ភ្នំពេញ៖ ការអនុវត្តគោលនយោបាយអភិវឌ្ឍន៍វិស័យឧស្សាហកម្មកម្ពុជា IDP ទទួលបាននូវវឌ្ឍនភាពជាវិជ្ជមានគួរឱ្យកត់សម្គាល់ ដែលត្រូវបានឆ្លុះបញ្ចាំងតាមរយៈការសម្រេចបានជាបន្តបន្ទាប់នូវគោលដៅចម្បងទាំងបី និងវិធានការគន្លឹះបួនជាក់ស្ដែងនៃគោលនយោបាយ IDP។ ជោគជ័យនៃការអនុវត្តគោលនយោបាយ IDP អាចសម្រេចទៅបាន ប្រកបដោយប្រសិទ្ធភាព ដោយមានការចូលរួមអនុវត្តយ៉ាងជិតស្និទ្ធពីសំណាក់តួអង្គពាក់ព័ន្ធទាំងស្ថាប័នជាតិ វិស័យឯកជន និងដៃគូអភិវឌ្ឍន៍។
នៅថ្ងៃទី៣០ ខែកក្កដា ឆ្នាំ២០១៩ នាក្រុមប្រឹក្សាអភិវឌ្ឍន៍កម្ពុជា (ក.អ.ក) លោកជិន ប៊ុនស៊ាន ទេសរដ្ឋមន្ត្រីទទួលបន្ទុកបេសកកម្មពិសេស អនុប្រធាន ក.អ.ក បានដឹកនាំកិច្ចប្រជុំ ដើម្បីពិភាក្សាលើសេចក្ដីព្រាងរបាយការណ៍ស្ដីពីវឌ្ឍនភាពនៃការអនុវត្តគោលនយោបាយអភិវឌ្ឍន៍វិស័យឧស្សាហកម្មកម្ពុជា ឆ្នាំ២០១៥-២០២៥ (IDP) និងកិច្ចការពាក់ព័ន្ធផ្សេងៗ។ កិច្ចប្រជុំនេះ មានការចូលរួមពី លោកសុខ ចិន្ដាសោភា រដ្ឋមន្ត្រីប្រតិភូអមនាយករដ្ឋមន្ត្រី អគ្គលេខាធិការ ក.អ.ក លោកឈៀង យ៉ាណារ៉ា រដ្ឋមន្ត្រីប្រតិភូអមនាយករដ្ឋមន្ត្រី អគ្គលេខាធិការគណៈកម្មាធិការនីតិសម្បទា និងអភិវឌ្ឍន៍កម្ពុជា ព្រមទាំងជាឥស្សរជនតំណាងក្រសួង ស្ថាប័ន និងរដ្ឋបាលថ្នាក់ក្រោមជាតិពាក់ព័ន្ធ ដែលត្រូវបានចាត់តាំងជាមន្ត្រីបង្គោលនិងមន្ត្រីបច្ចេកទេស និងមន្ត្រីនៃលេខាធិការដ្ឋានដឹកនាំនិងសម្របសម្រួលការអនុវត្ត IDP នៃ ក.អ.ក សរុបប្រមាណ ១១០រូប។
ក្នុងបរិការណ៍នេះ លោកទេសរដ្ឋប្រធានអង្គប្រជុំ បានថ្លែងអំណរគុណចំពោះការផ្តល់កិច្ចសហប្រតិបត្តិការល្អ និងការខិតខំប្រឹងប្រែងរបស់ក្រសួង ស្ថាប័ន និងរដ្ឋបាលថ្នាក់ក្រោមជាតិទាំងអស់ ក្នុងការអនុវត្ត IDP នាពេលកន្លងមក។ លោកក៏បានស្នើឱ្យភាគីពាក់ព័ន្ធទាំងអស់ មេត្តាបង្កើនការខិតខំប្រឹងប្រែងបន្ថែមទៀត ដើម្បីជំរុញដល់ការអនុវត្ត IDP ឱ្យកាន់តែមានប្រសិទ្ធភាព និងស័ក្ដិសិទ្ធិភាពនាពេលអនាគត ជាពិសេសត្រៀមរៀបចំការត្រួតពិនិត្យវាយតម្លៃពាក់កណ្ដាលអាណត្តិក្នុងទ្រង់ទ្រាយធំ និងទូលំទូលាយលើគោលនយោបាយនេះនៅឆ្នាំ២០២០ ខាងមុខនេះ៕ ដោយ៖កូឡាប
