ធនាគារជាតិ នៃកម្ពុជា នៅ ថ្ងៃទី ២៩ ខែកក្កដា ឆ្នាំ២០១៨ សេចក្តីបំភ្លឺ ស្តីពី “ទុនបម្រុងអន្តរជាតិ។ ធនាគារជាតិនៃកម្ពុជា សង្កេតឃើញថា សារព័ត៌មានមួយចំនួន បានបកស្រាយខុសពាក់ព័ន្ធនឹង ទុនបម្រុងអន្តរជាតិ។ ការប្រៀបធៀបរវាងទំហំទុនបម្រុងអន្តរជាតិ នឹងចំនួនខែនៃការនាំចូលទំនិញនិងសេវា គឺមានលក្ខណៈបច្ចេកទេស ដើម្បីវាស់វែងពីភាពរឹងមាំនៃសេដ្ឋកិច្ច និងមិនពាក់ព័ន្ធជាមួយនឹងបញ្ហានយោបាយឡើយ។
យោងតាមមូលនិធិរូបិយវត្ថុអន្តរជាតិ (IMF) ទុនបម្រុងអន្តរជាតិនៃប្រទេសមួយ សំដៅលើទ្រព្យសម្បត្តិ ដែលទទួលស្គាល់ជាអន្តរជាតិ ដែលប្រទេសមួយមាន និងត្រូវបានគ្រប់គ្រងដោយអាជ្ញាធររូបិយវត្ថុ សម្រាប់ប្រើក្នុងករណីចាំបាច់ ដូចជា ការផ្តល់ហិរញ្ញប្បទានដល់ជញ្ជីងទូទាត់ប្រសិនបើមានតម្រូវការ, ការធ្វើអន្តរាគមន៍លើទីផ្សារប្តូរប្រាក់ ដើម្បីគ្រប់គ្រងការប្រែប្រួលអត្រាប្តូរប្រាក់និងការរក្សាជំនឿទុកចិត្តលើរូបិយវត្ថុ និងសេដ្ឋកិច្ចជាតិ។ ទុនបម្រងអន្តរជាតិអាចមានទម្រង់ជាមាសនិងរូបិយប័ណ្ណនានាដែល IMF ទទួលស្គាល់ជាអន្តរជាតិ (ដូចជាប្រាក់ដុល្លារអាមេរិក អឺរ៉ូ ផោនអង់គ្លេសយេនជប៉ុន និងយ៉ន់ចិន)។
IMF តែងតែផ្តល់អនុសាសន៍ឱ្យប្រទេសសមាជិក រក្សាកម្រិត ទុនបម្រងអន្តរជាតិឱ្យបានគ្រប់គ្រាន់។ ដើម្បីកំណត់កម្រិតគ្រប់គ្រាន់នេះ IMF តែងតែធ្វើការប្រៀបធៀបទំហំមុនបម្រងអន្តរជាតិទៅនឹងចំនួនខែនៃការនាំចូលទំនិញនិងសេវានៅគ្រាខាងមុខ។ ចំពោះប្រទេសកំពុងអភិវឌ្ឍន៍ដូចកម្ពុជាកម្រិតគ្រប់គ្រាន់អប្បបរមា នៃទុនបម្រុងអន្តរជាតិ ដែលគួរមានគឺចំនួន ៣ ខែនៃការនាំចូលទំនិញនិងសេវានៅគ្រាខាងមុខ។
ចំពោះកម្ពុជាទុនបម្រុងអន្តរជាតិ បានកើនឡើងជាលំដាប់ ហើយបច្ចុប្បន្នមានកម្រិត ៥ ខែនៃការនាំចូលទំនិញនិងសេវា ពោលគឺខ្ពស់ជាង ៣ ខែដែលជាកម្រិតអប្បបរមា ដែលប្រទេសកំពុងអភិវឌ្ឍន៍គួរមាន។ ផ្អែកលើសូចនាករនេះ សេដ្ឋកិច្ចកម្ពុជា កំពុងអភិវឌ្ឍប្រកបដោយចីរភាព នឹងភាពរឹងមាំ៕ ដោយ៖កូឡាប