បាងកក៖ នៅរសៀលថ្ងៃទី ៣០ ខែកក្កដា ឆ្នាំ ២០១៩ លោកឧបនាយករដ្ឋមន្រ្តី ប្រាក់ សុខុន បានអញ្ជើញចូលរួមក្នុងកិច្ចប្រជុំគណៈកម្មការតំបន់អាស៊ីអគ្នេយ៍គ្មានអាវុធនុយក្លែអែរ ដែលកិច្ចប្រជុំនេះ ផ្តោតគោលបំណងក្នុងការរក្សាតំបន់អាស៊ីអគ្នេយ៍ ជាតំបន់ដែលមិនមានអាវុធប្រល័យលោក។
នៅព្រឹកថ្ងៃទី ៣១ ខែកក្កដា ឆ្នាំ ២០១៩ លោកឧបនាយករដ្ឋមន្រ្តី ប្រាក់ សុខុន និង រដ្ឋមន្រ្តីការបរទេសអាស៊ាននានា បានអញ្ជើញចូលជួបសម្តែងការគួរសម ជាមួយលោក ប្រាយុទ្ធ ច័ន្ធអូចា នាយករដ្ឋមន្រ្តីថៃ ក្នុងឱកាសដែលរដ្ឋមន្រ្តីការបរទេសអាស៊ានកំពុងជួបប្រជុំក្នុងកិច្ចប្រជុំលើកទី ៥២ នៅទីក្រុងបាងកក ពីថ្ងៃទី ៣០ ខែកក្កដា ដល់ថ្ងៃទី ០៣ ខែសីហា ឆ្នាំ ២០១៩ នៅទីក្រុងបាងកក។
នៅរសៀលថ្ងៃទី ៣០ ខែកក្កដា ឆ្នាំ ២០១៩ នៅមុនពេលចាប់ផ្តើមកិច្ចប្រជុំរដ្ឋមន្រ្តីការបរទេសអាស៊ានលើកទី ៥២ និងកិច្ចប្រជុំពាក់ព័ន្ធ នៅទីក្រុងបាងកក លោកឧបនាយករដ្ឋមន្រ្តី ប្រាក់ សុខុន បានជួបពិភាក្សាការងារជាមួយសមភាគីចិន លោក ទីប្រឹក្សារដ្ឋ វ៉ាង យី រដ្ឋមន្រ្តីការបរទេសនៃសាធារណរដ្ឋប្រជាមានិតចិន។ កិច្ចពិភាក្សាផ្តោតទៅលើការពង្រឹងចំណងកិច្ចសហប្រតិបត្តិការទេ្វភាគី និងការផ្លាស់ប្តូរទស្សនៈជុំវិញបញ្ហាប្រឈមនានា នៅក្នុងតំបន់ និងអន្តរជាតិ។
លោក ប្រាក់ សុខុន ឧបនាយករដ្ឋមន្រ្តី រដ្ឋមន្រ្តីការបរទេសខ្មែរ នៅថ្ងៃទី៣០ កក្កដានេះ បានដឹកនាំគណៈប្រតិភូ អញ្ជើញទៅចូលរួមកិច្ចប្រជុំ រដ្ឋមន្រ្តីការបរទេសអាស៊ាន លើកទី៥២និងកិច្ចប្រជុំពាក់ព័ន្ធ ចាប់ពីថ្ងៃទី៣០ ខែកក្កដា ដល់ថ្ងៃទី៣ ខែសីហា ឆ្នាំ២០១៩ នៅទីក្រុងបាងកក តបតាមការអញ្ជើញរបស់លោក ដូន ប្រាំម៉ូដវីណៃ រដ្ឋមន្រ្តីការបរទេសថៃ ។
យោងតាមសេចក្ដីប្រកាសព័ត៌មាន របស់ក្រសួងការបរទេស នៅថ្ងៃទី២៧ កក្កដា បានឲ្យដឹងថា លោកឧបនាយករដ្ឋមន្រ្តី ប្រាក់ សុខុន រួមជាមួយរដ្ឋមន្រ្តីការបរទេស អាស៊ានដទៃទៀត នឹងអញ្ជើញចូលជួប សម្ដែងការគួរសមជាមួយ លោក ប្រាយុទ្ធ ច័ន្ទអូឆា នាយករដ្ឋមន្រ្តីនៃព្រះរាជាណាចក្រថៃ។
ក្រោមមូលបទ “ជំរុញភាពជាដៃគូសម្រាប់ចីរភាព” កិច្ចប្រជុំរដ្ឋមន្រ្តីការបរទេស អាស៊ានលើកទី៥២ និងកិច្ចប្រជុំពាក់ព័ន្ធ នឹងផ្តោតជាសំខាន់ទៅលើការលើកកម្ពស់កិច្ចសហប្រតិបត្តិការ ដើម្បីជំរុញបន្ថែមទៀតនូវដំណើរការ កសាងសហគមន៍អាស៊ាន និងការពង្រឹងនិម្មាបនកម្មតំបន់ ដែលផ្តោតទៅលើមជ្ឈភាពអាស៊ាន ក៏ដូចជាការពង្រីកភាពជាដៃគូជាមួយដៃគូសន្ទនាអាស៊ាន និងភាគីខាងក្រៅ ។
លោក ឧបនាយករដ្ឋមន្រ្តី ប្រាក់ សុខុន នឹងចូលរួមកិច្ចប្រជុំ ដូចខាងក្រោម៖
ជំនួបរវាងរដ្ឋមន្រ្តីការបរទេសអាស៊ាន ជាមួយគណៈកម្មការអន្តររដ្ឋាភិបាល អាស៊ានស្តីពីសិទ្ធិមនុស្ស
-កិច្ចប្រជុំគណៈកម្មការតំបន់ អាស៊ីអាគ្នេយ៍គ្មានអាវុធនុយក្លេអ៊ែរ
-កិច្ចប្រជុំរដ្ឋមន្រ្តីការបរទេស អាស៊ានលើកទី៥២
-សន្និសីទក្រោយ កិច្ចប្រជុំរដ្ឋមន្រ្តីការបរទេស ជាមួយដៃគូសន្ទនាទាំង១០ របស់អាស៊ាន
-កិច្ចប្រជុំរដ្ឋមន្រ្តីការបរទេស អាស៊ានបូកបីលើកទី២០
-កិច្ចប្រជុំរដ្ឋមន្រ្តីការបរទេស នៃកិច្ចប្រជុំកំពូលអាស៊ី-បូព៌ាលើកទី៩ និង
-វេទិកាតំបន់អាស៊ានលើកទី២៦ ។
ក្នុងនាមជាប្រទេសសម្របសម្រួល សម្រាប់ទំនាក់ទំនងដៃគូសន្ទនា អាស៊ាន-នូវែលហ្សេឡង់ (២០១៨-២០២១) លោកឧបនាយករដ្ឋមន្រ្តី ប្រាក់ សុខុន នឹងធ្វើជាសហប្រធានជាមួយលោក វីនស្តុន ភីទ័រ ឧបនាយករដ្ឋមន្ត្រី និងជារដ្ឋមន្រ្តីការបរទេស និងពាណិជ្ជកម្មនូវែលហ្សេឡង់ ក្នុងកិច្ចប្រជុំ “សន្និសីទក្រោយកិច្ចប្រជុំរដ្ឋមន្រ្តីការបរទេស ជាមួយនិងនូវែលហ្សេឡង់” ។
ស្របពេលជាមួយកិច្ចប្រជុំ រដ្ឋមន្រ្តីការបរទេសអាស៊ាននេះ លោកឧបនាយករដ្ឋមន្រ្តី ប្រាក់ សុខុន រួមជាមួយរដ្ឋមន្រ្តីការបរទេសអាស៊ានផ្សេងទៀត នឹងអញ្ជើញធ្វើជាសាក្សី ក្នុងពិធីចុះហត្ថលេខាលើលិខិតុបករណ៍ នៃការចូលជាសមាជិក នៃសន្ធិសញ្ញាមិត្តភាព និងកិច្ចសហប្រតិបត្តិការ នៅក្នុងតំបន់អាស៊ីអាគ្នេយ៍ ដោយសាធារណរដ្ឋប៉េរូ និងសាធារណរដ្ឋអាហ្រ្វិកខាងត្បូង។ លោកឧបនាយករដ្ឋមន្រ្តី ក៏នឹងអញ្ជើញចូលរួមក្នុងពិធី សម្ពោធដាក់ឲ្យដំណើរការកម្មវិធី អាហារូបករណ៍សម្រាប់ថ្នាក់ដឹកនាំ វ័យក្មេងអាស៊ាន-ចិន និង គំនិតផ្តួចផ្តើមអាស៊ាន-អូស្រ្តាលី ប្រយុទ្ធប្រឆាំងនឹងការជួញដូរ។
ក្រៅពីការអញ្ជើញចូលរួម កិច្ចប្រជុំរដ្ឋមន្រ្តីការបរទេសអាស៊ាន លោក ប្រាក់ សុខុន នឹងចូលរួមកិច្ចប្រជុំដទៃទៀត ដូចខាងក្រោម៖
-កិច្ចប្រជុំរដ្ឋមន្រ្តីការបរទេស គំនិតផ្តួចផ្តើមមេគង្គក្រោម លើកទី១២
-កិច្ចប្រជុំរដ្ឋមន្រ្តីការបរទេសនៃកិច្ចសហប្រតិបត្តិការមេគង្គ-គង្គា លើកទី១០
-កិច្ចប្រជុំរដ្ឋមន្រ្តីការបរទេសមេគង្គ-សាធារណរដ្ឋកូរ៉េ លើកទី៩ និង
-កិច្ចប្រជុំរដ្ឋមន្រ្តីការបរទេសមេគង្គ-ជប៉ុន លើកទី១២។
ក្នុងអំឡុងពេលស្នាក់នៅ ទីក្រុងបាងកក លោក ប្រាក់ សុខុន នឹងជួបពិភាក្សាទ្វេភាគីដោយឡែកពីគ្នា ជាមួយ លោក វីនស្តុន ភីទ័រ ឧបនាយករដ្ឋមន្ត្រី និងជារដ្ឋមន្រ្តីការបរទេស និងពាណិជ្ជកម្ម នូវែលហ្សេឡង់ លោក វ៉ាង យី ទីប្រឹក្សារដ្ឋ និងជារដ្ឋមន្ត្រីការបរទេស សាធារណរដ្ឋប្រជាមានិតចិន លោក តារ៉ូ កូណូ រដ្ឋមន្រ្តីការបរទេសជប៉ុន លោកស្រី អ៊ីណេ ម៉ារី អេរិកសិន រដ្ឋមន្រ្តីការបរទេសន័រវែស ព្រមទាំងប្រមុខនៃគណៈប្រតិភូ នៃប្រទេសមួយចំនួនទៀតផងដែរ ៕ ដោយ៖កូឡាប
