ស្វាយរៀង៖ នៅព្រឹកថ្ងៃទី៣១ ខែកក្កដា ឆ្នាំ២០១៩ មានករណីគ្រោះថ្នាក់ចរាចរ បានកើតឡើងដោយរថយន្តដឹកមាន់ ឡើងវ៉ាជែងមិនប្រយ័ត្ន ក៏ទៅបុករថយន្តដឹកកម្មករពេញទំហឹង បណ្តាលឲ្យជនរងគ្រោះចំនួន ៣៥ នាក់រងរបួស នៅចំណុច ស្ថិតនៅភូមិសួនថ្មី សង្កាត់ព្រៃឆ្លាក់ ក្រុងស្វាយរៀង ខេត្តស្វាយរៀង។
នគរបាលមូលដ្ឋាន បានឲ្យដឹងថា ករណីគ្រោះថ្នាក់ចរាចរនេះ ដោយមូលហេតុ រថយន្តដឹកមាន់ ឡើងវ៉ាជែងមិនប្រយ័ត្ន ក៏ទៅបុករថយន្តដឹកកម្មករពេញទំហឹង។ ជនរងគ្រោះបឋមចំនួន ៣៥ នាក់ របួសធ្ងន់ ស្រាល ប្រុស ៥ នាក់ (មិនមានស្លាប់) កំពុងសម្រាកព្យាបាលនៅមន្ទីរពេទ្យបង្អែកខេត្តស្វាយរៀងទាំងអស់។
ភ្នាក់ងារប្រចាំការនៅមន្ទីរពេទ្យបង្អែកនិងមន្ត្រី បុគ្គលិកប.ស.សខេត្តស្វាយរៀងកំពុងចាំសម្របសម្រួលបន្ត។
ប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតមាននូវគ្រោះថ្នាក់ចរាចរនោះ គេឃើញរថយន្ដមួយគ្រឿង ចំណុះ៥តោន ដឹកមាន់រស់ មកពីប្រទេសវៀតណាម បើកបោះពួយយ៉ាងលឿន ក្នុងទិសដៅពីកើតទៅលិច បញ្ច្រាសទិសគ្នាជាមួយនឹងរថយន្ដដឹកកម្មករ ម៉ាកសាំងយ៉ុងមួយគ្រឿង ពណ៌លឿង ពាក់ផ្លាកលេខ កំពង់ស្ពឺ 2A-3239 ក្នុងទិសដៅទៅកាន់ក្រុងបាវិត។ លុះពេលរថយន្ដដឹកកម្មករកម្មការិនី បើកមកដល់ចំណុចកើតហេតុ ស្រាប់តែរថយន្ដដឹកមាន់បានរេចង្កតទៅបុករថយន្ដដឹកកម្មករយ៉ាងពេញទំហឹង ក្រឡាប់ផ្ងារជើងទ្រមេឃ បណ្ដាលឲ្យមនុស្សចំនួន៣៥នាក់រងរបួស ក្នុងនោះមានបុរសចំនួន៥នាក់។
សមត្ថកិច្ចក្រុងស្វាយរៀង បានឲ្យដឹងថា បើតាមព័ត៌មានបឋមដែលសមត្ថកិច្ចទទួលបាន គឺហេតុការណ៍គ្រោះថ្នាក់ចរាចរខាងលើនេះ មានអ្នករងរបួសចំនួន៤៣នាក់ប្រុស១០នាក់។ ប៉ុន្ដែសមត្ថកិច្ចមិនទាន់ដឹងថា របួសធ្ងន់ និងស្រាលប៉ុន្មាននាក់ នៅឡើយ ព្រោះភ្លាមៗនោះ សមត្ថកិច្ចកំពុងរវល់ បញ្ជូនអ្នករងរបួសទៅសង្រ្គោះ នៅក្នុងមន្ទីរពេទ្យ ។ ដោយ៖វ៉ៃកូ
