ភ្នំពេញ៖ លោកឧបនាយករដ្ឋមន្ត្រីជា សុផារ៉ា រដ្ឋមន្ត្រី ក្រសួងរៀបចំដែនដី នគររូបនីយកម្ម និង សំណង់ បានចេញសេចក្ដីសម្រេចមួយ បង្កើតក្រុមការងារចុះធ្វើអធិការកិច្ចនៅ មន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តបន្ទាយមានជ័យ បន្ទាប់ពីផ្ទុះរឿងអាស្រូវជាច្រើននៅ មន្ទីររៀបចំដែនដី នគរូបនីយកម្ម សំណង់ និង សុរិយោដី ខេត្តបន្ទាយមានជ័យ ដែលមាន លោក ប្រាក់ ប៉ូលី ជាប្រធានមន្ទីរ ។
សេចក្តីសម្រេចដែលធ្វើឡើងនៅថ្ងៃទី ៣០ ខែ កក្កដា ឆ្នាំ ២០១៩ ដែលចុះហត្ថលេខាដោយលោកឧបនាយករដ្ឋមន្ត្រីជា សុផារ៉ា គឺមានសមាជិក ៩ រូប ដឹកនាំដោយលោក សរ សុវណ្ណ រដ្ឋលេខាធិការ ក្រសួងរៀបចំដែនដីនគររូបនីយកម្ម និងសំណង់ជា ប្រធាន និង លោក ប៉ែនច័ន្ទ សុខខេមរា ជាអនុប្រធាន ។
បើតាមសេចក្តី លោកជា សុផារ៉ា បានបញ្ជាក់ថា ក្រុមការងារមានតួនាទី និង ភារកិច្ច ដូចខាងក្រោម ចុះធ្វើអធិការកិច្ចលើការងារសុរិយោដី ការងារសំណង់ ការគ្រប់គ្រងបុគ្គលិក និង ការផ្ដល់សេវាសាធារណៈ ត្រួតពិនិត្យការអនុវត្តផែនការចុះបញ្ជីដីមានលក្ខណៈជាប្រព័ន្ធ ធ្វើរបាយការណ៍លទ្ធផលនៃការធ្វើអធិការកិច្ចជូនក្រសួង និងបំពេញភារកិច្ចផ្សេងទៀតតាមការប្រគល់ជូនរបស់ក្រសួង ។
គួរបញ្ជាក់ថា លោក ប្រាក់ ប៉ូលី ឡើងមកកាន់តួនាទី ជា ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តបន្ទាយមានជ័យ នេះ បានបង្កឲ្យមានការរិះគន់ ព្រោះលោកឡើងផ្លោះពី ប្រធានការិយាល័យសុរិយោដី ក្រុងប៉ោយប៉ែត មកជា ប្រធានមន្ទីរ ៕ដោយ៖បញ្ញាស័ក្តិ
