ខេត្តស្វាយរៀងៈ លោក ទ្រី ម៉េង រដ្ឋលេខាធិការក្រសួងអភិវឌ្ឍន៍ជនបទ និងលោកលោក តូច ប៉ូលីវ៉ា អភិបាលរងខេត្តស្វាយរៀង នាព្រឹកថ្ងៃទី៣១ ខែកក្កដា ឆ្នាំ២០១៩នេះ បានអញ្ជើញជាអធិបតី នៅក្នុងពិធីប្រកាសទទួល ស្គាល់ជាផ្លូវការស្រុករំដួល ជាស្រុកបានបញ្ឈប់បន្ទោបង់ពាសវាលពាសកាល (ODF District)។
ពិធីនេះក៏មានការចូលរួមពីលោក លោកស្រី ប្រធាន-អនុប្រធានមន្ទីរនានាជុំវិញខេត្ត លោកអភិបាល អភិបាលរងក្រុង-ស្រុកទាំង៨ លោក លោកស្រីប្រធានអង្គការ និងដៃគូនានា លោកមេឃុំ មេភូមិ កងកម្លាំងនគរបាល លោកគ្រូ-អ្នកគ្រូ សិស្សានុសិស្ស និងប្រជាពលរដ្ឋជាច្រើនរូបទៀត ។
លោក ទ្រី ម៉េង រដ្ឋលេខាធិការក្រសួងអភិវឌ្ឍន៍ជនបទ បានសម្តែងនូវការកោតសរសើរចំពោះ ថ្នាក់ដឹកនាំនិងមន្ត្រីជំនាញ ខេត្តអាជ្ញាធរស្រុក-ឃុំ មេភូមិ ជនបង្គោលអនាម័យភូមិ-ឃុំ និងបងប្អូនប្រជាពលរដ្ឋនៅក្នុងស្រុករំដួលទាំងមូល ដែលបានខិតខំប្រឹងប្រែងរួមសហការនាំ ឲ្យសម្រេចបានផលជាផ្លែផ្កាប្រកបដោយកិត្តិយសល្អប្រសើរ នេះពិតជាបានរួមចំណែកយ៉ាងធំធេងជាមួយរាជរដ្ឋាភិបាលក្រោមការដឹកនាំប្រកបដោយគតិបណ្ឌិត របស់សម្ដេចតេជោ ហ៊ុន សែន ដែលគណៈកម្មការបានវាយតម្លៃទទួលស្គាល់ស្រុករំដួល ជាផ្លូវការ ក្លាយគំរូទី២ ក្នុងខេត្តស្វាយរៀង សម្រេចបានបញ្ឈប់បន្ទោបង់ពាសវាលពាសកាល (ODF District) ។
លោក តូច ប៉ូលីវ៉ា អភិបាលរងខេត្ត បានមានប្រសាសន៍ថា: ការសម្រេចបាននូវការបញ្ឈប់បន្ទោបង់ពាសវាលពាសកាល នៅស្រុកចំនួន២ ឃុំចំនួន២៩ និងភូមិចំនួន៣៣៣ នៅទូទាំងខេត្ត បច្ចុប្បន្ននេះពលរដ្ឋមានប្រភពទឹកប្រើប្រាស់ចំនួន៩៩,៤% និងអត្រាប្រជាពលរដ្ឋប្រើប្រាស់ទឹកមានសុវត្ថិភាពចំនួន៨៥,៨% អត្រាប្រជាពលរដ្ឋប្រើប្រាស់បង្គន់អនាម័យចំនួន៩០% និងគ្រួសារដែលសាងសង់ និងទម្លាប់លាងដៃជាមួយសាប៊ូចំនួន៨៩% ។
ឆ្លៀតក្នុងឱកាសនោះលោកអភិបាលរងខេត្ត ក៏បានអំពាវនាវ និងសំណូមពរដល់បងប្អូនប្រជាពលរដ្ឋទាំងអស់ក្នុងខេត្តស្វាយរៀង មេត្តាចូលរួមឲ្យបានផុសផុលថែមទៀត ដើម្បីផ្ដើមចេញពីខ្លួនឯង គ្រួសារ និងសហគមន៍ ដើម្បីផ្លាស់ប្ដូរទម្លាប់ពីការបន្ទោបង់ពាសវាលពាសកាល មកសាងសង់បង្គន់អនាម័យប្រើប្រាស់ហូបទឹកស្អាត លាងដៃជាមួយសាប៊ូ ព្រមទាំងជួយណែនាំអប់រំផ្សព្វផ្សាយបងប្អូនប្រជាពលរដ្ឋនៅមូលដ្ឋានរបស់ខ្លួន ដើម្បីទទួលបានភាពរីកចម្រើនប្រកបដោយសុខុមាលភាពទាំងអស់គ្នា ៕ ដោយ៖ វ៉ៃកូ
