កំពង់ស្ពឺ៖ បើតាម Royal du Cambodge បានផ្សាយថា នាវេលាព្រឹកថៃ្ងទី២៦ ខែកក្កដា ឆ្នាំ២០១៩ ព្រះករុណាជាអម្ចាស់ជីវិតលើត្បូង ព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ក្នុងព្រះរាជហឫទ័យទុកដាក់ខ្ពស់ចំពោះសុខទុក្ខប្រជានុរាស្រ្ត ព្រះអង្គសព្វព្រះរាជហឫទ័យស្ដេចយាងចុះសំណោះសំណាលសាកសួរសុខទុក្ខ និងប្រោសព្រះរាជទានព្រះរាជអំណោយជូនដល់ប្រជាកសិករក្រីក្រ នៅភូមិតានក ឃុំភក្កី ស្រុកបរសេដ្ឋ ខេត្តកំពង់ស្ពឺ ចំនួន ៤៣៨គ្រួសារ និងសិស្សានុសិស្ស លោកគ្រូ អ្នកគ្រូ ចំនួន ៣៧៩នាក់។
ព្រះរាជអំណោយដែលព្រះអង្គប្រទានដល់ប្រជានុរាស្រ្តទាំង ៤៣៨គ្រួសារ ក្នុងមួយគ្រួសារៗទទួលបាន អង្ករ ៥០គីឡូក្រាម ឃីត ១កញ្ចប់ (មានមុង១ ភួយ១ សារុង១ និងក្រមា១) តង់កៅស៊ូ១ផ្ទាំង មី ១កេស ត្រីខ ១០កំប៉ុង ស្បែកជើងផ្ទាត់១គូរ អាវយឺតមានស្លាកព្រះរាជអំណោយ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ចំនួន ១ និងថវិកា ១០ម៉ឺនរៀល ៕ ដោយ៖កូឡាប
