ខេត្តព្រះសីហនុ៖ អធិការនគរបាលស្រុកព្រៃនប់ លោក ហួរ យ៉ៃ បានឲ្យដឹងថា កម្លាំងជំនាញ របស់លោកបានចាប់ខ្លួន ជនសង្ស័យពាក់ព័ន្ធបទល្មើសគ្រឿងញៀនបានចំនួន ២នាក់ កាលពីថ្ងៃទី២៨ ខែកក្កដា ឆ្នាំ២០១៩។
លោកថា យុទ្ធនាការចុះបង្ក្រាបបទល្មើសគ្រឿងញៀននេះ ធ្វើឡើងនៅចំណុចក្បែរផ្លូវបេតុង ក្នុងភូមិដូនលយ ឃុំបឹងតាព្រហ្ម ស្រុកព្រៃនប់ ខេត្តព្រះសីហនុ។
លោកអធិការបន្តថា សកម្មភាពចុះបង្ក្រាបបទល្មើសគ្រឿងញៀននេះ ជាជំហានដំបូង សមត្ថកិច្ចបានឃាត់ខ្លួនជនសង្ស័យបានម្នាក់ឈ្មោះ អាំ សត្យា ភេទប្រុស អាយុ ២៨ឆ្នាំរស់នៅភូមិដូនលយ ឃុំបឹងតាព្រហ្ម ស្រុកព្រៃនប់ និងមានមុខរបរ កម្មករសំណង់។ ក្នុងនោះ សមត្ថកិច្ច ក៏បានដកហូតវត្ថុតាងរួមមាន៖ ម្សៅក្រាមសថ្លា សង្ស័យជាសារធាតុញៀន ចំនួន ២កញ្ចប់ (តូច០១កញ្ចប់ និងធំ១កញ្ចប់)។ ហើយបន្តមកទៀត កម្លាំងជំនាញរបស់លោក ក៏បានបន្តចុះស្រាវជ្រាវមុខសញ្ញាបទល្មើសគ្រឿងញៀននេះ ហើយឈានទៅចាប់ខ្លួនជនសង្ស័យបានម្នាក់ទៀត ឈ្មោះ សួន សុធារិន ភេទប្រុស អាយុ ៣២ឆ្នាំ មានទីលំនៅភូមិបឹងតាព្រហ្ម ឃុំបឹងតាព្រហ្ម ស្រុកព្រៃនប់ ខេត្តព្រះសីហនុ និងមានមុខរបរលក់ដូរ។ សកម្មភាពនេះ សមត្ថកិច្ច ក៏បានដកហូតវត្ថុតាងមួយចំនួនមាន៖ ម្សៅក្រាមសថ្លា ដែលសង្ស័យជាសារធាតុញៀនចំនូន ១កញ្ចប់ និងទូរស័ព្ទដៃចំនួន១គ្រឿង។
លោក ហួរ យ៉ៃ អធិការដ្ឋាននគរបាលស្រុកព្រៃនប់ បន្តថា បច្ចុប្បន្នជនសង្ស័យទាំង២នាក់ខាងលើនេះ ត្រូវកម្លាំងជំនាញ កសាងសំណុំរឿងបញ្ជូន ទៅកាន់សាលាដំបូងខេត្តព្រះសីហនុ ដើម្បីអនុវត្តនីតិវិធីបន្តតាមផ្លូវច្បាប់៕ ដោយ៖ ដែន សីមា
