ខេត្តព្រះសីហនុ៖ សមត្ថកិច្ចនគរបាលស្រុកស្ទឹងហាវ ខេត្តព្រះសីហនុ បានឲ្យដឹងថា កាលពីល្ងាចថ្ងៃម្សិលមិញនេះ មានករណីប្រជាពលរដ្ឋ រស់នៅឃុំទំនប់រលក ស្រុកស្ទឹងហាវ បានបាត់ក្មេងប្រុសតូចៗចំនួន ៣នាក់ ដែលត្រូវជាបងប្អូនជីដូនមួយនឹងគ្នា ដោតពួកគេបានបាត់ខ្លួន ចេញពីផ្ទះ តាំងពីម៉ោង ៥កន្លះល្ងាចថ្ងៃទី២៧ ខែកក្កដា ឆ្នាំ២០១៩។
សមត្ថកិច្ចបន្តថា ចំពោះការបាត់ខ្លួនកុមារតូចៗទាំងបីនាក់នេះ គឺទាំងអាណាព្យាបាល ឬសាច់ញាតិ ក៏ដូចជា ប្រជាពលរដ្ឋ មានលំនៅដ្ឋានរស់នៅជិរខាងគ្នា បានជួយដើរស្វែងរកពេញមួយយប់ ប៉ុន្តែរកមិនឃើញ។ ទើបមកដល់ព្រឹកព្រលឹមថ្ងៃទី២៨ ខែកក្កដា ឆ្នាំ២០១៩នេះ ទើបគ្រួសារសាច់ញាតិក្មេងៗទាំងនោះ បានរកឃើញ ក្មេងតូចៗទាំងបីនាក់នោះ កប់ជាប់ក្នុងល្បាប់ភក់ នៅក្នុងរណ្តៅដីមួយកន្លែង មានទីតាំងនៅជិតវត្តពោធិ៍មានជ័យ ស្ថិតក្នុងឃុំកំពេញ ស្រុកស្ទឹងហាវ ខេត្តព្រះសីហនុ។
សមត្ថកិច្ចបន្តថា ជាសំណាងបំផុតដែលក្មេងតូចៗទាំង៣នាក់ ខាងលើនេះ នៅមានជីវិត ដោយគ្រាន់តែមានអាការៈហត់ហេវ និងភ័យតក់ស្លុតខ្លាំងតែខ្លាំងតែប៉ុណ្ណោះ។
មន្ត្រីរដ្ឋបាលស្រុកស្ទឹងហាវ ឲ្យដឹងដូច្នេះ រួចបញ្ជាក់ថា តាមការអះអាង របស់អាណាព្យាបាលក្មេងតូចៗទាំង៣នាក់ខាងលើនេះ បានរួចផុតជីវិតពីសេចក្តីស្លាប់ហើយ។
ទាក់ទិនបញ្ហានេះ លោកវរសេនីយ៍ទោ រស់ កី អធិការនគរបាលស្រុកស្ទឹងហាវ បានឲ្យដឹងថា មុនពេលក្មេងតូចៗទាំងបីនាក់ជាប់ក្នុងល្បាប់ភក់ក្នុងរណ្តៅដី គឺពីដំបូងឡើយ ក្មេងតូចៗទាំង៣នាក់នោះ បានរត់តាមឡានដង្ហែរសព ឆ្ពោះទៅទៅកាន់វត្តពោធិ៍មានជ័យ ដើម្បីរើសលុយដែលសាច់ញាតិសព បានបាចតាមឡានដង្ហែរសព។ ប៉ុន្តែក្រោយមកក្មេងតូចៗទាំង៣នាក់នោះ ក៏បាននាំគ្នាទៅលេងល្បាប់ភក់ ក្នុងរណ្តៅកាយដីមួយកន្លែង មានទីតាំងនៅជិតវត្តពោធិ៍មានជ័យ ទើបបណ្តាលឲ្យជាប់ផុង នៅក្នុងល្បាប់ភក់នោះតែម្តងទៅ។
ត្រង់ចំណុចនេះ លោកអធិការបន្តថា ដោយសារតែពេលយប់ មិនមានមនុស្សចាស់នៅជិត ឬក៏មើលមិនឃើញ ទើបបានជាក្មេងៗ ទាំង៣នាក់នោះ នៅជាប់ផុង នៅក្នុងល្បាប់ភក់ខាងលើនេះ ពេញមួយយប់ ទម្រាំសាច់ញាតិ ឬអាណាព្យាបាល បានរកឃើញ និងជួយសង្គ្រោះជីវិតទាន់ពេលវេលា។
យ៉ាងនេះក្តី សាធារណជននានា បានដាក់ការទទួលខុសត្រូវ និងស្តីបន្ទោស ករណីគ្រោះថ្នាក់នេះ ទៅលើអាណាព្យាបាល ដែលបានបណ្តោយឲ្យក្មេងតូចៗទាំងបីនាក់ដើរលេងរហេតរហូត ស្ទើរតែរងគ្រោះដល់អាយុជីវិតនេះ។
ចំណុចនេះ សាធារណជន បានព្រមានទៅអាណាព្យាបាលកុមារតូចៗទាំងបីនាក់ថា ប្រសិនបើជារណ្តៅដីនោះ មានទឹកពេញវិញ ទំនងជាក្មេងៗទាំងបីនាក់ ពិតជាត្រូវលង់ទឹកស្លាប់ជាក់ជាមិនខាន។ ហើយថា កំហុសឆ្គង និងការទទួលខុសត្រូវលើគ្រោះថ្នាក់ដល់អាយុជីវិតនេះ គឺជាអាណាព្យាបាលខ្លួនឯងតែម្តង ដែលមិនបានមើលថែរ ឬមិនបានមើលការខុសត្រូវក្មេងៗ ឬកូនៗ របស់ខ្លួន ឲ្យបានល្អ ពោលគឺមានការធ្វេសប្រហែស៕ ដោយ៖ ដែន សីមា
