ភ្នំពេញ៖ ថ្ងៃទី៣១ ខែកក្កដា ឆ្នាំ២០១៩លោកទេសរដ្ឋមន្ត្រី ស៊ុន ចាន់ថុល បានអញ្ជើញដឹកនាំកិច្ចប្រជុំប្រចាំខែកក្កដា ឆ្នាំ២០១៩ ដោយមានការចូលរួមពី ថ្នាក់ដឹកនាំក្រសួង និងមន្ត្រីរាជការមកពីអង្គភាពក្រោមឱវាទផងដែរ។
កិច្ចប្រជុំនេះផ្តោតជាសំខាន់លើស្ថានភាពនៃការគ្រប់គ្រងកំពង់ផែនៅកម្ពុជា សក្កានុពលនៃការដឹកជញ្ជូនតាមផ្លូវទឹក គោលការណ៍ ផែនការ និងបទដ្ឋានគតិយុត្ត និងគម្រោងរៀបចំប្រព័ន្ធស្វ័យប្រវត្តិកម្ម Port EDI ដែលបច្ចុប្បន្នបានឈានដល់ដំណាក់កាលដោះស្រាយបច្ចេកទេស តាមគម្រោងប្រព័ន្ធនេះគ្រោងនឹងដាក់ឱ្យដំណើរការសាកល្បងនៅឆ្នាំ២០២១ ខាងមុខ។
លោកទេសរដ្ឋមន្ត្រី បានណែនាំឱ្យមន្ត្រីជំនាញពាក់ព័ន្ធគិតគូរពីសុវត្ថិភាពនៃការដឹកជញ្ជូនតាមផ្លូវទឹក ទម្រាំមានច្បាប់ស្តីពីការគ្រប់គ្រងកំពង់ផែ និងការដឹកជញ្ជូនតាមផ្លូវទឹក និងបានជំរុញឱ្យបង្កើតច្បាប់ បទប្បញ្ញត្តិ និងគោលនយោបាយដឹកជញ្ជូនតាមផ្លូវសមុទ្រឱ្យបានឆាប់តាមដែលអាចធ្វើទៅបាន ដើម្បីត្រៀមរៀបចំការដាក់ឱ្យដំណើរការប្រព័ន្ធកំពង់ផែ Port EDI ដែលនឹងជួយសម្រួលដល់នីតិវិធីចេញចូល កំពង់ផែកម្ពុជានៃនាវាដឹកជញ្ជូនទំនិញអន្តរជាតិធំៗ។
ទាក់ទងនឹងការគ្រប់គ្រងវិស័យដឹកជញ្ជូនតាមផ្លូវទឹក លោកទេសរដ្ឋមន្ត្រីបានគូសបញ្ជាក់ថា៖ ក្រសួងមានការខ្វះខាតអ្នកជំនាញលើវិស័យនេះ និងបានស្នើឱ្យមន្ត្រីពាក់ព័ន្ធរៀបចំការបណ្តុះបណ្តាលមន្ត្រីក្រសួងឱ្យមានសមត្ថភាពអាចគ្រប់គ្រងការដឹកជញ្ជូនតាមផ្លូវទឹក រៀបចំកម្មវិធីបណ្តុះបណ្តាលឱ្យបានច្បាស់លាស់ និងស្វែងរកថវិកាដើម្បីអភិវឌ្ឍធនធានមនុស្សឱ្យមានការរីកចម្រើនលើវិស័យនេះផងដែរ។
សូមជម្រាបជូនថា៖ បច្ចុប្បន្ននេះក្រសួងកំពុងរៀបចំការពង្រីកកំពង់ផែ និងបង្កើតប្រព័ន្ធកំពង់ផែ EDI (Electronic Data Interchange) ដែលនឹងជួយសម្រួលដល់នីតិវិធីផ្លូវការនៃកប៉ាល់ចេញចូលកំពង់ផែ កម្ពុជាក្នុងគោលបំណងពន្លឿននីតិវិធី និងកាត់បន្ថយថ្លៃដើមដឹកជញ្ជូនទំនិញតាមផ្លូវសមុទ្រ។
ជាមួយគ្នានេះ លោកទេសរដ្ឋមន្ត្រី បានជំរុញឱ្យមន្ត្រីពាក់ព័ន្ធរិះរកនីតិវិធីដោះស្រាយបញ្ហាសុវត្ថិភាពនៃការធ្វើដំណើរតាមផ្លូវទឹក នីតិវិធីគ្រប់គ្រងកំពង់ផែ និងនីតិវិធីនៃការសាងសង់កំពង់ផែ ទម្រាំច្បាប់ ស្តីពីការគ្រប់គ្រងកំពង់ផែចេញជារូបរាងឡើង ដោយហេតុថាបើមានបញ្ហាកើតឡើងវាជាការទទួលត្រូវ របស់ក្រសួងសាធារណការ និងដឹកជញ្ជូន។
ទាក់ទងនឹងវិស័យសាធារណការ លោកទេសរដ្ឋមន្ត្រីបានក្រើនរំលឹកថា៖ ម្ចាស់គម្រោងនីមួយៗ ត្រូវទទួលខុសត្រូវលើការសាងសង់ ថែទាំជួសជុលផ្លូវថ្នល់នៅក្នុងទឹកដីដែលជាដែនសមត្ថកិច្ចរបស់ខ្លួន មិនថាផ្លូវនោះឋិតក្នុងគម្រោងសាងសង់របស់គម្រោងណាមួយទេ ហើយធ្វើរបាយការណ៍ជូនក្រសួងដើម្បី តាមដាន និងបានជំរុញឱ្យបំពេញការងារប្រកបដោយប្រសិទ្ធភាព ពិនិត្យឡើងវិញនូវសកម្មភាពការងារ មន្ត្រីគម្រោងរបស់ខ្លួន ចុះពិនិត្យគុណភាពឱ្យបានម៉ត់ចត់ ជួសជុលថែទាំប្រកបដោយស្តង់ដាបច្ចេកទេស ត្រឹមត្រូវ និងដោយការយកចិត្តទុកដាក់ខ្ពស់។
លោកទេសរដ្ឋមន្ត្រី បានបន្ថែមថា៖ ក្រសួងកំពុងរៀបចំបង្កើតក្រុមការងារឯករាជ្យមួយ ដើម្បីជួយដល់ក្រុមការងារអនុវត្តគម្រោងPIU និងក្រុមការងារគ្រប់គ្រងគម្រោង PMU មានតួនាទីនិងភារកិច្ចរាយការណ៍មកក្រសួងដោយផ្ទាល់ និងបានសម្រេចបង្កើតក្រុមតេឡេក្រាមមួយ ដើម្បី រាយការណ៍ស្ថានភាពនៃការជួសជុល និងថែទាំផ្លូវថ្នល់ផងដែរ។
ជាទីបញ្ចប់ លោកទេសរដ្ឋមន្ត្រី ប្រកាសបង្កើតគម្រោងជ្រើសរើសមន្ទីរឆ្នើមប្រចាំឆ្នាំ ដើម្បីជំរុញលើក ទឹកចិត្តឱ្យមន្ទីរសាធារណការ និងដឹកជញ្ជូនទូទាំងរាជធានី-ខេត្តទាំងអស់ខិតខំប្រឹងប្រែងបំពេញការងារ ឱ្យកាន់តែមានប្រសិទ្ធភាពក្នុងការផ្តល់សេវាសាធារណៈ ការសាងសង់ ជួសជុលថែទាំផ្លូវថ្នល់។ លោកទេសរដ្ឋមន្ត្រីបានប្រកាសមន្ទីរសាធារណការ និងដឹកជញ្ជូនខេត្ត កណ្តាលជាមន្ទីរឆ្នើមប្រចាំ ២០១៨-២០១៩ និងផ្តល់មួកសុវត្ថិភាពចំនួន១០០ និងបានស្នើឱ្យមន្ទីរទាំងអស់ផ្សេងទៀតខិតខំប្រឹងប្រែងបំពេញតួនាទីធ្វើការបន្ថែមទៀតដើម្បីបម្រើប្រជាពលរដ្ឋ៕ ដោយ៖កូឡាប
