រដ្ឋមន្រ្តីការបរទេសអាមេរិច លោក Mike Pompeo បានថ្លែងក្នុងកិច្ចសម្ភាសន៍តាមទូរទស្សន៍ម្សិលមិញថា លោកនឹងទៅអ៊ីរ៉ងដើម្បីចរចា ប្រសិនជាចាំបាច់។ ការថ្លែងរបស់លោកកើតឡើង ក្រោយភាពតានតឹងកំពុងតែក្តៅខ្លាំង។
នៅពេលសួរថាតើលោកមានឆន្ទៈទៅអ៊ីរ៉ងទេ លោកបានថ្លែងថា “ពិតប្រាកដ ប្រសិនជាមានការហៅ ខ្ញុំរីករាយនឹងទៅទីនោះ។ ខ្ញុំនឹងស្វាគមន៍ឱកាសដើម្បីនិយាយគ្នាដោយផ្ទាល់ជាមួយប្រជាជនអ៊ីរ៉ង”។
ភាពតានតឹងរវាងទីក្រុងវ៉ាស៊ីនតោន និងតេហេរ៉ងកើតឡើងកាលពីឆ្នាំមុន នៅពេលប្រធានាធិបតី ដូណាល់ ត្រាំ បានប្រកាសដកអាមេរិចចេញពីកិច្ចព្រមព្រៀងនុយក្លេអ៊ែរ និងបានបន្តដាក់ទណ្ឌកម្មប្រឆាំងអ៊ីរ៉ង។
ទំនាក់ទំនងរវាងមហាអំណាចនុយក្លេអ៊ែរទាំងពីរកាន់តែល្អកកករថែមទៀត ក្នុងរយៈពេលថ្មីៗនេះ បន្ទាប់ពីមានការវាយប្រហាររបស់អ៊ីរ៉ងទៅលើកប៉ាល់ដឹកប្រេងនៅច្រកសមុទ្រ Hormuz ក្បែរសមុទ្រអ៊ីរ៉ង។
កាលពីថ្ងៃពុធកន្លងទៅនេះដែរ អ៊ីរ៉ងបានធ្វើការបាញ់សាកល្បងមីស៊ីលរយៈចម្ងាយមធ្យម ដែលមីស៊ីលនោះហោះបានប្រហែល ១.០០០គីឡូម៉ែត្រ។ នេះបើតាមការបញ្ជាក់របស់មន្រ្តីការពារជាតិអាមេរិច។ ការបាញ់សាកល្បងនោះមិនធ្វើឲ្យមានការគំរាមកំហែងដល់កប៉ាល់ ឬយោធាអាមេរិចនៅក្នុងតំបន់នោះទេ។
លោកដូណាល់ ត្រាំ និងមេដឹកនាំអ៊ីរ៉ង បាននិយាយជាសាធារណៈថា កិច្ចចរចាអាចកើតមានឡើង ទោះបីជាភាគីនីមួយៗមានលក្ខខណ្ឌខុសគ្នាសម្រាប់ការចរចាក៏ដោយ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia