កណ្តាល៖ អតីតឡូត៍នេសាទលេខ៦ស្ទួនស្ថិតក្នុងឃុំព្រែកទន្លាប់ ត្រូវបានឈ្មួញមានអំណាចឃុបឃិតគ្នាឈូសឆាយកាយព្រំលើកទំនប់រំលោភយកដីរដ្ឋយ៉ាងងងើល រាប់រយពាន់ហិកតា ធ្វើឲ្យជម្រកត្រីពងកូនរងការវិនាសហិនហោច។ នេះបើតាម ផ្សព្វផ្សាយ page facebook របស់លោកវីល្លាម សមាជិកក្រុមប្រឹក្សា និងពិគ្រោះយោបល់ មកពីគណបក្សខ្មែរក្រោក នៅថ្ងៃទី 1 ខែសីហា ឆ្នាំ 2019។
លោកវីល្លាម បានឲ្យដឹងថា ប្រជាពលរដ្ឋ បានរាយការណ៍ឱ្យដឹងថា ដីបឹងមុខរាន និងទួលបាក់កាំភ្លើងអតីតឡូត៍នេសាទលេខ៦ស្ទួនស្ថិតក្នុងឃុំព្រែកទន្លាប់ ស្រុកលើកដែក ខេត្តកណ្ដាល ត្រូវបានឈ្មួញមានអំណាចឃុបឃិតគ្នា ឈូសឆាយកាយព្រំលើកទំនប់រំលោភយកដីរដ្ឋយ៉ាងងងើល រាប់រយពាន់ហិកតា ធ្វើឲ្យជម្រកត្រីពងកូនរងការវិនាសហិនហោច ដោយសារគ្រឿងចក្របានកិនព្រៃ លិចទឹក និងការដុតកម្ទេចចោល យ៉ាងអនាធិបតយ្យបំផុតដោយគ្មានអាជ្ញាធរស្រុក ខេត្តទប់ស្កាត់ឡើយ ។
ខណៈមេឃុំ ព្រែកទន្លាប់លោក ងី សារី ថា ករណីនេះ លោកធ្លាប់រាយការណ៍ទៅថ្នាក់លើ និងធ្លាប់រៀបចំកម្លាំង ចុះចាប់គ្រឿងចក្រទាំងនោះដែរ ប៉ុន្តែនៅពេល ដែលកម្លាំងទម្រាំនឹងរៀបរយ ឈ្មួញបានដឹងមុន ក៏នាំយកគ្រឿងចក្រទៅលាក់ទុកបាត់អស់ លុះពេលយប់ឈ្មួញបានលួចធ្វើទាំងយប់វិញ នេះជាការលំបាកក្នុងការអនុវត្តច្បាប់៕ដោយ៖កូឡាប