ប្រទេសកូរ៉េខាងជើងបាននិយាយថា ការបាញ់មីស៊ីលចំនួន ២គ្រាប់កាលពីព្រឹកថ្ងៃព្រហស្បតិ៍ ទៅកាន់សមុទ្រខាងកើត គឺជាគោលបំណងរបស់ខ្លួនដើម្បីព្រមានដល់ប្រទេសកូរ៉េខាងត្បូង។
បើតាមប្រព័ន្ធផ្សព្វផ្សាយរបស់រដ្ឋកូរ៉េខាងជើង KCNAបានឲ្យដឹងថា ការបាញ់នោះគឺត្រូវបានរៀបចំឡើយដោយផ្ទាល់ពីមេដឹកនាំ គីម ជុងអ៊ុន ដែលជាផ្នែកមួយក្នុងការបង្ហាញអំណាច ដើម្បីផ្ញើសារព្រមានទៅកាន់យោធាកូរ៉េខាងត្បូង។
សេចក្តីរាយការណ៍របស់ KCNA បានចោទប្រកាន់យោធាកូរ៉េខាងត្បូងថា ធ្វើសមយុទ្ធយោធាដោយមិនខ្វល់ទៅនឹងការព្រមានរបស់កូរ៉េខាងជើង។
អាមេរិច និងកូរ៉េខាងត្បូងគ្រោងធ្វើសមយុទ្ធយោធារួមគ្នាឡើងវិញ នៅខែក្រោយ។ កូរ៉េខាងជើងតែងតែថ្កោលទោសសមយុទ្ធរួមគ្នារវាងអាមេរិច និងកូរ៉េខាងត្បូង និងបានចាត់ទុកវាថា គឺជាហ្វឹកហាត់សមដើម្បីត្រៀមឈ្លានពានកូរ៉េខាងជើង។
កន្លងមក អាមេរិច និងកូរ៉េខាងត្បូងបានធ្វើការផ្អាកសមយុទ្ធជាច្រើនដើម្បីកាត់បន្ថយភាពតានតឹងជាមួយនឹងកូរ៉េខាងជើង ប៉ុន្តែកាលពីសប្តាហ៍មុន ពួកគេប្រកាសពីគម្រោងធ្វើសមយុទ្ធរួមគ្នាឡើងវិញ។
សូមបញ្ជាក់ថា កូរ៉េខាងត្បូង បាននិយាយរួមមកហើយថា ខ្លួនបានចាត់ទុកការបាញ់សាកល្បងមីស៊ីលរបស់កូរ៉េខាងជើង គឺជាការគំរាមកំហែងផ្នែកយោធា និងជាការបំផ្លាញស្ថេរភាពនៅឧបទ្វីប៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN
