ខេត្តព្រះសីហនុ៖ ស្នងការដ្ឋាននគរបាលខេត្តព្រះសីហនុ លោក ជួន ណារិន្ទ បានឲ្យដឹងថា នៅតាមផ្លូវនានា ក្នុងខេត្តនេះ កំពុងជួបប្រទះការកកស្ទះចរាចរណ៍ផងនិងកើតមានគ្រោះថ្នាក់ចរាចរ ជាច្រើនករណី ដែលទាមទារឲ្យមានវិធានការដោះស្រាយជាបន្ទាន់ និងឲ្យមានប្រសិទ្ធភាព។
លោក ជួន ណារិន្ទ ឲ្យដឹងដូច្នេះ ធ្វើឡើង នៅក្នុងលិខិតមួយច្បាប់របស់ស្នងការដ្ឋាននគរបាលខេត្ត ព្រះសីហនុ ផ្ញើជូន លោក គួច ចំរើន អភិបាលខេត្តព្រះសីហនុ។
លិខិតនោះ មានខ្លឹមសារថា ដោយសារខេត្តព្រះសីហនុ កំពុងមានការអភិវឌ្ឍខ្លាំង ហេតុដូច្នេះចរាចរណ៍ដឹកជញ្ជូន របស់យានយន្តគ្រប់ប្រភេទទាំងតូចទាំងធំ ដើម្បីបំពេញតម្រូវការសាងសង់សំណង់ផ្សេងៗ ក៏មានការកើនច្រើនផងដែរ។
លោក ជួន ណារិន្ទ បន្តថា ទន្ទឹមគ្នា យានយន្តបានកើនច្រើននាមូលដ្ឋានេះ ងាកមកបញ្ហាចរាចរណ៍ធ្វើដំណើរតាមផ្លូវសាធារណៈ ក៏មមារញឹក បណ្តាលឲ្យមានការកកស្ទះ និងកើតមានគ្រោះថ្នាក់ចរាចរច្រើនករណីថែមទៀតផង។
លោក ជួន ណារិន្ទ ឲ្យដឹងដូច្នេះ រួចបញ្ជាក់ថា ដើម្បីដោះស្រាយបញ្ហាកកស្ទះ និងគ្រោះថ្នាក់ចរាចរនេះ លោកស្នងការដ្ឋាននគរបាលខេត្តព្រះសីហនុ នឹងធ្វើយុទ្ធនាការជាពិសេសគ្រប់កិច្ចការ ដើម្បីកាត់បន្ថយគ្រោះថ្នាក់ចរាចរតាមផ្លូវ។
ទាក់ទិនយុទ្ធនាការខាងលើនេះ កាលពីព្រឹកថ្ងៃទី២៧ ខែកក្កដា ឆ្នាំ២០១៩ លោក អ៊ី សុខា ស្នងការរងនគរបាលខេត្តព្រះសីហនុ ទទួលបន្ទុកចរាចរណ៍ និងសណ្តាប់ធ្នាប់ បានកោះប្រជុំមន្ត្រីក្រោមឱវាទ ដើម្បីផ្សព្វផ្សាយអំពីផែនការបន្ទាន់ ជុំវិញកិច្ចការពារកាត់បន្ថយការកកស្ទះ និងកាត់បន្ថយគ្រោះថ្នាក់ចរាចរ ដល់កងកម្លាំងនគរបាលមូលដ្ឋាន ស្រុកព្រៃនប់ ស្រុកកំពង់សិលា និងស្រុកស្ទឹងហាវ។
ពិធីនេះធ្វើឡើងនៅអធិការដ្ឋាននគរបាលស្រុកព្រៃនប់។ ក្នុងនោះបានដាក់ចេញ នូវវិធានការបន្ទាន់ និងចាំបាច់មួយចំនួនរួមមាន៖
១- ទប់ស្កាត់ និងកាត់បន្ថយគ្រោះថ្នាក់ចរាចរផ្លូវគោក ឲ្យបានជាអតិបរមា
២- រៀបចំសណ្តាប់ធ្នាប់ចរាចរណ៍ផ្លូវគោក ឲ្យមានប្រសិទ្ធិភាពល្អប្រសើរជាលំដាប់
៣- បង្កើនថែមទៀតនូវការចូលរួមក្នុងការគោរពអនុរត្តន៍ច្បាប់ចរាចរណ៍ផ្លូវគោក ពីអ្នកប្រើប្រាស់ផ្លូវ៕ ដោយ៖ ដែន សីមា
