ខេត្តស្វាយរៀងៈលោក ឌី វិជ្ជា ប្រធានសហភាពសហពន្ធ័យុវជនកម្ពុជាខេត្តស្វាយរៀងនៅព្រឹកថ្ងៃទី២៧ ខែកក្កដា ឆ្នាំ២០១៩នេះ បានអញ្ជើញចុះពិនិត្យមើលសកម្មភាពនៃការបង្ហាត់បង្រៀនកុមារឱ្យចេះសង្គ្រោះខ្លួនឯងពេលលង់ទឹក ក្រោមប្រធានបទ “ចូលរួមកាត់បន្ថយករណីគ្រោះថ្នាក់លង់ទឹកចំពោះកុមារ” “NO KIDS DROWN” របស់យុវជនខេត្តស្វាយរៀងផ្ទាល់ ក្នុងសាលាបឋមសិក្សាព្រះសីហនុ ស្ថិតក្នុងភូមិមេភ្លើង សង្កាត់ស្វាយរៀង នៅក្រុងស្វាយរៀង ខេត្តស្វាយរៀង។
សូមបញ្ជាក់ថា ការរៀបចំកម្មវិធីបង្ហាត់បង្រៀនកុមារឲ្យចេះសង្គ្រោះខ្លួនឯងពេលលង់នេះ ជាការផ្តួចផ្តើម និងឧបត្ថម្ភដោយ លោក ឌី វិជ្ជា ប្រធានសហភាពសហព័ន្ធយុវជនកម្ពុជាខេត្តស្វាយរៀង។
គួររំលឹកផងដែរថាៈសិស្សសាលាបឋមសិក្សាព្រះសីហនុក្រុងស្វាយរៀងគឺជាលើកទី២ហើយ បន្ទាប់ពីសិស្សនៅសាលាស្រុកស្វាយជ្រំដែលទទួលបានការបង្ហាត់បង្រៀនកុមារឱ្យចេះសង្គ្រោះខ្លួនឯងពេលលង់ទឹក ពីសំណាក់សហភាពសហព័ន្ធយុវជនកម្ពុជាខេត្តស្វាយរៀង៕ដោយ៖ វ៉ៃកូ