មនុស្សយ៉ាងហោចណាស់ចំនួន ៦៥នាក់បានបាត់បង់ជីវិត ក្រោយពេលក្រុមសកម្មប្រយុទ្ធ Boko Haram បានធ្វើការបាញ់ប្រហារទៅលើពិធីបុណ្យសពមួយកន្លែង ស្ថិតក្នុងរដ្ឋ Borno ប្រទេសនីហ្សេរីយ៉ា។
សាកក្សីដែលឃើញហេតុការណ៍ដ៏រន្ធត់នោះនិយាយថា ក្រុមខ្មាន់កាំភ្លើងបានជិះម៉ូតូ និងរថយន្តចូលក្នុងភូមិមួយ និងបានធ្វើការបាញ់រៈទៅលើអ្នកចូលរួមពិធីបុណ្យសព បណ្តាលឲ្យមនុស្សយ៉ាងច្រើនស្លាប់នៅនឹងកន្លែងកើតហេតុ ខណៈអ្នកផ្សេងទៀត ត្រូវបានបាញ់សម្លាប់ នៅពេលពួកគេព្យាយាមដេញខ្មាន់កាំភ្លើងឲ្យចេញ។
ហេតុការណ៍បាញ់ប្រហារដ៏រន្ធត់នោះកើតឡើងនៅថ្ងៃសៅរ៍ ។ បច្ចុប្បន្ន មានការវាយប្រហាររបស់ក្រុមអ៊ីស្លាមកើតឡើងយ៉ាងខ្លាំងនៅក្នុងតំបន់។
មន្ត្រីរដ្ឋាភិបាលម្នាក់ឈ្មោះ Muhammed Bulama បានគិតថា ការបាញ់ប្រហារនោះទំនងជាការសងសឹករបស់ក្រុម Boko Haram បន្ទាប់ពីសមាជិកនៃក្រុមនេះចំនួន ១១នាក់ត្រូវបានកងកម្លាំងបាញ់សម្លាប់កាលពី ២សប្តាហ៍មុន។
ប្រធានាធិបតីនីហ្សេរីយ៉ា លោក Muhammadu Buhari បានធ្វើការថ្កោលទោសការវាយប្រហារនោះ និងបានបញ្ជាឲ្យកងកម្លាំងរដ្ឋាភិបាលតាមប្រមាញ់ក្រុមដែលបានធ្វើការវាយប្រហារនោះ។
សូមបញ្ជាក់ថា Boko Haram គឺជាក្រុមរដ្ឋអ៊ីស្លាម ហើយបច្ចុប្បន្ន ក្រុមនេះកំពុងធ្វើការប្រយុទ្ធប្រឆាំង ដើម្បីផ្តួលរំលំរដ្ឋាភិបាល ដើម្បីបង្កើតរដ្ឋអ៊ីស្លាម៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
