រដ្ឋាភិបាលចិនបានចោទប្រកាន់ ក្រុមអ្នកតវ៉ាដែលទាមទារប្រជាធិបតេយ្យនៅហុងកុងថា បានប្រព្រឹត្តឧក្រិដ្ឋកម្ម ដែលបានបំផ្លាញយ៉ាងធ្ងន់ធ្ងរដល់កេរ្តិ៍ឈ្មោះ និងស្ថេរភាពរបស់ទីក្រុង។
នៅក្នុងសន្និសិទកាលពីថ្ងៃច័ន្ទម្សិលមិញនេះ អ្នកនាំពាក្យការិយាល័យកិច្ចការហុងកុង និងម៉ាកាវ ឈ្មោះ Yang Guang បានហៅស្ថានភាពនៅទីក្រុងហុងកុងថាធ្ងន់ធ្ងរ ហើយបានបន្ថែមថា ទីក្រុងប៉េកាំងនឹងមិនអនុញ្ញាតិឲ្យមានបញ្ហាប្រឈមទៀតទេដែលគំរាមដល់សន្តិសុខជាតិ ឬការគ្រប់គ្រងរបស់រដ្ឋាភិបាលចិន។
លោកបានបញ្ជាក់ថា រដ្ឋាភិបាលនឹងមិនអនុញ្ញាតិឲ្យមានអំពើហឹង្សាកើតឡើងទៀតទេ និងបានស្នើឲ្យសាធារណៈហុងកុងឲ្យមានការប្រុងប្រយ័ត្នចំពោះស្ថានភាពបច្ចុប្បន្ន។ លោកក៏បានស្នើឲ្យប្រជាជនហុងកុងថ្កោលទោសអំពើហឹង្សារបស់ក្រុមអ្នកតវ៉ាផងដែរ។
លោកបញ្ជាក់ថា “ហុងកុងជារបស់ចិន។ កិច្ចការរបស់ហុងកុងគឺជាកិច្ចការផ្ទៃក្នុងរបស់ចិន”។
នេះជាលើកទីមួយហើយ ដែលការិយាល័យគោលនយោបាយហុងកុងរបស់ចិនបានធ្វើការថ្លែងចំពោះការតវ៉ាទ្រង់ទ្រាយធំ របស់ប្រជាជនហុងកុង ដែលចាប់ផ្តើមកើតមានឡើងកាលពីដើមខែមុថុនា ដើម្បីប្រឆាំងទៅនឹងសេចក្តីស្នើច្បាប់ធ្វើបត្យាប័នដែលអនុញ្ញាតិឲ្យមានការបញ្ជូនជនសង្ស័យទៅកាត់ទោសនៅប្រទេសចិនបាន។
សូមរម្លឹកថា ទីក្រុងហុងកុង ត្រូវបានអង់គ្លេសប្រគល់អោយទៅចិនវិញនៅឆ្នាំ ១៩៩៧ ក្រោយកិច្ចព្រមព្រៀង ប្រទេសមួយ ប្រព័ន្ធពីរ។
អត្ថបទប្រែសម្រួលដោយ៖ សុភ័ក្រ
ប្រភព៖ CNN
