ឆ្នាំជូត
រាសីល្អមធ្យម ។ ការងារ សម្រាប់អ្នកប្រកបការងាររាជការឬក្រុមហ៊ុនឯកជនឬឯកជនក្តីទោះកិច្ចការអ្វីក៏ដោយទាល់តែខិតខំខ្លាំងទើបសម្រេចជោគជ័យទៅរួច ។ លុយកាក់ ចូរប្រយ័ត្នរឿងខ្ចីបុលព្រោះងាយនឹងចាញ់បោកគេ ។ ចំពោះអ្នកប្រកបរបររកស៊ីជួញដូរការចេញធ្វើជំនួញទោះទីជិតឆ្ងាយពុំសូវសុខស្រួលខ្លួនប៉ុន្មានទេ ព្រោះជារឿយៗតែងមានក្រុមមនុស្សតាមឈ្នាសនីសនិងបង្កបញ្ហាច្រើន ដូច្នេះគប្បីប្រយ័ត្នប្រយែងឲ្យបានខ្លាំងក្លា ។
រីឯមនោសញ្ចេតនា គូស្នេហ៍ស្រីប្រុស គួរជូនកាដូដល់គូស្នេហ៍ ដើម្បីបន្ថែមភាពកក់ក្តៅក្នុងមនោសញ្ចេតនា ៕
ឆ្នាំឆ្លូវ
រាសីស្រុតចុះ ។ ការងារ មានអ្នកជួយយកអាសារ ហេតុនេះគ្រប់យ៉ាងប្រព្រឹត្តទៅដូចបំណង ។ លុយកាក់ គួរពេញចិត្តជាមួយនឹងស្ថានភាពហិរញ្ញវត្ថុបច្ចុប្បន្ន មិនត្រូវលោភលន់ជ្រុល ។ ការប្រកបរបររកស៊ីជួញដូរមានការលំបាកម្តេចម្តាតែបើខិតខំពុះពារតែសម្រេចមួយកម្រិតដែរ ។ ការធ្វើដំណើរជិតឆ្ងាយមានភាពសុខដុមល្អ តែយ៉ាងណាមិនត្រូវមានចិត្តប្រកែប្រកាន់ច្រើននោះឡើយ ប្រយ័ត្នឥតការអ្វីសោះនាំរឿងរ៉ាវចូលផ្ទះ ។
រីឯមនោសញ្ចេតនា ស្នេហាស្រីប្រុសចូរប្រយ័ត្នអ្នកក្រៅញុះញង់ចាក់ដោតនាំកើតរឿងឈ្លោះប្រកែកគ្នា ៕
ឆ្នាំខាល
រាសីល្អមធ្យម ។ ការងារ ទទួលរងការប៉ះទង្គិចមួយចំនួនយាយីផង ដូចនេះទោះធ្វើអ្វីក៏តោងប្រយ័ត្នប្រយែងដែរ ព្រោះថាផលអាក្រក់រត់ចូលជាងសព្វមួយដង ។ លុយកាក់ ប្រយ័ត្នក្នុងការខ្ចីបុលប្រាក់កាស ដើម្បីបញ្ចៀសកើតរឿងប្រទាញប្រទង់ ។ សម្រាប់អ្នកប្រកបរបររកស៊ីជួញដូរមានបញ្ហាមិនល្អនិងផលប៉ះទង្គិចច្រើន ដូចនេះធ្វើអ្វីត្រូវចេះអត់ធ្មត់ ហើយធ្វើមិនដឹងមិនឮខ្លះទើបប្រសើរហោង ។ ការធ្វើដំណើរឆ្ងាយជិតជួបភាពសុខដុមដូចសព្វមួយដង ។
រីឯមនោសញ្ចេតនា ស្នេហាស្រីប្រុសថ្ងៃនេះល្អសម្រាប់ការស្វែងរកស្នេហ៍ពិតប្រាកដ ៕
ឆ្នាំថោះ
រាសីស្រុតចុះ ។ ការងារ មិនល្អ មិនត្រូវឲ្យរឿងផ្ទាល់ខ្លួនឥទ្ធិពលដល់ទំនាក់ទំនងក្នុងការងារ ។ លុយកាក់ ថ្ងៃនេះមិនត្រូវចូលរួមក្នុងរាល់សកម្មភាពវិនិយោគ ។ ចំពោះអ្នកប្រកបរបររកស៊ីជួញដូរទីជិតឆ្ងាយពុំសូវកាក់កបដូចប្រាថ្នាទេ ព្រោះលាភហេងច្រើនបោលហួសនិងក្រុមដៃគូបដិបក្ខប្រជែងយកអស់ៗគ្មានសល់។
រីឯមនោសញ្ចេតនា បញ្ហាគូគ្រងប្តីប្រពន្ធ ឬគូស្នេហ៍ប្រុសស្រីមានការកាំចិត្តនិងពាក់មុខយក្សដាក់គ្នា៕
ឆ្នាំរោង
រាសីខ្ពស់ត្រដែត ។ ការងារ រីកចម្រើនគួរជាទីពេញចិត្ត សម្រេចបានលទ្ធផលល្អច្រើន អាចនិយាយថា ជាថ្ងៃដ៏នក្ខត្តឫក្ស ។ លុយកាក់ ល្អប្រសើរ មានបន្ថែមខ្ទង់ចំណូល តែត្រូវសន្សំសំចៃ ។ សម្រាប់អ្នកប្រកបរបររកស៊ីជួញដូរថ្ងៃនេះការធ្វើជំនួញទីជិតឆ្ងាយលោកអ្នកអាចរកផលកម្រៃមានភាពធូរស្បើយជាងមុនបន្តិចវិញ ហើយមុខរបរទៀតសោតក៏មានភាពសុខដុមល្អ ។ ការធ្វើដំណើរឆ្ងាយជិតជួបភាពសុខដុមទាំងពេលទៅនិងពេលត្រឡប់មកវិញ ។
រីឯមនោសញ្ចេតនា សេចក្តីស្នេហាស្រីប្រុសមានភាពភ្លឺថ្លានិងស្រស់ស្រាយចំពោះគ្នាប្រពៃណាស់៕
ឆ្នាំម្សាញ់
រាសីល្អមធ្យម ។ ការងារ ជួបឱកាសល្អៗច្រើនមានប្រយោជន៍សម្រាប់ការឈានឡើងខ្ពស់ក្នុងការងារ ។ លុយកាក់ មិនស្ថិរភាព ចាយវាយត្រូវសន្សំសំចៃ ។ សម្រាប់អ្នកប្រកបរបររកស៊ីជួញដូរវិញថ្ងៃនេះ បើមានការចាប់ផ្តើមប្រកបការងារថ្មីឃើញថាមិនសូវមានការជឿនលឿនទៅមុខប៉ុន្មានទេ តែបើប្រកបការងារអ្វីដែលសេសសល់ចាស់ៗពីមុនឃើញថាគាប់ប្រសើរជាង ។ ការធ្វើដំណើរទៅទីជិតទីឆ្ងាយមិនសូវមានសុវត្ថិភាពទេ គប្បីបន្ថែមការប្រុងប្រយ័ត្ន ។
រីឯមនោសញ្ចេតនា សេចក្តីស្នេហាកំលោះក្រមុំ មានការប្រឆាំងនិងចង់ចាញ់ឈ្នះគ្នាច្រើននាំឲ្យកើតមានការរកាំចិត្តមិនតិចនោះឡើយ ៕
ឆ្នាំមមី
រាសីខ្ពស់ត្រដែត ។ នៅថ្ងៃនេះផ្តល់ផលល្អសម្រាប់លោកអ្នកដំណើរការងារបញ្ហាប្រាក់កាស ឬបណ្តាក់ទុនអ្វីមួយផង ។ បើលោកអ្នកចង់បណ្តាក់ទុនរកស៊ីនៅក្នុងអំឡុងពេលនេះ ឃើញថាគប្បីប្រយ័ត្នប្រយែងបន្តិច ព្រោះថាផលអាក្រក់នោះឃើញថាលាយឡំផងដែរ។ ការរស់នៅក្នុងថ្ងៃនេះដែរ មានការចម្រើនលូតលាស់គួរសម ដូចនេះបើចង់ទំនាក់ទំនងកិច្ចការងារអ្វីមួយជាមួយអ្នកដទៃក៏តែងផ្តល់ផលល្អៗមកវិញជានិច្ច ។
រីឯមនោសញ្ចេតនា បញ្ហាសេចក្តីស្នេហាកំលោះក្រមុំបើចង់សាសងស្នេហាឬទំនាក់ទំនងជាមួយមនុស្ស ដែលខ្លួនស្រឡាញ់ពេញចិត្តជាពេលវេលាល្អប្រពៃ ៕
ឆ្នាំមមែ
រាសីស្រុតចុះ ។ ការងារ ថ្ងៃនេះមិនត្រូវធ្វេសប្រហែស ព្រោះងាយកើតមានកំហុសក្នុងការងារ ។ លុយកាក់ ជាថ្ងៃមិនល្អសម្រាប់ការបញ្ចេញប្រាក់រកស៊ី ។ សម្រាប់អ្នកប្រកបរបររកស៊ីជួញដូរថ្ងៃនេះការរកផលកម្រៃពិតជាជួបការលំបាក ហើយពិសេសឲ្យប្រយ័ត្នជួបគ្រោះចាញ់បោកគេ ។ ការធ្វើដំណើរទីជិតទីឆ្ងាយចូរប្រយ័ត្នកើតបញ្ហាអ្វីមួយឡើង ។
រីឯមនោសញ្ចេតនា សម្ព័ន្ធស្នេហាប្រុសស្រីកុំចង់ទុំមុនស្រគាលប្រយ័ត្នរែកពុនទុក្ខ៕
ឆ្នាំវក
រាសីខ្ពស់ត្រដែត ។ ការងារ ល្អប្រសើរ ថ្ងៃនេះជួបសំណាងល្អក្នុងការងារ រាល់ការលំបាកសម្ពាធទាំងឡាយសុទ្ធតែជំនះបានទាំងអស់ ។ លុយកាក់មានការកើនចំណូលថែមទ្វេដង ។ ចំពោះអ្នកធ្វើរបររកស៊ីជួញដូរវិញថ្ងៃនេះផ្តល់ផលល្អ ហុចផ្លែផ្កានិងប្រមូលផលចំណេញវិលមកវិញត្រឡប់ចូលផ្ទះវិញគួរជាទីកក់ក្តៅចិត្ត ។ ការធ្វើដំណើរទីជិតទីឆ្ងាយតែងមានមនុស្សអាណិតស្រឡាញ់រាប់អាន ជ្រោមជ្រែងជានិច្ច ។
រីឯមនោសញ្ចេតនា ស្នេហាប្រុសស្រីបើពុំទាន់មានគូគាប់ជាឱកាសរកឃើញគូព្រេង ៕
ឆ្នាំរកា
រាសីឡើងខ្ពស់ ។ ថ្ងៃនេះលោកអ្នកធ្វើអ្វីភ្លឺថ្លា និងជោគជ័យវិលត្រឡប់មកវិញ ។ អ្នកប្រកបរបររកស៊ីជួញដូមានការទិញចូលលក់ចេញគ្រាន់បើ ឯផលកម្រៃទៀតសោត គ្រាន់ជាទីកក់ក្តៅ ។ ការធ្វើដំណើរទីជិតទីឆ្ងាយមានតែក្រុមមនុស្សស្វាគមន៍រាក់ទាក់ ។
រីឯមនោសញ្ចេតនា ស្នេហាកំលោះក្រមុំ កាន់តែជ្រាលជ្រៅ ផ្អែមល្ហែម និងចេះអត់ឱនឲ្យគ្នាល្អណាស់ ៕
ឆ្នាំចរ
រាសីស្រុតចុះ ។ ការងារ ទោះបីការងាររលូនល្អ តែក៏មិនត្រូវធ្វើអ្វីដោយប្រញាប់ប្រញាល់អន្ទះសារ ។ លុយកាក់ ត្រូវពិចារណាឲ្យល្អិតល្អន់មុនពេលចូលរួមវិនិយោគ ។ ចំណែកអ្នកប្រកបរបររកស៊ីជួញដូរបើចង់ជួញដូរទីជិតឆ្ងាយមានភាពកាក់កបគួរសម ហើយបើមានបើកហាងថ្មីក៏ផ្តល់ផលគាប់ប្រសើរដែរ ។
រីឯមនោសញ្ចេតនា ស្នេហាប្រុសស្រីគួរលៃពេលវេលាឲ្យបានច្រើនសម្រាប់មនុស្សដែលខ្លួនស្រឡាញ់ ៕
ឆ្នាំកុរ
រាសីល្អមធ្យម ។ ការងារ ត្រូវព្យាយាមប្រឹងប្រែងជាងនេះទៀត ទើបអាចសម្រេចដល់គោលដៅ ។ លុយកាក់ កំហិតការទិញរបស់ ត្រូវចេះសន្សំសំចៃប្រាក់កាស ។ អ្នកប្រកបរបររកស៊ីជួញដូរមានការជឿនលឿនទៅមុខគ្រាន់បើ ហើយបើចង់ទិញកន្លែងលក់ដូរ ឬចង់រើទីកន្លែងលក់ដូរក៏តែងសមដូចប្រកបជានិច្ច ។
មនោសញ្ចេតនា បញ្ហាស្នេហាប្រុសស្រី បើចង់ចូលស្តីដណ្តឹង ឬរៀបអាពាហ៍ពិពាហ៍អ្វីមួយជាឱកាសល្អប្រពៃណាស់៕