តាកែវ៖ ថ្លែងនៅក្នុងពិធីប្រកាសតែងតាំង ផ្ទេរភារកិច្ច និងបំពាក់ឋានន្តរស័ក្តិជូនដល់មន្ត្រីនគរបាលជាតិ នៃស្នងការដ្ឋានខេត្តតាកែវ ជិត ២០០នាក់ នាព្រឹកថ្ងៃទី៣១ ខែកក្កដា ឆ្នាំ២០១៩នេះ លោកឧត្តមសេនីយ៍ឯក ហាវ ចាន់សិទ្ធី អនុប្រធាន នាយកដ្ឋានបុគ្គលិក នៃក្រសួងមហាផ្ទៃ បានជំរុញឲ្យស្នងការនគរបាលខេត្តតាកែវ លោកឧត្តមសេនីយ៍ទោ សុខ សំណាង ពីនិត្យទៅលើមន្ត្រីនគរបាលចាស់ៗ ដែលមានប្រវត្តិតស៊ូបម្រើការងារពីមុនមក ដើម្បីដំឡើងឋាន្តនរស័ក្តិជូនពួកគាត់ ជាការលើកទឹកចិត្ត ព្រោះថាពីមុនៗមក គឺមានតែពួកគាត់ទាំងនេះហើយ ដែលជាអ្នកអនុវត្តន៍ការងារដែលថ្នាក់លើដាក់ឲ្យ ។
លោកឧត្តមសេនីយ៍ឯក ហាវ ចាន់សិទ្ធី បានមានប្រសាសន៍បន្តថា យើងជាមន្ត្រីនគរបាលត្រូវប្រកាន់ខ្ជប់លើវិន័យរបស់អង្គភាព ហើយ ក្រុមប្រឹក្សាវិន័យ គឺត្រូវតែអនុវត្តន៍ និងតាមមើលជាប្រចាំលើការងារល្មើសវិន័យរបស់មន្ត្រីនគរបាល ណាដែលបានធ្វើខុស ដូច្នេះមន្ត្រីនគរបាលទាំងអស់ត្រូវបន្តអនុវត្តន៍និងគោរពទៅតាមបញ្ជារបស់ថ្នាក់ដឹកនាំ និងគោរពទៅតាមវិន័យរបស់អង្គភាព ។
ក្នុងនោះដែរលោក ខាន់ សុខា អភិបាលរងខេត្តតាកែវ បានមានប្រសាសន៍ លើកទឹកចិត្តដល់កងកម្លាំងទាំងអស់ ដែលទើបតែទទួលបានតួនាទី និងឋានន្តរស័ក្តិថ្មី ដែលទទួលបានការលើកទឹកចិត្តពីថ្នាក់លើ ត្រូវតែបន្តអនុវត្តន៍ការងារនេះឲ្យបានល្អបន្ថែមទៀត ពិសេសត្រូវរក្សាឲ្យបាននៅគោលនយោបាយភូមិឃុំមានសុវត្ថិភាព ខណៈដែលបច្ចុប្បន្ននេះ មានចំណុចពីរ ធំលើការងាររបស់កងកម្លាំង គឺការងារចរាចរណ៍ផ្លូវគោក និងការបង្ការនិងបង្ក្រាបករណីគ្រឿងញៀន ។ ដែលចំណុចទាំងពីរនេះ បាននិងកំពុងតែក្លាយជាបញ្ហាប្រឈមខ្លាំង ដូច្នេះកងកម្លាំងនគរបាលទាំងអស់ ត្រូវតែប្រឹងប្រែងបន្ថែមទៀត ធ្វើយ៉ាងណារក្សាឲ្យបាននៅក្នុងមូលដ្ឋានរបស់យើង គ្មានគ្រឿងញៀន គ្មានគ្រោះថ្នាក់ចរាចរ និងពោរពេញទៅដោយប្រជាពលរដ្ឋដែលចេះគោរពច្បាប់ ។
សូមបញ្ជាក់ផងដែរថា ក្នុងពិធីប្រកាសតែងតាំង ផ្ទេរភារកិច្ច ផ្លាស់ប្តូរមុខតំណែង និងបំពាក់ឋានន្តរស័ក្តិថ្មីនេះដែរ មានប្រកាសចូលជាស្នងការរងខេត្តតាកែវ ចំនួន ៥នាក់ និងបំពាក់ឋានន្តរស័ក្តិចាប់ពីថ្នាក់វរសេនីយ៍ឯក ចុះមកដល់ថ្នាក់ព្រិលបាលឯក ចំនួន ១៩៨នាក់ ៕ដោយ៖ តាកែវ
