អធិការដ្ឋាននគរបាលខណ្ឌច្បារអំពៅ បានឲ្យដឹងថា ជនសង្ស័យម្នាក់ ដែលប្រើប្រាស់គ្រឿងញៀន ត្រូវនគរបាលចាប់ខ្លួនករណីលួចអាវុធខ្លី និងទូរស័ព្ទដៃ នៅផ្ទះគ្មានលេខ ភូមិដើមស្លែង សង្កាត់ច្បារអំពៅទី២ ខណ្ឌច្បារអំពៅ កាលពីថ្ងៃទី ២៣-ខែកក្កដា-២០១៩ ម៉ោង១២និង៣០នាទី ។ ជនរងគ្រោះឈ្មោះ មៀច ចន្ធូ ភេទប្រុស អាយុ៣៩ឆ្នាំ ជនជាតិខ្មែរ មុខរបរនគរបាល ស្នាក់នៅភូមិដើមស្លែង សង្កាត់ ច្បារអំពៅទី២ ខណ្ឌច្បារអំពៅ។
ជនសង្ស័យឈ្មោះ ប៊ុន រដ្ឋា ហៅ តួ ភេទ ប្រុស អាយុ ២៩ឆ្នាំ ជនជាតិ ខ្មែរ មុខរបរ គ្មាន ស្នាក់នៅភូមិឬស្សីស្រស់ សង្កាត់និរោធ ខណ្ឌច្បារអំពៅ។
មុនពេលកើតហេតុជនរងគ្រោះទុកអាវុធខ្លីម៉ាក CF-៩៨ លេខ ០០៥៨៨៤ និងទូរស័ព្ទដៃ ០១គ្រឿង ម៉ាក iPhone ពណ៌ស ទុកនៅក្នុងថតតុ (ផ្ទះកើតហេតុ) ដោយពុំបានចាក់សោទ្វារបន្ទប់ទេ រួចចេញទៅមើលកម្មករធ្វើការនៅខាងក្រៅ ស្រាប់តែជនសង្ស័យ ដើរចូលក្នុងផ្ទះជនរងគ្រោះ លួចអាវុធខ្លី និងទូរស័ព្ទដៃខាងលើ រួចគេចខ្លួន។ លុះដល់ថ្ងៃទី២៨-ខែកក្កដា-ឆ្នាំ២០១៩ ម៉ោង១៧និង០០នាទី សមត្ថកិច្ចយើងស្រាវជ្រាវ ឃាត់ខ្លួនជនសង្ស័យ នៅសង្កាត់តាខ្មៅ ក្រុងតាខ្មៅ ខេត្តកណ្តាល និងដកហូតអាវុធខ្លី០១ដើម (ម៉ាកខាងលើ), បង់០១ និងគ្រាប់ចំនួន ០៧គ្រាប់ បញ្ជូនមកអធិការដ្ឋាននគរបាលខណ្ឌច្បារអំពៅ និងចាត់ការបន្តតាមនិតិវិធីច្បាប់៕ ដោយ៖កូឡាប
