ប្រទេសកូរ៉េខាងជើង នៅព្រឹកថ្ងៃពុធនេះ បានធ្វើការបាញ់មីស៊ីលរយៈចំងាយខ្លី ចំនួន ២គ្រាប់ទៅសមុទ្រខាងកើត ឬហៅថាសមុទ្រជប៉ុន។ នេះបើតាមការបញ្ជាក់របស់យោធាកូរ៉េខាងត្បូង។
នេះគឺជាការបាញ់មីស៊ីលលើកទី ២ ហើយរបស់កូរ៉េខាងជើង ក្នុងរយៈពេលត្រឹមមួយសប្តាហ៍ប៉ុណ្ណោះ។
មីស៊ីលត្រូវបានបាញ់នៅម៉ោង ៥ព្រឹក ម៉ោងនៅកូរ៉េខាងជើង ចេញពីតំបន់ Kalma ស្ថិតនៅក្បែរកំពង់ផែ Wonsan។
មីស៊ីលនោះហោះបានចំងាយ ២៥០គីឡូម៉ែត្រ និងហោះបានកម្ពស់ ៣០គីឡូម៉ែត្រ មុនពេលវាធ្លាក់ចូលក្នុងសមុទ្រជប៉ុន។
រដ្ឋមន្រ្តីក្រសួងការពារជាតិកូរ៉េខាងត្បូង លោក Jeong Kyeong-doo បញ្ជាក់ថា មីស៊ីកូរ៉េខាងជើងបាញ់លើកនេះ ខុសពីប្រភេទមីស៊ីលលើកមុន។
នាយករដ្ឋមន្រ្តីជប៉ុន Shinzo Abe បានធ្វើការបញ្ជាក់ថា មិនមានការប៉ះពាល់ដល់សន្តិសុខរបស់ជប៉ុននោះឡើយ ចំពោះការបាញ់របស់កូរ៉េខាងជើង។
សូមបញ្ជាក់ថា កាលពី ៦ថ្ងៃមុន កូរ៉េខាងជើងបានធ្វើការបាញ់សាកល្បងមីស៊ីលរយៈចំងាយខ្លីដែរ ហើយបានហោះធ្លាក់នៅក្នុងសមុទ្រជប៉ុន។
កូរ៉េខាងជើងថាការបាញ់នោះជាការផ្ញើសារព្រមានទៅដល់កូរ៉េខាងត្បូង ក្រោយពេលកូរ៉េខាងត្បូង និងអាមេរិចបានប្រកាសពីការធ្វើសមយុទ្ធរួមគ្នាឡើងវិញ នៅខែក្រោយ។ កូរ៉េខាងជើងចាត់ទុកសមយុទ្ធរួមគ្នារវាងអាមេរិច និងកូរ៉េខាងត្បូងថា ជាការហាត់សមដើម្បីត្រៀមលុកលុយកូរ៉េខាងជើង៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC