សមាជិកសភាឥណ្ឌូណេស៊ី បានអនុម័តជាឯកច្ឆន្ធ ដើម្បីផ្តល់ការលើកលែងទោសដល់ស្រ្តីឥណ្ឌូណេស៊ីម្នាក់ ដែលត្រូវតុលាការកាត់ទោសឲ្យជាប់គុករយៈពេល ៦ខែ ដោយសារនាងបានថតសំឡេងថៅកែនិយាយបំពានផ្លូវភេទនាង។
សភាតំណាងរាស្រ្តឥណ្ឌូណេស៊ី នៅថ្ងៃព្រហស្បតិ៍ម្សិលមិញ បានសម្រេចថា ប្រធានាធិបតី Joko Widodo នឹងធ្វើការលើកលែងទោសដល់ស្រ្តីឈ្មោះ Baiq Nuril Maknun។ នេះបើតាមភ្នាក់ងាររបស់ CNN ប្រចាំឥណ្ឌូណេស៊ី។
មុនពេលមានការសម្រេចចិត្ត អនុប្រធានគណៈកម្មការទី៣ នៃសភាតំណាងរាស្រ្តបានថ្លែងប្រាប់សមាជិកសភាទាំងអស់ថា អ្នកស្រីមើលឃើញស្រ្តីនោះជាជនរងគ្រោះ មិនមែនជនប្រព្រឹត្តខុសនោះទេ។
ការលើកលែងទោសបានកើតឡើង ក្រោយពេលប្រធានាធិបតី Joko Widodo បានថ្លែងកាលពីសប្តាហ៍មុនថា គាត់នឹងប្រើប្រាស់អំណាចរបស់គាត់ ដើម្បីផ្តល់ការលើកលែងទោសដល់ Baiq Nuril Maknun អោយលឿនតាមតែអាចធ្វើបាន។
សូមរំលឹកថា ករណីរបស់ស្រ្តី Baiq Nuril Maknun បានធ្វើឲ្យច្បាប់ហឹង្សាផ្លូវភេទរបស់ឥណ្ឌូណេស៊ី កំពុងស្ថិតក្រោមការពិនិត្យឡើងវិញ ចំណែកក្រុមសិទ្ធិមនុស្សបាននិយាយថា ប្រព័ន្ធច្បាប់មូលដ្ឋានមិនល្អរបស់ឥណ្ឌូណេស៊ី បានបង្កការលំបាកដល់ស្រ្តីដែលរងការបំពានផ្លូវភេទ ក្នុងការស្វែងរកយុត្តិធម៌៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN