មន្រ្តីចារកម្មអាមេរិចបានថ្លែងថា Hamza Bin Laden ដែលជាកូនប្រុសបង្កើតរបស់មេដឹកនាំក្រុមអាល់កៃដា Osama Bin Laden ដែលបានដឹកនាំការវាយប្រហារអគារពាណិជកម្មពិភពលោករបស់អាមេរិច បានស្លាប់។
ព័ត៌មានលម្អិតពីទីកន្លែង របស់ Hamza ឬទីកន្លែងកំណើត គេនៅតែមិនទាន់បានដឹងច្បាស់នៅឡើយ។
កាលពីខែ កុម្ភៈ រដ្ឋាភិបាលអាមេរិច បានប្រកាសផ្តល់ប្រាក់រង្វាន់ចំនួន ១លានដុល្លារ សម្រាប់អ្នកទាំងឡាយណា ដែលផ្តល់ព័ត៌មានពីទីកន្លែងរបស់ Hamza។
Hamza ដែលត្រូវគេគិតថា មានអាយុ ៣០ឆ្នាំ បានបញ្ចេញសារសំឡេង និងវីដេអូ ដោយបានប្រកាសឲ្យមានការវាយប្រហារទៅលើអាមេរិច និងប្រទេសដទៃទៀត។
ប្រធានាធិបតីអាមេរិច លោក ដូណាល់ ត្រាំ បដិសេធមិនធ្វើអត្ថាធិប្បាយជុំវិញបញ្ហាកូនប្រុសរបស់ Osama Bin Laden នៅពេលសួរដោយអ្នកសារព័ត៌មានកាលពីថ្ងៃពុធម្សិលមិញនេះ។
សូមបញ្ជាក់ថា Hamza Bin Laden បានធ្វើការជំរុញឲ្យក្រុមអ៊ីស្លាម jihadist ឲ្យវាយប្រហារលើអាមេរិច ដើម្បីជាការសងសឹកទៅដល់ការសម្លាប់ឪពុករបស់ខ្លួនដោយកងកម្លាំងអាមេរិច ក្នុងប្រទេសប៉ាគីស្ថាន កាលពីឆ្នាំ ២០១១។
គាត់ក៏បានស្នើឲ្យប្រជាជននៅឧបទ្វីបអារ៉ាប់ទាំងអស់ឲ្យធ្វើការបះបោរ ហើយក្រោយមក ប្រទេសអារ៉ាប់ សៅអូឌី បានធ្វើការដកសញ្ជាតិរបស់គាត់នៅខែមីនា។
Hamza Bin Laden ត្រូវបានគេជឿជាក់ថា ស្ថិតក្រោមការឃុំខ្លួននៅផ្ទះ ក្នុងប្រទេសអ៊ីរ៉ង ប៉ុន្តែរបាយការណ៍ខ្លះបានឲ្យដឹងថា គាត់ប្រហែលមានទីលំនៅនៅក្នុងប្រទេសប៉ាគីស្ថាន អាហ្គានីស្ថាន និងស៊ីរី។
សូមរំលឹកថា កាលពីថ្ងៃទី ១១ ខែកញ្ញា ឆ្នាំ ២០០១ មានការវាយប្រហារភេរវកម្មទៅលើអគារពាណិជ្ជកម្មពិភពលោកអាមេរិច បណ្តាលឲ្យមនុស្សជិត ៣.០០០នាក់ស្លាប់ និងជាង ៦.០០០នាក់ទៀតរងរបួស។ ការវាយប្រហារនោះ បណ្តាលឲ្យអាមេរិចខាតបង់អស់ ១០ពាន់លានដុល្លារ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
