ខេត្តព្រះសីហនុ៖ កម្លាំងកងរាជអាវុធហត្ថស្រុកកំពង់សិលា បានឲ្យដឹងថា កាលពីព្រឹកថ្ងៃទី៣១ ខែកក្កដា ឆ្នាំ២០១៩នេះ មានគ្រោះថ្នាក់ចរាចរមួយករណីកើតឡើង រវាងរថយន្តកុងតឺនរ័ ១គ្រឿង បានបើកលឿនវ៉ាជែងគ្នា ប៉ុន្តែវ៉ាមិនផុត ក៏ជ្រុលទៅបុកជាមួយរថយន្តដឹកគ្រួសថ្ម បើកបរបញ្ច្រាសទិសគ្នា បណ្តាលឲ្យក្រឡាប់ផ្ងាជើងច្រងាងលើផ្លូវជាតិលេខ៤។ ហើយថា គ្រោះថ្នាក់នេះ មិនមានមនុស្សរងគ្រោះដល់អាយុជីវិតទេគ្រាន់តែរបួសធ្ងន់ ស្រាលតែប៉ុណ្ណោះ។
សមត្ថកិច្ចកងរាជអាវុធហត្ថបន្តថា គ្រោះថ្នាក់ចរាចរខាងលើនេះ បានកើតឡើងលើផ្លូវជាតិលេខ៤ ចន្លោះគីឡូម៉ែត្រលេខ ១៤៩-១៥០ ស្ថិតក្នុងភូមិអូរជ្រៅ ឃុំបឹងព្រាវ ស្រុកស្រែអំបិល ខេត្តកោះកុង គឺនៅជាប់ព្រំប្រទល់ម្ខាងផ្លូវ ជាមួយស្រុកកំពង់សិលាខេត្តព្រះសីហនុ នៅវេលាម៉ោង ៧កន្លះ ព្រឹកថ្ងៃទី៣១ ខែកក្កដាឆ្នាំ២០១៩ ។
សមត្ថកិច្ចកម្លាំងកងរាជស្រុកកំពង់សិលា បញ្ជាក់ថា គ្រោះថ្នាក់ចរាចរនេះកើតឡើង រវាងរថយន្តដឹកកុងតឺន័រ ម៉ាក Fuso ក្បាលព៌ណត្រួយចេក របស់ក្រុមហ៊ុនផែស្ងួតតេងឡាយ ពាក់ផ្លាកលេខ ភ្នំពេញ 3E-4842 បើកបរមានទិសដៅ ចេញពីខេត្តព្រះសីហនុ ឆ្ពោះទៅរាជធានីភ្នំពេញ។ រថយន្តនេះ មានអ្នកបើកបរឈ្មោះ សឿន រស្មី ភេទប្រុស អាយុ ២៧ឆ្នាំ រស់នៅភូមិតាំងធ្នង់ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។
សមត្ថកិច្ចបន្តថា លុះរថយន្តបើកមកដល់ចំណុចកើតហេតុ រថយន្តផ្ទុកកុងតឺន័រនោះ ក៏បានបើកវ៉ាជែង រថយន្តមួយគ្រឿងទៀត ក្នុងស្ថានភាពផ្លូវកោង និងមានល្បឿនលឿន រួចក៏ជ្រុលទៅបុកប៉ះ ជាមួយរថយន្តបែន ម៉ាកហ៊ីណូ ក្បាលព៌ណស ពាក់ផ្លាកលេខ ភ្នំពេញ 3E-1712 ក្នុងទិសដៅបញ្ច្រាសទិសគ្នា។ រថយន្តមួយគ្រឿងនេះ បើកបរដោយឈ្មោះ កន សាវាត ភេទប្រុស អាយុ ២៥ឆ្នាំ រស់នៅភូមិទូល ឃុំស្វាយរំពារ ស្រុកបសេដ្ឋ ខេត្តកំពង់ស្ពឺ។
សមត្ថកិច្ចកងរាជអាវុធហត្ថស្រុកកំពង់សិលា បញ្ជាក់ថា ហេតុការណ៍គ្រោះថ្នាក់ចរាចរនេះ មិនមានមនុស្សរងគ្រោះថ្នាក់ដល់អាយុជីវិតនោះទេ។
គ្រោះថ្នាក់ចរាចរណ៍នេះ ត្រូវកម្លាំងអាវុធហត្ថស្នាក់ការសន្តិសុខ ៤០២ សហការជាមួយនគរបាល របស់អធិការដ្ឋាននគរបាលស្រុកស្រែអំបិល បានចុះទៅការពារកន្លែងកើតហេតុ និងជួយសម្រួលចរាចរណ៍ ដើម្បីបញ្ចៀសការកកស្ទះដល់ការធ្វើដំណើរ របស់ប្រជាពលរដ្ឋ។
បច្ចុប្បន្ននេះ រថយន្តទាំងពីរបង្កគ្រោះថ្នាក់ចរាចរខាងលើ បានខូចខាតស្ទើរទាំងស្រុង ហើយភ្លាមៗ សមត្ថកិច្ចក៏មិនទាន់អាច យកចេញពីកន្លែងកើតហេតុបាននៅឡើយទេ ដោយរងចាំ រថយន្តស្ទូចមកជួយអន្តរាគន៍ស្ទូចយកចេញពីផ្លូវជាតិលេខ៤៕ ដោយ៖ ដែន សីមា
