ប្រទេសកូរ៉េខាងត្បូង បានធ្វើការឃុំខ្លួន ទាហ៊ានកូរ៉េខាងជើងម្នាក់ ដែលបានរត់ផ្តាច់ខ្លួនចូលមកកូរ៉េខាងត្បូង តាមតំបន់គ្មានកងទ័ព ដែលមានការយាមតឹងតែងបំផុត។ តំបន់គ្មានកងទ័ព (DMZ) ខ័ណ្ឌចែកប្រទេសកូរ៉េទាំងពីរ។
ទាហ៊ានកូរ៉េខាងជើងរូបនោះ ដែលមិនទាន់ត្រូវបានគេស្គាល់អត្តសញ្ញាណ បានសម្តែងចំណាប់អារម្មណ៍ពីការរត់ផ្តាច់ខ្លួនមកកាន់ក្រុងសេអ៊ូល។ នេះបើតាមការបញ្ជាក់របស់ប្រធានសេនាធិការកូរ៉េខាងត្បូង។
សូមបញ្ជាក់ថា ជារឿងរាល់ឆ្នាំ ប្រជាជនកូរ៉េខាងជើង បានធ្វើការរត់ផ្តាច់ខ្លួនមកកូរ៉េខាងត្បូង ប៉ុន្តែការរត់ចូលកូរ៉េខាងត្បូង តាមតំបន់គ្មានកងទ័ពគឺជាករណីកម្រ ព្រោះតំបន់នោះមានការយាមកាមតឹងតែងបំផុត។
កាលពី ខែវិច្ឆិកា ឆ្នាំ ២០១៧ ក៏មានទាហ៊ានកូរ៉េខាងជើងម្នាក់បានរត់ចូលកូរ៉េខាងត្បូងដែរ។ អំឡុងពេលរត់ មានការបាញ់ចំនួន ៤០គ្រាប់ពីសំណាក់ទាហ៊ានកូរ៉េខាងជើង ខណៈគាត់រត់ឆ្លងកាត់តំបន់គ្មានកងទ័ព។
ការរត់ផ្តាច់ខ្លួនរបស់ទាហ៊ានកូរ៉េខាងជើងនេះ កើតឡើងតែមួយថ្ងៃប៉ុណ្ណោះ ក្រោយពេលកូរ៉េខាងជើង ទើបតែបានធ្វើការបាញ់សាកល្បងមីស៊ីលរយៈចំងាយខ្លី ដែលការបាញ់នោះ ត្រូវបានកូរ៉េខាងជើងអះអាងថា ជាការផ្ញើសារគំរាមដល់កូរ៉េខាងត្បូង ដែលគ្រោងធ្វើសមយុទ្ធរួមគ្នា ជាមួយអាមេរិចនៅក្នុងខែនេះ។
កូរ៉េខាងជើងតែងថ្កោលទោសសមយុទ្ធយោធារវាងអាមេរិច និងកូរ៉េខាងត្បូង ដោយរបបកុម្មុយនិស្តនោះ ចាត់ទុកការធ្វើសមយុទ្ធរួមគ្នានោះថា ជាការហ្វឹកហាត់សម ដើម្បីត្រៀមខ្លួនលុកលុយកូរ៉េខាងជើង៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC