ភ្នំពេញ ៖ កម្ពុជាសូមស្វាគមន៍ដំណើរទស្សនកិច្ចផ្លូវការរបស់ លោក លី គឺឈាំង (Li Keqiang) នាយករដ្ឋមន្ត្រី នៃសាធារណរដ្ឋប្រជាមានិតចិន ដែលអមដំណើរមកជាមួយអ្នកវិនិយោគចិន ជាច្រើនរូបមករកឱកាសវិនិយោគនៅកម្ពុជា នាសប្តាហ៍ក្រោយ។
យោងតាមសេចក្តីជូនដំណឹងរបស់ក្រសួងការបរទេសនិងកិច្ចសហប្រតិបត្តិការអន្តរជាតិកម្ពុជា កាលពីថ្ងៃទី២ខែមករាឆ្នាំ២០១៨ បានឲ្យដឹងថា ក្នុងឆ្នាំថ្មីឆ្នាំ២០១៨នេះ កម្ពុជានឹងទទួលបានកំណើនវិនិយោគទុនបរទេសថ្មីៗបន្ថែមទៀត ដែលជាកត្តាជំរុញកំណើនសេដ្ឋកិច្ចកម្ពុជាអោយរីកចម្រើនយ៉ាងឆាប់រហ័ស។ ដំណើរទស្សនកិច្ចរបស់នាយករដ្ឋមន្ត្រីនៃសាធារណរដ្ឋប្រជាមានិតចិន មកកម្ពុជា គឺដើម្បីចូលរួមកិច្ចប្រជុំ មេគង្គ-ឡានឆាងលើកទី២ ដែលកម្ពុជានឹងធ្វើជាម្ចាស់ផ្ទះចាប់ពីថ្ងៃទី១០ ដល់ថ្ងៃទី១២ ខែមករា ឆ្នាំ២០១៨។ កិច្ចប្រជុំនេះនឹងមានថ្នាក់ដឹកនាំប្រទេសជាប់ដងទន្លេមេគង្គ៤ផ្សេងទៀតចូលរួមផងដែរ រួមមាន៖ ថៃ វៀតណាម ឡាវ និងមីយ៉ាន់ម៉ា។
បើតាមសម្តេចតេជោ ហ៊ុន សែន សរសេរក្នុងផេកហ្វេសប៊ុកផ្លូវការ កាលពីថ្ងៃទី២ខែមករាឆ្នាំ២០១៨ថា ចូលឆ្នាំសកលថ្មី ២០១៨ គឺកម្ពុជាកំពុងតែបោះជំហានទៅមុខ ជាមួយនឹងការីកចម្រើន ដែលជាមោទនភាពរបស់ជាតិទាំងមូល។ ដោយសាស្ថេរភាពនយោបាយ និងលំនឹងនៃកំណើនសេដ្ឋកិច្ចជាតិ កម្ពុជាយើងបានទាក់ទាញ វិនិយោគទុនបរទេសជាច្រើន ជាពិសេសមកពីប្រទេសចិនជាមិត្ត។
សម្តេចតេជោ បញ្ជាក់ថា នៅសប្តាហ៍ក្រោយនេះ យើងនឹងទទួលស្វាគមន៍ លោកនាយករដ្ឋមន្ត្រីចិន លី គឺឈាំង (Li Keqiang) ដែលនឹងអញ្ជើញមកទស្សនៈកិច្ចជាផ្លូវការនៅកម្ពុជា។ ជាមួយគ្នានេះដែរ នឹងមានអ្នកវិនិយោគគិនចិនជាច្រើនមករកឱកាសបណ្តាក់ទុនវិនិយោគនៅក្នុងប្រទេសយើងផងដែរ។
សម្តេចតេជោ បានថ្លែងថា “ខ្ញុំ និងភរិយាសូមអរគុណ និងសូមជូនពរបងប្អូនជនរួមជាតិ ជួបតែសេចក្តីសុខ និងសំណាងល្អ។ ឆ្នាំថ្មី ២០១៨ គឺកម្ពុជានឹងបន្តរីកចម្រើនទៅមុខទាំងអស់គ្នាក្រោមដំបូលសន្តិភាព និងម្លប់ដ៏ត្រជាក់នៃព្រះមហាក្សត្រនៃព្រះរាជា ណាចក្រកម្ពុជា”៕ ដោយ៖កូឡាប
