តាកែវ៖ថ្លែងនៅក្នុងសន្និបាតបូកសរុប វាយតម្លៃសភាពការណ៍ និងលទ្ធផលកិច្ចសហប្រតិបត្តិការរក្សា សន្តិសុខសណ្តាប់ធ្នាប់ រយៈពេល ៦ខែដើមឆ្នាំ ២០១៩ និងលើកទិសដៅសហប្រតិបត្តិការ រវាងនគរបាលខេត្តអាងយ៉ាង ប្រទេសវៀតណាម និងនគរបាលខេត្តតាកែវ នគរបាលខេត្តកណ្តាល ព្រះរាជាណាចក្រកម្ពុជា នៅសាលប្រជុំនៃស្នងការនគរបាលខេត្តតាកែវ នាថ្ងៃទី ២៦ ខែកក្កដា ឆ្នាំ២០១៩នេះ ស្នងការនគរបាលខេត្តទាំងបី ខេត្តតាកែវ ខេត្តកណ្តាល និងខេត្តអានយ៉ាង បានឯកភាពគ្នាលើកិច្ចសហប្រតិបត្តិការ ដែលបានអនុវត្តន៍កន្លងមកនេះ។
ហើយក្នុងនោះ ស្នងការនគរបាលខេត្តទាំង ៣ បានលើកទិសដៅសម្រាប់អនុវត្តន៍បន្តលើយន្តការចំនួន ៨ចំណុចសំខាន់បន្ថែមទៀត ដែលត្រូវអនុវត្តន៍បន្ត ក្នុងនោះ
ចំណុចទី០១ បន្តអនុវត្តន៍ឲ្យមានប្រសិទ្ធភាព តាមផែនការសហប្រតិបត្តិការប្រចាំឆ្នាំ រវាងក្រសួងមហាផ្ទៃ និងក្រសួងនគរបាលវៀតណាម ដែលថ្នាក់ដឹកនាំក្រសួងទាំងពីរជាហត្ថលេខី ។ ចំណុចទី ០២ ត្រូវផ្លាស់ប្តូរព័ត៌មានអំពីសភាពការណ៍ពាក់ព័ន្ធដល់ការងារបង្ក្រាប បទល្មើស ធានាសន្តិសុខ សណ្តាប់ធ្នាប់តាមខ្សែបន្ទាត់ព្រំដែន សកម្មភាពភេរវកម្ម បទល្មើសឆ្លងដែន បទល្មើសគ្រឿងញៀន និងបទល្មើសជួញដូរមនុស្ស ឲ្យបានរហ័ស។ ចំណុចទី០៣ បន្តកិច្ចសហប្រតិបត្តិការតស៊ូ បង្ការ និងបង្ក្រាបបទល្មើសព្រហ្មទណ្ឌការជួញដូរអាវុធជាតិផ្ទុះ បទល្មើសសេដ្ឋកិច្ច និងបទល្មើសផ្សេងៗទៀត ដែលធ្វើសកម្មភាពឆ្លងកាត់តំបន់ព្រំដែនទាំង ៣ ។ ចំណុចទី ០៤ បន្តអនុវត្តន៍ឲ្យមានប្រសិទ្ធភាពតាមការចង្អុលបង្ហាញរបស់ថ្នាក់ដឹកនាំ នៃភាគីទាំងពីរក្នុងកិច្ចដំណើរការចំណុចខ្ពស់ ។ ចំណុចទី ០៥ បន្តជំរុញវិធានការអប់រំណែនាំប្រជាពលរដ្ឋ ដែលមានលំនៅដ្ឋានជាប់ព្រំដែន ជាពិសេសអ្នករកស៊ីចេញ ចូល ផ្លាស់ប្តូរទំនិញ សាកសួរសុខទុក្ខញ្ញាតិមិត្ត ទេសចរណ៍ និងពីនិត្យព្យាបាលជំងឺផ្សេងៗ ឲ្យបានយល់ច្បាស់អំពីច្បាប់ និងបទបញ្ញត្តិព្រំដែននៃប្រទេសទាំងពីរ ដើម្បីឲ្យពួកគាត់រួមចំណែកក្នុងការថែរក្សាសន្តិសុខ សណ្តាប់ធ្នាប់ព្រំដែន ។ ចំណុចទី ០៦ បន្តជូនដំណឹងឲ្យគ្នាទៅវិញទៅមក និងរួមគ្នាដោះស្រាយបញ្ហានានា ដែលកើតមានឡើងនៅក្នុងខេត្តទាំង ៣ ដោយសន្តិវិធី ដោយឈរលើគោលនយោបាយច្បាប់ នៃប្រទេសនីមួយៗ ។ ចំណុចទី ០៧ បន្តរក្សាកិច្ចប្រជុំតាមកាលកំណត់ ឬវិសាមញ្ញប្រសិនបើមានតម្រូវការចាំបាច់ ។ និងចំណុចចុងក្រោយ ចំណុចទី ០៨ ត្រូវបន្តធ្វើបច្ចុប្បន្នភាព ពន្លឿនលើការងារឲ្យឆាប់រហ័សតាមប្រព័ន្ធបច្ចេកវិទ្យា ទូរសារអេឡិចត្រូនិច អ៊ីម៉ែល ឬតាមប្រពន្ធ What app Telegram ដើម្បីមានវិធានការឲ្យបានទាន់សភាពការណ៍ ។
សូមបញ្ជាក់ផងដែរថា នៅក្នុងសន្និបាតបូកសរុបនិងវាយតម្លៃសភាពការណ៍ ៦ខែដើមឆ្នាំ២០១៩នេះ គឺមានការចូលរួម ពីលោកឧត្តមសេនីយ៍ទោ សុខ សំណាង ស្នងការនគរបាលខេត្តតាកែវ និងលោកឧត្តមសេនីយ៍ទោ អ៊ាវ ចំរើន ស្នងការនគរបាលខេត្តកណ្តាល រួមជាមួយក្រុមការងារ និងលោកឧត្តមសេនីយ៍ត្រី ប៊ួយ ប៊ែទឺ ស្នងការនគរបាលខេត្តអានយ៉ាង ។
ជាកិច្ចបញ្ចប់នៅក្នុងអង្គសន្និបាទនេះដែរ លោកឧត្តមសេនីយ៍ទោ សុខ សំណាង ស្នងការនគរបាលខេត្តតាកែវ បានលើកឡើងនូវសកម្មភាពបទល្មើសជាច្រើន ដែលកើតមានក្នុងរយៈពេល ៦ខែដើមឆ្នាំនេះ គឺនៅមានភាពស្មុគស្មាញច្រើន ព្រោះរាល់បណ្តាបទល្មើសព្រហ្មទណ្ឌ សេដ្ឋកិច្ច គ្រឿងញៀន រត់ពន្ធ មាស រូបិយប័ណ្ណបរទេស គឺនៅតែបន្តកើតមានឡើង មួយវិញទៀតកិច្ចសហប្រតិបត្តិការ មានពេលខ្លះសហការគ្នាពុំបានទាន់ពេលវេលា ដោយសារតែកត្តាភូមិសាស្ត្រ និងភាសា ៕ ដោយ៖តាកែវ 
