រតនគិរី៖ មានការលើកឡើងដោយ Account facebook ឈ្មោះ Srey Mov Single កាលពីពេលថ្មីៗនេះ បានសរសេរថា ប៉ូលិសចាប់កូនខ្ញុំយកទៅវាយសួចម្លើយ វាយប៉ោងភ្នែក ប៉ោងក្បាលអស់ហើយ ថែមទាំងដាក់គុកកូនខ្ញុំទៀត ប៉ុន្តែករណីនេះ ស្នងការដ្ឋាននគរបាលខេត្តរតនគិរី បានបញ្ជាក់ថា ជនសង្ស័យឈ្មោះ ទូច ទី(ហៅទី) ពុំមានពាក់ព័ន្ធហឹង្សាដោយចេតនាមានស្ថានទម្ងន់នោះទេ មានពាក់ព័ន្ធការប្រើប្រាស់អាវុធដោយខុសច្បាប់ (អាវុធខ្លីម៉ាករ៉ូឡូ១ដើម) ទើបកម្លាំងនគរបាលកសាងសំណុំរឿងបញ្ជូនទៅសាលាដំបូងខេត្ត។
ផេកហ្វេសប៊ុក Srey Mov Single កាលពីថ្ងៃទី២៦ខែកក្កដា ឆ្នាំ២០១៩ បានសរសេរថា “នាងខ្ញុំសូមគោរពសម្ដេច ហ៊ុន សែន នាយករដ្ឋមន្ត្រី សុំមេត្តាជួយរកយុត្តិធម៌ដល់នាងខ្ញុំផង កូនខ្ញុំឈ្មោះកូនទី ជាជនរងគ្រោះ ត្រូវគេកាប់ គ្នា២នាក់ ស្លាប់ម្នាក់ នៅសល់កូនខ្ញុំ ហើយវាបានដឹកមិត្តភក្ដិវាស្លាប់ ទៅដល់ពេទ្យទៀត។ ចុងក្រោយប៉ូលិសចាប់កូនខ្ញុំ យកទៅវាយសួចម្លើយបានវាយប៉ោងភ្នែក ប៉ោងក្បាលអស់ហើយ ថែមទាំងដាក់គុកកូនខ្ញុំទៀត តើយុត្តិធម៌នៅត្រង់ណា? នេះជាសមត្ថកិច្ចខេត្តរតនគិរី ចុងក្រោយរកមូលហេតុមិនឃើញបញ្ជូនទៅតុលាការ ហើយតុលាការទារលុយខ្ញុំពី4.000.000រៀល ចុងក្រោយសល់ត្រឹម៣០០$ បើមាន ទើបកូនរួចខ្លួន តើខ្ញុំបានលុយពីណា បើនាងខ្ញុំ ជាកម្មករបោសជូតមន្ទីរពេទ្យបង្អែកខេត្តរតនគិរី ធ្វើការដូរបាយហូប ចិញ្ចឹមកូនរហូត៦នាក់ រកបាយហូបមិនគ្រប់ផង មានតែ សម្តេច ហ៊ុន សែន ទេ ដែលជាម៉ែជាឪ មេត្តា ជួយរកយុត្តិធម៌ឲ្យកូនចៅអ្នកក្រីក្រលំបាកផង ពេលនេះបានដឹងថាសមត្ថកិច្ចនិងតុលាការ ខេត្តរតនគិរី ត្រូវការតែលុយទេ!”។
ពាក់ព័ន្ធនឹងករណីខាងលើនេះ នៅថ្ងៃទី២៧ ខែកក្កដានេះ ស្នងការដ្ឋាននគរបាលខេត្តរតនគិរី សូមធ្វើការបំភ្លឺជូនសាធារណជន ឲ្យបានជ្រាប ទាក់ទងការលើកឡើងដោយ Account facebook ឈ្មោះ Srey Mov Single។ ក្នុងនាមស្នងការដ្ឋាននគរបាលខេត្តរតនគិរី យើងខ្ញុំសូមបញ្ជាក់ជូនសាធារណជនឲ្យបានជ្រាបថា៖ ចំពោះករណីកាប់គ្នាបណ្តាលឲ្យស្លាប់មនុស្ស១នាក់ ពេលបញ្ជូនដល់មន្ទីរពេទ្យ កាលពីថ្ងៃទី២៣ ខែកក្កដា ឆ្នាំ២០១៩ ក្រោយកើតហេតុកម្លាំងយើង បានធ្វើការស្រាវជ្រាវស៊ើបអង្កេត ដោយកំណត់បានថា ជនសង្ស័យឈ្មោះ ស ម៉ាកូ(ហៅកូ) អាយុ១៨ឆ្នាំ ជាអ្នកប្រព្រឹត្តអំពើ (ហឹង្សាដោយចេតនាមានស្ថានទម្ងន់) ពុំមានការពាក់ព័ន្ធជាមួយជនសង្ស័យឈ្មោះ ទូច ទី (ហៅទី) នោះទេ ប៉ុន្តែក្នុងការស្រាវជ្រាវស៊ើបអង្កេតករណីខាងលើ កម្លាំងរបស់ស្នងការដ្ឋានយើងខ្ញុំ បានរកឃើញថា ជនសង្ស័យឈ្មោះ ទូច ទី(ហៅទី)នេះ មានពាក់ព័ន្ធ ការប្រើប្រាស់អាវុធដោយខុសច្បាប់ ទើបកម្លាំងយើងខ្ញុំកសាងសំណុំរឿងបញ្ជូន ទៅសាលាដំបូងខេត្ត ពីបទ (ប្រើប្រាស់អាវុធដោយខុសច្បាប់) សូមគោរពជូនជ្រាប និងជូនជ្រាប ៕ដោយ៖កូឡាប