កំពង់ឆ្នាំង ៖ អ្នកប្រម៉ាញ់សត្វស្លាបទឹក៦នាក់ ត្រូវបានកម្លាំងសមត្ថកិច្ចកងរាជអាវុធហត្ថខេត្តកំពង់ឆ្នាំង និង ស្រុកបរិបូរណ៍ធ្វើការឃាត់ខ្លួន ជាមួយនឹងសត្វស្លាប (សត្វទោម) ចំនួន១៣០ក្បាល ។
របាយការណ៍កងរាជអាវុធហត្ថខេត្តកំពង់ឆ្នាំង បានឲ្យដឹងថា ការឃាត់ខ្លួន នៅវេលាម៉ោង ០៨ ព្រឹក ថ្ងៃទី២៨ ខែកក្កដា ឆ្នាំ២០១៩ នៅចំណុចភូមិសេះស្លាប់ ឃុំឆ្នុកទ្រូ ស្រុកបរិបូរណ៍ ខេត្តកំពង់ឆ្នាំង កម្លាំងកងរាជអាវុធហត្ថ ដឹកនាំដោយលោក វរសេនីយ៍ទោ ហង្ស សុជាតិ មេបញ្ជាការរង កងរាជអាវុធហត្ថខេត្តកំពង់ឆ្នាំង បានចុះឃាត់ខ្លួនជនសង្ស័យចំនួន ០៦នាក់ ពាក់ព័ន្ធនឹងករណីជួញដូរសត្វទោម។
ជនសង្ស័យទាំង ០៦នាក់រួមមាន៖
១. ឈ្មោះ ហុក ពិសិដ្ឋ ភេទប្រុស អាយុ ២២ឆ្នាំ មុខរបរ នេសាទ
២. ឈ្មោះ ហុក ផេង ភេទប្រុស អាយុ ៣៥ឆ្នាំ មុខរបរ នេសាទ
៣. ឈ្មោះ ហុក ឆេង ភេទប្រុស អាយុ ៣១ឆ្នាំ មុខរបរ នេសាទ
៤. ឈ្មោះ ទូច ស្រ៊ុន ភេទប្រុស អាយុ ៣២ឆ្នាំ មុខរបរ នេសាទ
៥. ឈ្មោះ ឡាយ ថន ភេទប្រុស អាយុ ៣៥ឆ្នាំ មុខរបរ នេសាទ
៦. ឈ្មោះ កា បូលី ភេទប្រុស អាយុ ៣៣ឆ្នាំ មុខរបរ នេសាទ អ្នកទាំងប្រាំមួយនាក់ មានទីលំនៅ ភូមិ-ឃុំ កើតហេតុខាងលើ រួមទាំងរឹបអូសបានសត្វទោមចំនួន ១៣០ក្បាលផងដែរ។
បច្ចុប្បន្នវត្ថុតាងខាងលើ ត្រូវបានកម្លាំងជំនាញ ប្រគល់ជូនជំនាញរដ្ឋបាលព្រៃឈើខេត្ត ចំណែកជនសង្ស័យ ធ្វើការអប់រំឲ្យត្រឡប់ទៅលំនៅដ្ឋានវិញ។
ក្រុមប្រម៉ាញ់សត្វទាំងនេះ គឺជាអ្នកនេសាទត្រី នៅតំបន់នោះ ហើយក្រៅពីនេសាទត្រីពួកគេបានប្រម៉ាញ់សត្វស្លាបដើម្បី យកទៅលក់ផងដែរ ។
សមត្ថកិច្ចបានឲ្យដឹងថា សត្វស្លាបទាំង១៣០ក្បាលនេះ ត្រូវបានកម្លាំងសមត្ថកិច្ចកងរាជអាវុធហត្ថប្រគល់ឲ្យទៅខណ្ឌរដ្ឋបាលព្រៃឈើនៃមន្ទីរកសិកម្ម រុក្ខាប្រម៉ាញ់ និង នេសាទខេត្ត យកទៅលែងនៅទំនប់២០ឧសភា ក្នុងភូមិសាស្ត្រស្រុកបរិបូរណ៍ ៕ ដោយ៖កូឡាប