពសកលលោកក្រោមឆ័ត្រអង្គការសហប្រជាជាតិ បន្តផ្សព្វផ្សាយច្បាប់ និងលិខិតបទដ្ឋានគតិយុត្តិនានាសំដៅលើកកម្ពស់សិទ្ធិស្ត្រីតាមរយៈការកាត់បន្ថយនូវគម្លាតយេនឌ័រ និងការទទួលបានផលប្រយោជន៍ស្មើភាពគ្នារវាងបុរស និងស្ត្រី៕ ដោយ៖បញ្ញាស័ក្តិ