ភ្នំពេញ៖ ក្រសួងទេសចរណ៍នៅថ្ងៃទី២៦ ខែកក្កដា ឆ្នាំ២០១៩ បានផ្សាយលើផេកហ្វេសប៊ុកផ្លូវការថា តាមរាយការណ៍របស់ក្រសួងទេសចរណ៍ បានឱ្យដឹងថា រយៈពេល៥ខែ ឆ្នាំ២០១៩ កម្ពុជាទទួលបានភ្ញៀវទេសចរអន្តរជាតិចំនួន ២.៨៨៨.៤៦១នាក់ កើនឡើង ១១,៤% បើធៀបនឹងរយៈពេលដូចគ្នានៅឆ្នាំ២០១៨ ប៉ុន្តែភ្ញៀវទេសចរអន្តរជាតិ ចូលតាមអាកាសយានដ្ឋានអន្តរជាតិសៀមរាប មានការធ្លាក់ចុះ។
ក្នុងចំណោមភ្ញៀវទេសចរអន្តរជាតិ ដែលមកទស្សនាកម្ពុជាទាំងនោះ រួមមាន ១) ចូលតាមផ្លូវអាកាសចំនួន ២.០១៨.៩៣៥នាក់ កើនឡើង ១៦,៩% ក្នុងនោះចូលតាមច្រកភ្នំពេញចំនួន ៩២៣.៧៧១នាក់ កើនឡើង១៧,៦% តាមច្រកសៀមរាបចំនួន ៨៤៦.២៦៧នាក់ ថយចុះ ៤,៥% និងតាមច្រកកងកេងចំនួន ២៤៨.៨៩៧នាក់ កើនឡើង ៣៤៤,៩%។ ២) ចូលតាមផ្លូវគោកចំនួន ៧៨៥.៧៧៤នាក់ ថយចុះ ១,១%។ ៣) ចូលតាមផ្លូវទឹកចំនួន ៨៣.៧៥២នាក់ កើនឡើង ១៥,៤%។
របាយការណ៍បានបញ្ជាក់អំពីស្ថិតិទេសចរអន្តរជាតិ ក្នុងខែឧសភា ឆ្នាំ២០១៩ មានចំនួន ៤៧២.៨៥២នាក់ កើនឡើង ១២,៨% បើធៀបនឹងខែឧសភា ឆ្នាំ២០១៨៕ ដោយ៖បញ្ញាស័ក្តិ