(ភ្នំពេញ) ៖ កម្លាំងនាយកដ្ឋាននគរបាលព្រហ្មទណ្ឌ នៃអគ្គស្នងការដ្ឋាននគរបាលជាតិ បានចាប់ខ្លួនបុរសម្នាក់ ដែលឆបោកប្រាក់ពីប្រជាពលរដ្ឋ ប្រមាណ៣០លានដុល្លារសហរដ្ឋអាមេរិក ក្រោមរូបភាពដាក់ប្រាក់វិនិយោគទិញភាគហ៊ុន នឹងទទួលបានផលចំណេញច្រើនត្រឡប់មកវិញ។ការចាប់ខ្លួនជនខាងលើ យោងតាមដីកាបញ្ជាឲ្យចូលខ្លួនយើង កែវ សុធា ព្រះរាជអាជ្ញា នៃ អយ្យការអមសាលាដំបូងរាជធានីភ្នំពេញ។
លោកឧត្តមសេនីយ៍ទោ ហួម តាំងហឿត អនុប្រធាននាយកដ្ឋាននគរបាលព្រហ្មទណ្ឌ ដែលដឹកនាំប្រតិបត្តិការនេះ បានថ្លែង ឲ្យដឹងនៅថ្ងៃទី២៩ ខែកក្កដា ឆ្នាំ២០១៩នេះ ជនសង្ស័យឈ្មោះ ឈឺ យ៉ារី អាយុ៣៤ឆ្នាំ ត្រូវបានបញ្ជូនទៅតុលាការនៅថ្ងៃនេះ ក្រោយចាប់ខ្លួនបានកាលពីថ្ងៃទី២៧ ខែកក្កដា ឆ្នាំ២០១៩ នៅខេត្តព្រះសីហនុ។
លោកឧត្តមសេនីយ៍ទោ ហួម តាំងហឿត បានអះអាងថា ការចាប់ខ្លួននេះក្រោយពីទទួលបានពាក្យបណ្ដឹងពីជនរងគ្រោះ និងមានការបញ្ជាណែនាំពី នាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ, អគ្គស្នងការរងទទួលផែននគរបាលយុត្តិធម៌ និងចង្អុលបង្ហាញពី លោកឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ។
ជនសង្ស័យ បានប្រើល្បិចបញ្ចុះបញ្ចូលឲ្យជនរងគ្រោះជាច្រើននាក់ ដាក់ប្រាក់វិនិយោគលើការជួញដូរ រូបិយប័ណ្ណអន្ដរជាតិ (Forex Trading) ដោយអះអាងថា នឹងទទួលបានប្រាក់ចំណេញខ្ពស់។ ប៉ុន្ដែក្រោយមក ជនសង្ស័យបានយកប្រាក់ហើយគេចខ្លួនបាត់ ទើបជនរងគ្រោះបានមកដាក់ពាក្យបណ្ដឹងជាបន្ដបន្ទាប់។
បើតាមលោកអនុប្រធាននាយកដ្ឋាន ក្រោយទទួលបានពាក្យបណ្ដឹង កម្លាំងជំនាញបានបើកការស្រាវជ្រាវយ៉ាងយកចិត្តទុកដាក់ រហូតកំណត់អត្តសញ្ញាណជនសង្ស័យខាងលើ ដែលបានគេចខ្លួនទៅដល់ខេត្តព្រះសីហនុ ហើយក៏ត្រូវសមត្ថកិច្ចចាប់ខ្លួនបានតែម្ដង ទើបបានបញ្ជូនមកធ្វើការសួរនាំនៅនាយកដ្ឋាននគរបាលព្រហ្មទណ្ឌ និងបញ្ជូនទៅតុលាការចាត់ការតាមនីតិវិធី។
សូមបញ្ជាក់ថា លោកកែវ សុធា ព្រះរាជអាជ្ញា នៃ អយ្យការអមសាលាដំបូងរាជធានីភ្នំពេញ នៅថ្ងៃទី២៦កក្កដា បានចេញដីកាបញ្ជាឲ្យចូលខ្លួន ឈ្នោះ ឈឺ យ៉ាវី ភេទប្រុស អាយុ ៣៣ឆ្នាំ ជនជាតិខ្មែរ មានទីលំនៅបច្ចុប្បន្នភូមិ
កំពង់ឆ្នាំង ឃុំបវិល ស្រុកបរវិល ខេត្តបាត់ដំបង ។ ឲ្យចូលបង្ហាញខ្លួននៅ នាយកដ្ឋាននគរបាលព្រហ្មទណ្ឌ នៃ ក្រសួងមហាផ្ទៃ ឲ្យបានមុនថ្ងៃទី ១២ ខែសីហា ឆ្នាំ ២០១៩ នៅរៀងរាល់ម៉ោងធ្វើការ ដើម្បីសាកសួរពាក់ព័ន្ធនឹងករណី ឆបោក និងរំលោភលើទំនុកចិត្ត តាមបណ្តឹងរបស់ឈ្មោះ ប៊ុច សុខា ភេទស្រី អាយុ ៤៤ឆ្នាំ។
ចំណែកជនរងគ្រោះ ឈ្មោះ ប៊ុច សុខា អាយុ៤៤ ឆ្នាំ ជនជាតិខ្មែរ អស័យដ្ឋានស្នាក់នៅ ផ្ទះលេខ២៤៤ ផ្លូវលេខៈ៣៧១ ភូមិ៨នាយកដ្ឋានបង្កាត់ដឹងកេងកង៣ ខណ្ឌចំការមន រាជធានីភ្នំពេញ។ មុខរបរ៖ អាជីវករ នៅថ្ងៃទី ០៤ ខែ កក្កដា ឆ្នាំ២០១៩ បានដាក់ពាក្យបណ្តឹង សូមគោរពជូន លោក ឧត្តមសេនីយ៍ឯក ប្រធាននាយកដ្ឋាននគរបាលព្រហ្មទណ្ឌ សុំប្តឹងពីឈ្មោះ ឈី យ៉ារី ភេទប្រុស អាយុ៣៣ឆ្នាំ ជនជាតិខ្មែរ អស័យដ្ឋានស្នាក់នៅ ភូមិកំពង់ឆ្នាំង ឃុំបវិល ស្រុកបវិល ខេត្តបាត់ដំបង ពីបទ ឆបោក និងរំលោភលើទំនុកចិត្ត។
តបតាមកម្មវត្ថុ និងយោងខាងលើ នាងខ្ញុំ សូមគោរពជម្រាបជូន លោក ឧត្តមសេនីយ៍ឯក ប្រធានមេត្តាជ្រាបថា៖ កាលពីថ្ងៃទី០១ ខែកក្កដា ឆ្នាំ២០១៨ វេលាម៉ោង១០និង៤៥ នាទីព្រឹក ស្ថិតនៅចំណុចផ្ទះលេខ២៤៤ ផ្លូវលេខៈ៣៧១ ភូមិ៤ សង្កាត់បឹងកេងកង៣ ខណ្ឌចំការមន រាជធានីភ្នំពេញ ឈ្មោះ ឈឺ យ៉ារី បានមកប្រើល្បិចបញ្ចុះបញ្ចូលនាងខ្ញុំ ឲ្យដាក់ប្រាក់វិនិយោគលើការជួញដូររូបិយប័ណ្ណអន្តរជាតិ (Forex trading) ជាមួយខ្លួន(ឈឺ យ៉ារី) ដែលមានទឹកប្រាក់សរុបចំនួន ១០,០០០,០០០$(ដប់លានដុល្លារអាមេរិក) ដើម្បីឲ្យឈ្មោះ ឈី យ៉ារី ធ្វើការជួញដូររូបិយប័ណ្ណអន្តរជាតិ(លេងភាគហ៊ុន)។ ដោយឈ្មោះ ឈី យ៉ារី អះអាងថានឹងទទួលបានប្រាក់ចំណេញខ្ពស់ ដូច្នេះហើយ នាងខ្ញុំបានដាក់ទឹកប្រាក់វិនិយោគតាំងពីឆ្នាំ២០១៨ហូតមកដល់បច្ចុប្បន្ន ដែលមានទឹកប្រាក់ចំនួន១០,០០០,០០០$(ដប់លានដុល្លារអាមេរិក) ក្រោយមកឈ្មោះ ឈឺ យ៉ារី បានយកប្រាក់ទាំងអស់នោះ ហើយគេចខ្លួនបាត់ ហើយគណនីធនាគាររបស់ឈ្មោះ ឈី យ៉ារី នៅធនាគារ ABA គ្មានសាច់ប្រាក់សម្រាប់ទូទាត់ឲ្យនាងខ្ញុំទេ។ ក្រោយមកនាងខ្ញុំបានព្យាយាមទាក់ទងទៅកាន់ឈ្មោះ ឈី យ៉ារី មួយលើក ទៅពីរលើកផងដែរ តែឈ្មោះខាងលើមានចេតនាទុច្ចរិតគេចវេស មិនអាចទាក់ទងបានមករហូតដល់បច្ចុប្បន្ន។
អ្នកស្រី ប៊ុច សុខា សូម លោក ឧត្តមសេនីយ៍ឯក ប្រធាន មេត្តាជួយមានវិធានការចំពោះជនដែលបាន
ប្រព្រឹត្តទៅតាមផ្លូវច្បាប់ ៕ ដោយ៖កូឡាប