ភ្នំពេញ៖ នៅរសៀលថ្ងៃពុធ ទី៣១ ខែកក្កដា ឆ្នាំ២០១៩ នៅសាលប្រជុំរបស់ស្នងការដ្ឋាននគរបាលរាជធានីភ្នំពេញ បានបើកកិច្ចប្រជុំប្រចាំខែក្រោមប្រធានបទ ផែនការបង្ការ ទប់ស្កាត់ និងបង្ក្រាបអំពើលួច ឆក់ នៅរាជធានីភ្នំពេញ ក្រោមអធិបតេយ្យភាពរបស់លោក នាយឧត្តមសេនីយ៍ ហ៊ឹម យ៉ាន អគ្គស្នងការរងទទួលផែនការងារនគរបាលសណ្តាប់ធ្នាប់ និង លោក ឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ ព្រមទាំងមានការចូលរួមពីសំណាក់ លោកប្រធាន អនុប្រធាននាយកដ្ឋាន លោក លោកស្រី ស្នងការរង នាយ នាយរងការិយាល័យ អធិការ អធិការរង និងមន្ត្រីពាក់ព័ន្ធជាច្រើនរូបទៀត។
ក្នុងឱកាសនោះ លោកប្រធាននាយកដ្ឋានព្រហ្មទណ្ឌក៏បានឡើងចូលរួមផ្តល់មតិល្អៗមួយចំនួន ជាមួយនោះដែរ លោកស្នងការងទទួលផែនព្រហ្មទណ្ឌ និងលោកអធិការនគរបាលខណ្ឌមួយចំនួន នៃស្នងការដ្ឋាននគរបាលរាជធានីភ្នំពេញ ក៏បានឡើងមានមតិបង្ហាញពីលទ្ធផលនៃការបង្ក្រាបបទល្មើស និងវិធានការណ៍ផ្សេងៗទៀត ដើម្បីបង្ការទប់ស្កាត់បទល្មើសនានា តាមបណ្តាខណ្ឌរបស់គាត់ផងដែរ។
លោក អគ្គស្នងការរង និងជាស្នងការនគរបាលរាជធានីភ្នំពេញ បានធ្វើការណែនាំ និងផ្តល់អនុសាសន៍ល្អៗមួយចំនួន ដើម្បីជួយជំរុញឲ្យផែនការនេះ អនុវត្តន៍បានកាន់តែប្រសើរឡើង និងទទួលបានជោគជ័យ។
ជាកិច្ចបញ្ចប់ លោក នាយឧត្តមសេនីយ៍ ហ៊ឹម យ៉ាន ក៏បានមានមតិសរសើរដល់កងកម្លាំងទាំងអស់ ដែលបានធ្វើការសហការយ៉ាងល្អ ដើម្បីចូលរួមបង្ការ ទប់ស្កាត់ និងបង្រ្កាបបទល្មើសលួច ឆក់ ហើយលោកសុំឲ្យកម្លាំងពាក់ព័ន្ធទាំងអស់ ខិតខំឲ្យបានសកម្មបន្ថែមទៀត ដើម្បីបង្ការ ទប់ស្កាត់ និងបង្ក្រាប បទល្មើសឲ្យកាន់តែប្រសើរឡើង៕
